Warung Ampat Satu
PALUI mangincang mandatangi Tulamak lawan Garbus nang
rahatan dudukan di simpang tiga.
Kanapa Lui, pina mangincang bajalan, ujar Tulamak.
Bubuhan ikam ada malihat anakku nang paling halus kah? ujar
Palui manakuni.
Kadada Lui ai...kami tumatan tadi kada malihat anak ikam liwat,
ujar Garbus mamadahi
Kanapa jadi manyarik-nyarik mancari anak ikam? ujar
Tulamak batakun
Kaya apa kada sarik, inya bahutang di warung Acil Rani kada
bapadah-padah...limbah banyak hutangnya, Acil Rani managih
ka rumah, supan banar aku, ujar Palui manjalasakan.
Ikam jangan manyalahakan anak. Ujar urang, buah tu kada jauh
gugur matan pohonnya. Anak ikam tu tuturutan kalakuan ikam
bahari, ujar Garbus manarusakan.
Akur aku Bus ai...jadi amun handak sarik lawan anak, lihati jua
kalakuan kita lagi halus, ujar Tulamak jua umpat mamadahi
Bubuhan ikam ini pina musti mamadahi aku, kalakuan anak bubuhan
ikam gin kada jauh pada kuitannya," ujar Palui kada mau kalah.
Napanya Lui kalakuanku nang manurun ka anakku? ujar Tulamak
manakuni Palui
Ikam ingatlah kanapa kita mangarani warung Julak Gincu warung
amapat satu? ujar Palui manakuni Garbus wan Tulamak.
Kanapa yu..aku kada ingat nah, ujar Garbus
Kita mangarani warung Julak Gincu tu warung ampat satu karna
kalakuan Tulamak katuju makan wadai sidin ampat bapadah satu,
ujar Palui mangisahakan.
Bujur Lui ai, aku hanyar ingat, ujar Garbus.
Nah, kalakuan Tulamak manurun ka anaknya si Udin nang paling
tuha, ujar Palui
Kanapa Lui lawan anakku si Udin, kulihat inya baik haja kalakuan?
ujar Tulamak mambila anaknya.
Napanya nang baik? ujar Palui. Acil Rani tadi bakisah jua lawan aku,
bahwa si Udin rancak makan wadai di warung sidin ampat buting
bapadah sabuting, ujar Palui mangisahakan kalakuan anak Tulamak
Ha..ha..ha, bararti sama katurunan abahnya jua, katuju ka warung
ampat satu. Makan ampat bapadah satu, ujar Garbus tatawa
mahuhulut tulamak
Baarti aku di karamputi anakku jua ni. Pacangan basiap-siap
mambayari hutang jua aku, ujar Tulamak manggarunum.
Tabaik anakku jua, biar bahutang, tapi bapadah, ujar Palui
mambila anaknya.
Sama haja, abahnya katuju bahutang, pas katagihan Acil Rani,
ujar Garbus tatawa lucut.
Kita ini kana karma kalu lah? ujar Tulamak taungut.
No comments:
Post a Comment