Masam Manis

Masam Manis

BIAR rakat matan halus, bubuhan Palui,

Garbus wan Tulamak rancak jua bahualan

lawan basaing. Cuntuhnya wayah ada bibinian

bungas hanyar badiam di kampungnya maka

bubuhannya bataruh siapa nang kawa

mandapatakan. Imbah lucung samunyaan

tatinggal bubuhannya tatawaan. Tapi rancak

jua bubuhan Garbus wan Tulamak tapakalah

ulih Palui.

Nangkaya itu jua sual gawian, Palui rancak

parajakian banar. Sadikit haja Palui

bagarak banyak tu pang bakulih rajaki.

Makanya bubuhan kakawalannya itu handak

banar mangalahakan si Palui.

"Imbah hari raya ini napa pulang gawian

ikam Lui?" ujar Garbus.

"Gawianku kaya biasa jua, mamanfaatkan

paluang nang ada. Apalagi wayahini musim

rambutan. Bubuhan ikam pang bajualan napa?"

ujar Palui.

"Kami manuruti ikam umpat jua bajualan

buah-buahan," sahut Tulamak wan Garbus.

"Buah napa Bus?" ujar Palui.

" Kaina kita batamuan haja di pasar,"

sahut Garbus.

Wayah hari pasar rami urang bajualan buah.

Ada nang bajual sumangka, tiwadak, rambutan,

ramania. Bubuhan Garbus wan Tulamak bajualan

asam pancukan, maampar dagangannya bahadapan

wan dagangan Palui.

"Ayu rambutan manis, manis ... rambutan

sibatuk, garuda, antalagi. Manis, manis ...

bulih dicuba, bisa dirasani," ujar Palui

kukuriak manawarakan rambutannya. Wayah

urang banyak mamaraki Palui handak manukari

rambutannya maka kadangaranlah Garbus wan

Tulamak bakuriak:

"Asam, asam, asam ...," ujar Garbus.

"Rambutan manis, rambutan manis ...,"

ujar Palui.

"Asam, asam ...," sahut Tulamak di

subalahnya.

Mandangar kuriakan rambutan manis, manis

lalu ada nang manyahut asam, asam ... maka

urang nang handak mancubai rambutan

jualan Palui tapaksa kada jadi.

Bubuhannya takutan kalu tatukar rambutan

masam.

"Rambutan manis, manis ...," ujar Palui.

"Asam, asam ...," ujar Tulamak di

subarangnya.

"Bah, bubuhan ikam talanjur banar Bus

ai mamadahakan rambutanku masam," ujar

Palui maniwas kakawalannya.

"Kami bujur harus Lui ai, kadada bamaksud

manyaingi ikam apalagi mamadahakan masam.

Kami manawarakan jualan kami jua yaitu

buah asam pancukan," ujar Tulamak

manunjuk kajualannya.

"Aku tahu, bubuhan ikam handak manyaingi

jualanku," ujar Palui gagarunum sambil

mambuati rambutannya ka dalam kampil

lalu bapindah wadah bajualan

Kada Hakun Dipasung

Kada Hakun Dipasung

LIMBAH tuntung sambahyang idul adha samalam,

buhan Palui, Garbus wan Tulamak langsung

tulakan ka panyumbalihan sapi di kampungnya.

Tabarungan jua tahun ini inya dapat rajaki

umpat bakurban. Banyak urang sudah takumpulan

sambil mambawa lading gasan mahiris daging.

“Amun kawa hari ini kita balakas manyumbalih,

hari ini jumahat bubuhannya ai, kita

sambahyangan pulang,” ujar Palui mamadahi.

“Oo,,, bujurlah, hari ini kita sambahyang

dua kali,” ujar Tulamak.

“Tapi kita mahadang pa haji jain manyumbalih

di kampung sabalah dahulu hanyar sidin kawadah

kita,” ujar Garbus.

“Labaram kita mahadang pulang,” ujar Palui.

“Amun kaya itu kita pasung dahulu haj sapinya,

jadi mun sidin datang langsung ja disumbalih,”

ujar Tulamak.

“Hadang hulu, kabiasaan haji Jain manyumbalih

kada hakun dipasung?” ujar Palui.

“Ujar siapa ikam Lui? Handak bamatian kita

kalu kada bapasungan,” ujar tulamak mangaras.

“Aku kada bakaramput Mak ai, amun haji Jain

manyumbalih kada hakun sidin di pasung. Cubai

ikam takunakan langsung kaena,” ujar Palui

mangarasi jua.

Sakitar lima belas manit datang pa haji jain

mambawa parang panyumbalihan. Takajut sidin

malihat sapinya balum di pasung.

“Kanapa sapinya balum bubuhan ikam pasung?”

ujar pa haji gagarunum.

“Ujar Palui kabiasaan pian manyumbalih kada

bapasungan, makanya kami mahadang pian haja,”

ujar Tulamak mamadahi pa haji.

“Hua... ha... ha, buhan ikam ini sudah barapa

tahun garang bakawan Palui?” ujar pa haji

tatawa mangalakak.

“Kanapa maka pian tatawa pa haji?” ujar

Garbus wan Tulamak hiran malihat pa haji

tatawa.

“mandangarlah panderan Palui tadi, amun aku

nang manyumbalih kada hakun di pasung kalu?

Mana hakun aku nang di pasung. Nang harus

bubuhan ikam pasung itu sapi, lain aku pang.”

ujar pa haji mamacah rahasia panderan Palui.

“Makanya amun Palui bapander tu jangan

ditaguk bulat-bulat, pasti ada hujungnya,”

ujar sidin pulang.

“Nah,bujur kalu, amun pa haji jain nang

manyumbalih kada hakun di pasung, labaram

sidin nang hamuk,” ujar Palui tatawa lucut

kawa mangalahakan bubuhan kakawalannya.

“Kana pulang kita dihalabionya... Hanyar

haja bamaafan, sudah baulah hual pulang,”

ujar Garbus wan Tulamak kakalahan.

Kada Hakun Kurang Labih

Kada Hakun Kurang Labih

NANG ngaran Palui biar kada sugih kaya urang, tapi inya baik hati lawan kada

pamalar, salain itu parajakian jua hidupnya. Amun malihat urang pina kasusahan

inya hancap manolongi, barang tanaga amun kada baduit. Makanya urang katuju

bakawal Palui.

"Kaya apa Lui hari ini, lancar haja kalu rajaki?" ujar Tulamak manakuni.

"Alhamdulillah bagus haja Mak ai," ujar Palui manyahuti

"Aku tu sanang banar lawan hidup kaya ikam ni Lui ai. Ikam tu parajakian

banar, kada kaya kami, pina kada mau hinggap," ujar Tulamak mangaluh.

"Napa amalan ikam Lui? Amun ada minta kami nah," ujar Garbus umpat

bapander.

"Aku kada baisi amalan napa-napa, cuma kita harus balajar basukur pabila

dapat rajaki. Tarus jangan katuju mangaluh bapadah sakit kada baduit, sabab

Tuhan kada katuju lawan urang nang katuju mangaluh," ujar Palui pina kaya

tuan guru. "Imbah tu banyaki bakawan, ujar urang banyak kawan banyak

rajaki. Nang tarakhir hakun kurang labih, jangan handak manang surangan,"

ujar Palui lagi mamadahi.

"Kaya apa contohnya Lui?" ujar Tulamak panasaran.

"Amun kaya kita ni maujek, tabarungan panumpang kita kada baduit, jangan

jua kita mamaksa bayar, tasarah sapambari urang haja. Amun dibayari

alhamdullah, mun kada baarti balum rajaki. Tuhan tu pasti manggantinya

lawan nang lain," ujar Palui.

"Dasar tinggi amalan ikam Lui ai, pina barat aku manjalanakan," ujar Garbus

pina taungut.

"Bagamatan ai dahulu. Tapi dikampung kita ni ada jua urang nang kada mau

kurang labih tapi anihnya sidin parajakian," ujar Palui mamadahi.

"Siapa urangnya Lui?" ujar Tulamak maanyaki.

"Si TAHIR bubuhan kaum di langgar kita."

"Hau, inya tu kulihat baik haja Lui ai, kanapa jadi ikam padahi kada

mau kurang labih?" ujar Garbus kahiranan.

"Cubai buhan ikam labihi ngaran TAHIR tu lawan A, napa jadinya?"

ujar Palui lihum.

"TAHIRA," ujar Tulamak manjawabakan sambil kakalakak tatawa.

"Nah amun dikurangi R nya jadi napa?" ujar Palui. "Jadi TAHI,"

ujar Tulamak lucut banar tatawa.

"Kanapa ikam lucut banar Mak?" ujar Palui lihum.

"Aku akur lawan pandapat ikam, nang pasnya lagi TAHIR tu sama

ngaran mintuha garbus," ujar tulamak tatawa.

"Pantas haja Garbus pina talipat muha limbah kusambat ngaran Tahir,"

ujar Palui kakalakak jua tatawa.

Bujangan Atawa Janda

Bujangan Atawa Janda

Di kampung Palui bubuhan karang taruna madakan lomba banyanyi alias bakaraoke. Bubuhannya handak mancari bakat gasan diumpatakan lomba antar buhan karang taruna di kabupaten kaena. nang umpat tasarah haja, bibinian atawa lalakian, umur kada dibatasi. Banyak banar pasarta nang umpat.

"Aku handak mandaftarakan kamanakanku umpat lomba. Napa haja saratnya?" ujar Garbus.

"Saratnya bebas bus ai, kada mamandang umur, asal harat banyanyi," ujar Tulamak.

"Kamanakan ikam nang mana handak umpat Bus?" ujar Palui.

"Kamankanku si Jubai, inya pintar banyanyi."

"Jubai anak julak Irum tu kah? Nah aku mandukung jua kalu inya umpat. Nang pasti muhanya malawanakan dahulu, kada kaya pamannya nang babaya sangkut," ujar Palui manyirit Garbus.

"Ikam jangan mahina Lui ai, muha ikam gin kaya balik kurma," ujar Garbus mambalas.

Malam limbah isya di lapangan kacamatan rami banar urang takumpulan handak malihat lomba banyanyi lagu dangdut. Matan nang tuha sampai nang kakanakan umpat manuntun. Nang umpat lomba gin kada hakun kalah, baju buhannya pina macam-macam balang lawan ukurannya, Ada nang balabihan kain, ada jua nang kakurangan. Ada nang kantat pas di awak, ada jua nang bagubiran manuruti artis wayahini. Amun urusan muha, pupur mamupur pasti dihatiakan artis babiniannya. Gincu, calak mata, habang pipi pasti kada katinggalan. Sigar tu pang mata bubuhan Palui maitihi panyanyi bibiniannya nang tampil.

Rahatan asik garbus maitihi kamanakannya banyanyi, Palui mambisiki ka anu Garbus. "Tuh lihati si Jubai banyanyi, amun malihat gayanya banyanyi, lawan cara inya maingkut mikropon, inya tu masih bujangan asli artinya balum babubut," ujar Palui.

"Nyata haja ah inya bujang, karna balum balakian," ujar Garbus.

"Maksud aku wayahini biar balum balakian, ada jua nang bujangan tapi sudah kawin badahulu, bapangalaman," ujar Palui. "Amun handak maminandui bujangan asli lawan janda atawa nang sudah bapangalaman, lihati inya maingkuti mikropon rahatan banyanyi," ujar Palui mamadahi.

"Napa hubunganya bujangan atawa janda lawan mikropon Lui?" ujar Garbus kada paham.

"Hiih, napa hubungannya Lui?" ujar Tulamak nang matan tadi umpat mandangarakan.
"Amun nang bujang asli, maingkutnya babaya haja, pina takuatan-takutan. Tapi amun nang sudah bapangalaman atawa janda, maingkut mikroponnya pasti baganggam, pisit banar,kada hakun malapas lagi," ujar Palui tatawa mangalakak.

"Ikam ni panderan kada jauh pada parno-parno tarus," ujar Tulamak wan garbus taumpat tatawa imbah mandangarakan jawaban mahaluya Palui.

Dihalat Guguling

Dihalat Guguling

DAHULU wayah Palui lagi anum, bila handak musim liburan sakulahan bubuhannya umpat jua baulah rancana maadakan piknik. Biasanya nang dipilih ka gunung, ka guha, ka banyu panas atawa ka pinggir laut.

Kakawalannya banyak, puluhan ikung, bila dibawai pasti hakun asal si Palui nang mengapalainya karana Palui dianggapnya paling rasuk lawan samuaan kakawalan di kampungnya.

Waktu takumpulan di warung mamarinanya Tuhabuk, si Endek mambuka pander.

Lui, parak musim parai sakulahan ini kita ka manaan nang baik, asa lawas banar kita kadada bajalanan.

Tasarah bubuhan ikam, tapi bujurbujur supaya kada mucai kaya tahun lalu, tahambur ka hulu ka hilir, kada taimbai buliknya sampai disariki nang tuha di rumah, sahut Palui.

Aku ada usul, kita basapida baguncing di ancak jangan labih pada badua, dahulu sampai batiga sasapida, asa ringkut batis maninjaknya, ujar Garbus.

Salain panakawan kita jangan kada ingat mambawai kakawalan bibinian nang dahulu supaya rasuk pander di jalanan, ujar Palui sambil malirik ka Garbus karana inya biasa taparabut gandak, sama-sama handak lawan Habibah.

Pas hari nang sudah ditantuakannya, bapuluh-puluh buah sapida masing-masing babawaan saikung gandaknya. Rami banar pamanderannya sapanjang jalan. Bahanu sambil bakikibitan sampai-sampai ada nang taguling ka susungaian.

Tadarau bubuhannya manawa-akan. Palui nang tatuha rumbungan sambil baguncingan lawan Habibah. Baastilah badudi, paling balakangan. Alasannya manjagai kalu-kalu ada nang tabulirit di balakang. Padahal singhajanya supaya kawa bagaya lawan bararayuan.

Parak tangah hari sampailah bubuhannya ka banyu tajun, masing-masing mamilih wadah dudukan, mambuka sangu, sambil makanan dan basisimburan banyu, asyik lawan gandaknya masing-masing.

Imbah habis mandian, parak Asyar mulailah bubuhannya bulikan. Waktu itu hari pina mulai maram, maka masing-masing balalajuan maninjak sapidanya, ada nang tadahulu tapi ada juga nang jauh tadudi di balakang tamasuk Palui lawan Habibah. Awak Habibah kalamakan hingga Palui kauyuhan maninjak sapidanya.

Hari makin maram, angin mulai batiup kancang, apalagi jalanan pina bagugunungan. Waktu angin kancang tadi kakamban Habibah tarabang ditiup angin, lalu inya kukuriak manyuruh Palui bamandak minta tulung ambilakan kakambanya.

Rupanya kakamban tadi tarabang ka dalam pagar kabun urang. Palui bamandak lalu langsung maluncat pagar nang tingginya kurang labih sameter.

Alhamdulillah, pian kawa maambilakan, jaka kada ulun pasti disariki mamarina ulun, tarima kasihlah, ujar Habibah pina ungah lawan Palui.

Imbah habis maambilakan kakamban, hari mulai hujan labat maka Palui lawan Habibah tapaksa bataduh di rumah urang kampung, tapisah lawan kakawalan nang lainnya.Hujan makin labat lawan guntur kilat kada ampih-ampihnya.

Akhirnya inya tapaksa bamalan di rumah urang itu. Disuruh urang rumah baampar di tangah ruang diinjami bantal lawan guguling.

Karana kadinginan, habis basah kuyup Habibah taguring banar sedangkan Palui kilip-kilip matanya takutan kana sariki ulih mamarina Habibah, mambawa anak urang sampai tapamalam. Tapi sambil kilip-kilip, inya pina rancak manuleh ka Habibah nang tatilantang di higanya hanya bahalat guguling. Maka macam-macamlah lamunannya, tabayang ulihnya kaya apa kalu Habibah kawa manjadi bininya.

Umailah malam tadi janak banar guring. Aku maka am macam-macam pikiran tapandang ikam pina muntak banar di higanya, asa handak manjapai takutan kalu sarik, handak memusut kalu pina tabangun. Asa mancikuk liur di rakungan, ujar Palui manyindir sambil pina marista.

Salah sampiyan jua, ulun ini sakahandak sampiyan haja pasti manurut. Asa kadada pilihan lain lagi. Sampiyan talalu banar samalam maluncati pagar sameter kawa haja, tapi maluncati guguling di higa ulun pina bapikir banar, ujar Habibah pina makin ungah mangibit paha Palui sambil basapida ampah bulikan ka rumahnya.

Manyalahakan Jam

Manyalahakan Jam

WAYAH bubuhannya bamalam di rumah mamarina Palui di Banjarbaru nang dahulunya bangaran Gunung Apam, rasa himung banar karna di rumah itu saraba hanyar tamasuk bantal guling nang diguringi. Karna kanyamanan guring itulah maka bubuhannya malandau tarus karna bamamalaman bapander.

Hari itu bubuhannya malandau pulang bangun karna kanyamanan guring ba-AC dan bakisah ka hulu ha hilir. Nang pamulaan bangun adalah si Palui karna inya tamasuk tuan rumahnya. Imbah bangun itu inya langsung baudhu dan sembahyang. Paharatan sembahyang itu masuklah kamanakannya maantari nginuman. Imbah dihadanginya satumat, Palui salam lalu kamanakannya managur:

"Cil, ui pakacil Palui, wayah ini sampiyan pina baalim dan pina panyambahyang, banarlah? Biasanya sembayang subuh haja jarang manggawi tapi wayah ini sudah maningkat hakun manggawi sembayang dhoha," ujar kamanakannya.

"Makin batuha awak makin sadar jua ding ai. Aku tadi kada sembahyang dhoha tapi sembahyang subuh ding ai," sahut Palui.

"Sembahyang subuh? Sembayang subuh itu pukul lima Cil ai, kada pukul sambilan ini?" ujar kamanakannaya. "Hari sudah pukul sambilan?" ujar Palui hiran sambil maitihi jam nang tagantung di tawing. "Itu jam ditawing masih manunjukakan angka lima, artinya masih subuh," ujar Palui.

"Cuba sampiyan buka jandila, hari sudah siang banar," ujar kamanakannya. "Jarum jam itu sudah mulai samalam kada bagarak karna baterainya mati," tambah kamanakan Palui.

"Astagfirullah, aku hilaf manggawi sembahyang subuh di waktu matahari sudah sapanggal. Panyababnya adalah karna malam tadi aku bagadang dan taumpati jam mati. Jadi sabujurnya kada salahku tapi salah jam," ujar Palui manyasal saurang.

"Ayu lakasi garaki kakawanan sampiyan itu, kaina dikiranya jam di tawing itu pukul lima kamarian," ujar kamanakan Palui.

"Bangun, bangun, ayu lakasi bangunan, lajui ba-asyar. Itu nah jam di tawing pukul lima," ujar Palui mangaramputi kakawanannya.

"Kaya apa kami handak ba-asyar Lui, sembahyang subuh wan zuhur haja balum tagawi," sahut Tulamak sambil mamusut mata pina masih marut. "Bubuhan ikam ini bila kanyamanan lalu kada ingat kawajiban nang lima waktu," ujar Palui pina musti mamadahi padahal inya saurang malupa diri jua kanyamanan guring malandau

Manyasal Jadi Turis

Manyasal Jadi Turis

WAYAH madam di Batawi, suah Palui lawan Garbus mancuba handak nang kaya urang jua, umpat rumbungan turis handak bajajalanan nang istilah wayah ini paket tur.
Imbah batakun-takun lawan bubuhan pagawai trepal, Palui lawan Garbus basapakat maambil paket tur nang harganya paling murah. Itu gin saikungnya harus mambayar bararatus ribu, sualnya gasan manuju ka wadah nang handak dilihati harus mamakai bis ganal.

"Kaya urang jua kita kaina, jadi turis nang biasanya mamakai salawar sapanggal, batupi, bakacamata lawan jangan tatinggal kudakan," Palui mulai mahayal.

Pas harinya, tulakan bubuhan turis diangkut mamakai bis ganal, tamasuk Palui lawan Garbus. Nyaman pang di bis, wadahnya ligar kada bakajalan, baunya harum lawan dapat makan. Di bis diputarakan lagu, ada jua pidio lawan kawa jua bakaroke. Jadi sapanjang jalan rami tu pang, maka gaitnya babinian bungas harat pulang mamadahakan ini itu sa panjang jalan nang dilalui.

Kira-kira lima jam babis, hanyar sampai ka wadah nang dituju. Hari parak maghrib, bis diparkir di pantai. Turunan bubuhan turis nang kabanyakan urang bule. asing-asingnya mancari wadah mahadap ka barat maitihi matahari nang handak sanja.

"Very beautiful ......," ujar saikung nang parak Palui. Kada paham Palui apa maksud turis tadi baucap kaya itu.

Kada tapi paham lawan apa nang digawi bubuhannya, tapaksa Palui lawan Garbus batakun ka babinian gait. "Maap lah .... kanapa kita satop di sini?" Palui batakun.

"Ya di sini kita menikmati sunsetnya pak. Itu indah bukan matahari akan tenggelam?" ujar babinian tadi sambil kurihing-kurihing.

Palui lawan Garbus hanyar paham, sakalinya paket tur nang diumpati itu dasar malihat matahari handak tinggalam wayah magrib.

"Bah...... mun di kampung handak malihat matahari tinggalam kada usah babayar bararatus ribu, Bus-ai!" Palui manyumpah, tagal kadada urang lain nang mangarti susumpahannya tadi.

"Kada salah urang pang Lui. Sualnya bubuhannya jarang malihat matahari tinggalam, lawan waktu di trapal sudah jua dijalasakan paket turnya nang disambat sanset-sanset. Kita banar-ai nang bungul kada tahu apa itu sanset, mangira handak barami-rami di wadah nang kaya hotel atawa plasa-plasa jadi kawa baulanja," Garbus manjalasakan pulang lawan Palui.

"Manyasal aku jadi turis Bus-ai," ujar Palui sambil muha pina masam.

Baju salawar luar nageri

Baju salawar luar nageri

Wayah hahanyaran pasar tungging Palui sawat jua tarasani umpat bajual baju-baju wan salawar bakas matan luar nageri. Baistilah inya ampih maujek, sakalinya dasar bujur payu banar. Maka Palui hakun kurang labih lawan pambali, bahkan inya hakun haja mahutangi babayar bulan kaina.

"Ikam harat banar Lui ai kalu sampai bajualan baju-baju luar nageri bubuhan urang asing itu. Matan dimana ikam dapat barang-barangnya, balum biasa kaluar nageri malah langsung bajualan baju salawar luar nageri," ujar Tulamak masih haja kada parcaya dan tatap mamahapak Palui.

"Ikam kada biasa malihatkah Mak, wayahini baju salawar luar nageri itu jadi dagangan glubal," sahut Palui.

"Aku biasa mandangar urang bapander bahwa baju luar nageri itu adalah baju-baju bakas, kalu istilah kita di sini adalah baju pantas layak pakai," ujar Garbus.

"Aku parcaya haja Bus ai, tapi matan dimana Palui mandapatkan banda-banda itu," ujar Tulamak.

"Kalau ikam kada parcaya, ayu kita lihati jualan Palui itu," ujar Garbus mambawai.

Oooo... sakalinya bujuranlah Palui jadi padagang barang luar nageri, tapi... tapi...," ujar Tulamak.

"Tapi napa Mak? ujar Palui manyahut karna kalihatannya pina masih kada hakun kalah.

"Ampun maaflah Lui, kalu baju bakas luar nageri ini babahaya banar karna bisa ada panyakit hiv dan aid," ujar Tulamak.

"Baju salawar nang ikam pakai ini, manukar dimana Mak?" ujar Garbus manakuni Tulamak sambil manjapai baju salawar Tulamak nang pina gubih kada pas di awak.

"Baju salawar nang kupakai ini barian mamarinaku si Aming," ujar Tulamak ba-agak.

"Aku ampun maaf jua Mak ai. Aku ampun maaf karna baju salawar nang ikam pakai itu adalah bujur haja tukaran mamarina ikam. Tapi sidin manukar baju salawar itu matan aku jua karna aku nang mahutanginya," ujar Palui mambuka rahasia.

"Tulamak, Tulamak dasar minyak lamak panderan licin kaya minyak," ujar Garbus mahuhulut Tulamak nang pina paharatnya.

"Baju salawar luar nageri... matan Amerika, matan Inggris, bulih kuntan, bulih karidit dan bulih bahutang kaya mamarinanya Tulamak," ujar Palui kukuriak manjajakan barang-barang jualannya

Makan Paku

Makan Paku

BILA takumpulan, apalagi wayah hari dingin Tulamak katuju banar mamander sual makanan. Bubuhan Palui lawan Garbus imbah anu kulir mandangarakan, napa maulah kacar wan galurukan parut haja ujar bubuhannya.

"Kalu sual makanan nang paling harat adalah urang Palembang," ujar Tulamak mamancing pander.

"Kanapa maka urang Palembang sana Mak? Kalu sual bahaharatan makan urang kita banyak jua nang harat, tamasuk ikam," ujar Garbus.

"Urang Palembang itu harat makan karna wani mamakan kapal silam," ujar Tulamak.

"Nah, sudah mulai mahaluya si Tulamak ini. Kada mungkin, kapal silam itu wasi karas," ujar Garbus kada parcaya.

"Kapal silam itu ngaran wadai Bus ai, yaitu wadai empek-empek Palembang. Jadi ikam kada usah hiran, sakakarasnya empek Palembang pasti pasti lamah jua kana buah cukanya," ujar Palui umpat manjawabakan.

"Nah, kada mahaluya kalu, buktinya Palui bisa manjawabakan," ujar Tulamak.

"Tapi sahaharatnya urang Palembang Mak ai masih kalah wan urang Kalteng," ujar Palui.

"Napa kaharatan urang Kalteng Lui?" ujar Tulamak.

"Kalu urang Palembang wani mamakan terpedo atawa kapal silam, urang di Kateng sana wani mamakan paku," ujar Palui.

"Kada mungkin, kada mungkin. Nang wani mamakan paku atawa kaca itu adalah bubuhan panari kuda lumping. Itupun karna inya kada sadar," ujar Tulamak.

"Kalu urang Kalteng ini, lalakian, bibinian bahkan kakanakan samunyaan wani mamakan paku," ujar Palui mayakinakan.

"Kada mungkin kalu sampai kakanakan wani mamakan paku, pasti luka dan katulangan bahkan bisa mati," ujar Tulamak makin kada parcaya dan mangaramputakan.

"Ikam itu bapadah harat tarus Mak ai, makanya dikalahakan Palui. Aku parcaya urang di Kalteng sana wani mamakan paku karna akupun biasa jua marasaninya. Nyaman banar bahkan bisa jadi ubat," ujar Garbus malawanakan Palui.

"Hahaha..........hahahaaa....... kada usah balawas-lawas ikam bingung Mak ai, paku itu
adalah lalapan gasan digangan ngarannya adalah kalakai," ujar Palui mangalakak tatawa mangalahakan Tulamak.

Diulah Galumbungan

Diulah Galumbungan

BUJUR haja kawin paling pandudinya, tapi kalu urusan babanyakan baisian anak, Garbus mambalap bubuhannya. Palui nang sudah sapuluh tahun balaki babini haja gin, hanyar baisian anak talu ikung. Mintu jua Tulamak nang sudah 7 tahun kawin, hanyar saikungannya kulihan `cirit'. Tapi Garbus nang hanyar kawin 5 tahun, sudah lima ikungan ratik kalambunya. Padahal pancaharian Garbus masih kada manantu. Rumah haja manyiwa di bidakan. Jadi bilang mambari maras tu pang.

"Dimapa kawal nang saikung naitu, Lui? Bilang saban tahun maulah anak tarus," ujar Tulamak wayah badudukan di palatar Palui.

"Samalam sudah ku saranakan supaya umpat ba-KB, Mak ai. Mau haja pang inya maasi," sahut Palui.

Kada saapa, nang dipandirakan cangul. Pina masam muhanya, kaya nang imbah tamakan tandui.

"Ada habar napa pulang, Bus? Pina kumal muha kaya salawar nang baluman digusuk," Palui batakun, tapi nang ditakuni kada manyahut sabatik-batik.

"Ajin kalu kaya ini, pasti inya lagi kada baduit, Lui ai," Tulamak manyahut.

Tapi Garbus tatap haja kada sing bunyian. Tabalik Palui wan Tulamak bahinipan jua.

"Bini ku batianan pulang", ujar Garbus sakali manyahut.

"Alhamdulillah," sahut Palui. "Baarti ikam masih diparcayai Allah ta'ala, Bus ai. Wan jua, banyak anak pacangan banyak rajaki," ujarnya lagi mahimungi.

"Gawian siapa maka bini ikam jadi batianan, Bus?" sahut Tulamak masih haja handak manggayai.

"Hush!!" lakas Palui managur Tulamak. "Kalu kada gawian lakinya saurang, gawian siapa lagi pang, Mak?" ujarnya lagi sambil manyirit Garbus.

"Maka ikam sudah ba KB, Bus, kanapa maka masih kada mampan haja?" ujar Tulamak maanyaki.

"Bini ku batianan gara-gara digawi anak ku nang panuhanya," ujarnya lagi.

"Hah!!" parak takuciak Palui wan Tulamak mandangar. "Asa kada mungkin, Bus ai. Maka anak ikam naitu umurnya masih 5 tahun?!" ujar Palui kada parcaya.

"Hi ih," Tulamak manyahut jua. "Maka inya baluman basunat?" ujarnya lagi.

"Sasuai lawan saran Palui, aku umpat jua ba KB, aku mamakai kundum haja. Imbah talu bulan mamakai tapi bini ku tatap haja batianan. Usut punya usut, rupanya tanpa sapangatahuanku, kundum nang ku andak di laci lamari itu dimainakan anakku nang panuhanya, diulahnya galumbungan. Rupanya imbah itu kundumnya buntus. Karna kadada baisisan serep lagi maka tapaksa ai aku pakai haja kundum nang buntus tadi," ujar Garbus sadih.

"Kalu kaya itu nang salah adalah ikam Bus ai, lain salah anak ikam," ujar Palui lihum manawaakan kabungulan kawalnya itu. "Nang ngarannya kundum itu Bus ai gasan sakali pakai haja, imbah itu dibuang, kada bulih dipakai baulang-ulang apalagi sampai manalu bulan kaya ikam itu," ujarnya sambil manyalami Garbus nang cagar baranakan halus pulang.

Pantun Banjar 2 baris

Tahi lalat kumbang banaung

Tanda Isyarat urang bauntung

Jukung kuin jukung Banjar

Urang kawin parlu balajar

Pada tatindih karawila layu

Kada tatulih mantuha lalu

Bujur ujar paman

Lawan bujur hanyar nyaman

Apa garangan hati unda sanang

Nyawa baduit amung mangganang

Sabar subur

Mati masuk kubur

Banyak kundur pada sasawi

Tabanyak mandur pada nang bagawi

Undang bajang sadang dirantang

Orang bujang pantang di lawang

Sudah baragi tabuang lakatan

Sudah balaki tabuang kawitan

Makin diuruk

Makin baparuk

Me, me kambing makan dami tiwadak

Baju rancang-rancing bagawi kada handak

Alimayar diatas dahan

Baju hanyar kapiragahan

Katu kanari bawadah upih

Ka situ ka mari bapadah sugih.

Sarikaya kambing malati

Talalu bagaya jadi kalahi

Tamu lawak tamu giring

Bahanu biawak bahanu bakaring

Kajadian palar

Puluhannya talalar.

Babulukah kada kah...

Babulukah kada kah...

BUJUR haja bini Palui itu urang Banjar jua, tapi urang

Banjar nang sudah badiam lawas di Samarinda. Kaya

apakah tatamunya maka Palui tabini urang Kaltim sana.

Ngarannya tabini urang jauh, maka tapaksa ai saban tahun

wayah handak hari raya Palui umpat jua bulik mudik

wan bininya itu.

"Kita basungsung haja abahnya ai, biar kada bakakajalan

lagi di bis kaya tahun samalam," ujar bininya mamanderi Palui.

"Tapi itu pang ujar urang itu seninya di bakakajalan itu

jua," ujar Palui.

"Pian nyaman ai mambawa diri saurang haja, kalu ulun

maka banyak bawaan, maka
bagagendongan," ujar bininya pulang.

"Kalu kaya itu tapaksa ai aku maambil cuti karna bubuhan

kantor hanyar libur hari sanayan kaina," sahut Palui.

Saminggu sabalum bubuhan kantor cuti barsama, Palui sudah

cuti badahulu. Sakalinya dasar bujur, di bis masih banyak

nang puang kada pati bakakajalan. Di balakang kursi Palui

dua buah kosong, di mukanya sabuah haja nang diduduki

urang. Pokoknya nyaman banar tu pang parjalanan mudik

tahun ini. Bini Palui duduk parak lalungkang supaya kada

tapi mauk jar dan Palui duduk di subalahnya.

Dasar bujur nyaman pang di bis, Palui haja kawa bahunjur

batis, kaya itu jua urang nang duduk di muka bini Palui, haur

guring haja sidin sapanjangan jalan. Parak tangah malam

bis sudah sampai di Tanjung. Imbah baistirahat satumat di

warung pasinggahan, lalu panumpang babuatan lagi. Urang

nang di muka bini Palui taguring pulang.

Imbah dua jam di jalan, rupanya urang nang duduk di muka

bini Palui tadi tabangun. Imbah malihat ka galang jam, lalu

inya manjinguk ka lalungkang pina kadap haja pang diluar

sana.

Dilihatnya sakulilingan urang guringan, tamasuk si Palui. Nang

tabangun cuma bini Palui nang wayah itu lagi manyusui anak.

"Babulukah sudah?" ujarnya manakuni bini Palui.

Takajut bini Palui mandangar tatakunan urang tadi. Lalu ai inya

pupura kada mandangar.

"Baluman saku," ujar urang tu gagarunum saurang. Lalu sidin

barabah pulang. Imbah saparapat jam babangun pulang sidin

manakuni pulang wan bini Palui.

"Babulukah ding?" ujarnya. Masam muha bini Palui ditakuni

sama itu, tatap kada dijawabnya jua.

"Babulukah sudah?" ujarnya pulang. "Babulukah ding?"

Rupanya Palui dari tadi guring-guring hayam haja. Rasa garigitan

jua inya rupanya mandangar tatakunan nang kurang ajar matan

urang tadi. "Hadangi sakali lagi bila maulang pulang aku

suntul tu pang," ujarnya garunuman.

Sakalinya bujur jua ai, urang tadi batakun tatakunan nang

sama. Langsung ai Palui badiri, langsung di tampelengnya

urang tadi. "Aduuuhh!!" urang tadi kukuciak sing nyaringan.

Tabangunan urang samotor bis-an.

"Kanapa maka manampeleng diaku?!" ujar urang tadi.

"Ikam kurang ajar banar, manakuni nang kada-kada

wan biniku," ujar Palui sarik banar.

"Babulukah, kadakah, ampun biniku jua!" ujar Palui

mahahing.

Mulanya urang tadi handak sarik, tapi imbah Palui maucap

sama itu lalu urang tadi kada jadi sarik. Malah inya tatawa

mangalakak, lalu ai sa-bisan tatawaan jua. Rupanya Palui

tasalah paham, maksud urang batakun desa nang ngarannya

Desa Babulu nang ada di antangan parbatasan, tapi Palui

salah paham dikiranya manakuni rambut ikal bininya

Rinjing

DI parak rumah Palui ada urang hanyar manyiwa rumah, pinanya
urang subarang sana alias matan solo atawa jogja karna panderannya
halus banar. Halus tatacaranya, hurmat wan ramah tamah banar
tingkah lakunya.

Wayah kamarian samalam bini tatangga hanyarnya itu datang ka
rumah Palui, di samping handak bapapatuhan juga handak mainjam
wadah manyanga iwak, sambil baucap : “kalau boleh bisa nggak
kami pinjam wajan ibu?” ujar tatangganya itu ka bini Palui.

“Maaf beribu-ribu maaf, karna mengganggu sampiyan berdua. Maksud
kedatangan saya ini adalah selain buat bersilaturahmi juga kalau boleh
saya pengin pinjam wajan, karna besok kami ada sedikit hajatan yaitu
selamatan pindah rumah,” ujar tatangga hanyarnya itu. Lalu karna kada
tapi paham bahasanya apalagi diucapakan gamat banar maka bini Palui
langsung manyahut bahwa inya kadada ba-isian tupi waja. Tapi
walaupun inya kada paham dijulunginya jua tupi helm karna dikiranya
handak mainjam tupi helm sebagai pangganti tupi waja itu.

Palui paham maksudnya lalu kuambilakan wajan alias rinjing nang
bagantung di parak kompor, langsung dijulungnya.

“Terima kasih.. matur suwun, Kalau boleh tahu, kalau orang sini
menyebut wajan itu apa ya?” ujarnya pulang.

“Kalau kami menyambatnya wajan ini rinjing,” ujar Palui manjalasakan.

“Oooo......,” ujarnya paham. “Kemarin waktu kami sekeluarga baru
pindah, ada juga orang yang bilang rumah yang kami sewa itu dekat
dengan rumah si Palui telinga rinjingan,” ujarnya.

“Hee..!!” ujar Palui takajut. “Siapa nang mamadahakan aku nangkaya
itu, siapa orangnya?” ujar Palui.

“Orangnya kurus dan kepalanya botak dan satunya lagi gemuk
rambutnya keriting,” ujar tatangganya itu. “Memangnya talinga
rinjingan itu artinya apa pak Palui?” ujar tatangganya handak tahu
istilah urang banjar.

“Ooooh, talinga rinjing itu artinya bagus banar. Artinya talingaku ini
kawa mandangar matan jarak jauh,” ujar Palui tapaksa mangaramputakan.
Kada lawas tatangga hanyarnya itu parmisi bulik ka rumah sambil
mambawa rinjing.

“Nah...... abahnya, sakalinya ada haja urang nang kawa mangalahakan
sampiyan, mamadahakan Palui talinga rinjingan,” ujar bininya
manawaakan.“Tahu ai aku siapa nang manyambati itu,” ujar
Palui habang muhanya manahan sarik.

Dihurung Pimpijit

Dihurung Pimpijit

WAYAH jaman saraba sakit ini, masyarakat dianjurakan pamarintah bahemat.

Sual makanan jangan talalu balabihan, nang panting bagizi dan sihat. Sualnya, haraga ubat makin balarang.

"Wayahini ungkus ka dukter wanharaga ubat makin balarang," ujar Garbus.

"Hiih Bus ai, bagi kita nang pas-pasan ini jangankan ka dukter atawa manukar ubat, gasan manukar baras wan iwak haja balangsar dada," ujar Palui."Makanya harus bisa-bisa manjaga kasihatan diri," ujar Garbus

"Bujur Bus ai jangan kaya kawal kita si Tulamak, kulihat pina panggaringan banar," ujar Palui manunjuk.

"Mana mungkin inya panggaringan karna awaknya malah makin balamak tarus," sahut Garbus."Kalu kada parcaya takuni," ujar Palui.

"Bujurkah ikam wayahini panggaringan?" ujar Garbus batakun.

"Sabujurnya aku kada panggaringan Bus ai cuma ba-aritan koreng di awak," sahut Tulamak sambil malihatakan korengnya di balukuk.

"Ini lain koreng Mak ai tapi kurap. Kurap ini ngalih warasnya, padih banar bila kana paluh dan bila sudah malilit sa-awakan bisa mati," ujar Palui.

"Ikam jangan manakutani Tulamak Lui ai, kasihan bini wan anak-anaknya kalu inya mati. Baiknya dipadahakan tatambanya," ujar Garbus.

"Tatamba wan ubatnya sudah macam-macam tapi balum waras jua," ujar Tulamak sambil bagaru kagatalan.

"Ujar urang baik jua disambur atawa disumpah wan banyu tatamba tuan guru," ujar Palui.

"Sudah jua kucubai Lui ai, kada waras jua," sahut Tulamak. Tapi malam samalam, aku suka banar karna wayah guringan di kalambu biniku mahahar panyakit kurapku ini. Inya kasukaan karna wayah balukukku dihaharnya licin banar kada bagarudui lagi. Lalu dipadahakannya kurapku sudah waras," ujarnya."Waras bujuranlah Mak?" ujar Palui.

"Kukira waras bujuran karna bila dihahar rasa licin banar. Karna aku balum yakin kurap kudisku waras makanya langsung kubawa bacaramin, eeeee... bujur-bujur licin kaya kulitku tapi nyatanya licin itu adalah karna hibak dikarubuti pimpijit.

Rupanya pimpijit itu katuju banar mahurung kurapku nang bananahan," ujar Tulamak bakisah sambil bakirik-kirik kapadihan.

Babasuh Cipui-cipui

Babasuh Cipui-cipui

WAYAH ini, nang ngaran Palui sudah jadi kaya urang jua. Panghidupannya pina nyaman, mulai baharta. Kadudukan sudah sama kaya bos nang di parusahaan-parusahaan. Palui rancak tulak ka mana-mana, bakapal tarabang. Sampai-sampai kakawalannya baucap kapal tarabang diulah Palui getek.

Kaadaan Palui nang kaya itu, kada datang situ sini. Tuhuk jua inya bahari basakit-sakit. Maklum Palui lainan katurunan urang sugih atawa badahi. Inya dasar anak patani matan hulu sungai nang madam di Gambut. Matan halus badiam di Gambut sampai barangkat bujang kada suah tulak jauh, paling-paling Palui ka Banjar. Itu gin amun ada kakawalan nang mambawainya tulakan, mun kada di kampung tu pang kulilik-kulilik.

Waktu Palui hanyaran sakali tulak ka Batawi, ada kesah nang kada kawa dilupaakannya. Pamulaan bamalam di hotel babintang di Batawi, Palui sawat kapupusangan. Waktu handak babasuh burit ampih bahera, inya kabingungan.

Biasanya mun di banua, bahera di jamban nang ada di batang lalu babasuhnya cipui-cipui langsung lawan banyu batang. Di kamar mandi hotel tadi kadada bak banyu nang kawa gasan babasuh tagal disadiakan urang kartas tisu.

Karna asa galianan amun babasuh lawan kartas tisu, makanya sawat abut kaya apa babasuh. Untung ada galas nang disadiaakan di atas wastapel gasan bakukumur.

Lalu dipakainya galas tadi mananai banyu gasan mambasuh burit. Dasar bujur saminggu inya di Jakarta itu, samingguan jua babasuh bahera mamakai galas tadi.

Waktu handak bulik ka banua, di lapangan tarabang Cingkareng inya handak banar tabahera. Manahani supaya kaina haja bahera di jamban di banua, kada kawa jua. Tapaksa Palui manjuur ka wc wadah urang bakamih atawa bahera. Kada sawat mamilih, langsung haja inya duduk di wadah bahera nang baduduk kaya di hotel. Cilakanya kadada banyu gasan babasuh, kartas tisu gin habisan.

Limbah parut ampih maula-ula, Palui timbul bingung kaya apa babasuh. Mula-mula dipiciknya picikan gasan manyimbur tahi di klosit tadi. Sambil bapikir, dipicik pulang banyu gasan manyimbur tahi tadi. Marga dipicik tatarusan, banyak-ai banyunya nang kaluar. Malihat banyu banyak tadi hanyar Palui kawa babasuh cipui-cipui nang kaya inya babasuh di jamban di banuanya.

"Barakat baakal, kada tasupani diriku," ujar Palui dalam hati.

Fitnah

Fitnah

Bini Garbus rupanya sudah hamil tuha dan ujar bidan tinggal mahadang harinya haja lagi. Rupanya Garbus salawas mahadang itu inya mambayangakan rupa anaknya itu apakah mirip nang abah atawa sama wan muha bininya.

"Bujurlah Mak bila rupa anak lalakian sama wan rupa umanya pasti cagar bauntung hidupnya," ujar Garbus.

"Kukira bujur haja asal rupa umanya itu langkar, jadi anak lalakiannya cagar langkar jua," sahut Tulamak.

"Kalu sebaliknya kaya apa Mak? Apabila anak bibinian sama rupa wan abahnya, parazakian jualah?" ujar Garbus.

"Kukira sama haja karna sual razaki itu kada tagantung muha dan rupa tapi tagantung pancariannya," ujar Tulamak.

"Biarpun muha kada baik, kada langkar dan kada gagah tapi banyak baisi warisan artinya parazakian jua," ujar Palui umpat manyahut.

"Jadi kalu kaya itu Lui ai razaki kada tagantung muha sama atawa kada sama wan abah uma tapi tagantung wan pancaharian dan warisan," ujar Garbus manyimpulakan.

"Nah, aku akur banar wan kasimpulan ikam itu Bus ai," ujar Palui ma-akuri.

"Jadi artinya hidup kita ini tagantung pancaharian dan warisan kada tagantung wan muha. Makanya kalu ada urang manyambat ikam muhanya jelek Lui ai, baiknya ikam sabar haja," ujar Tulamak.

"Hi-ih aku dasar tamasuk urang panyabaran Mak ai karna aku urang baiman," sahut Palui.

"Kaya itu jua Lui ai bila ada urang manyambat ikam bungul maka ikam acuh haja," ujar Garbus.

"Aku akur haja Bus ai kada usah ditanggapi," ujar Palui.

"Kaya itu jua bila ada nang manyambat ikam bego, cakah dan macam-macam maka jangan dilawani dan jangan diheranakan, cuek haja," ujar Tulamak.

"Hi-ih, bila dilawani maka cagar banyak musuh," ujar Palui.

"Tapi Lui ai bila ada urang nang wani mamadahakan ikam muha gagah, langkar dan cakep maka langsung haja tampar muhanya," ujar Tulamak mamanasi.

"Hau kanapa maka langsung ditampar Mak?" ujar Garbus.

"Urang itu pasti mamfitnah Palui, cuba itihi bahimat bujurlah muha Palui gagah, langkar dan cakep?" ujar Tulamak.

"Hiih-lah, muha Palui nang kaya balik kongguan itu dipadahakan langkar, gagah dan cakep artinya sama wan mamfitnah," ujar Garbus ma-akuri

Warung Papadaan

Warung Papadaan

BAISUKAN Garbus sudah bailang ka rumah Palui, kada lain pada minta izin wan Palui salaku katua RT karna kada lawas lagi inya handak mambuka wawarungan.

"Kira-kira napa ngaran warungnya nang baik pak RT?" ujar Garbus.

"Kada usah ngalih-ngalih ngarani haja warung papadaan," sahut Palui mambari usul.

Imbah mulai bajualan, warung Garbus payu banar kada sampai tangah hari sudah habisan wadai-wadainya, lalu isuknya ditambah pulang wan nasi bungkus, pundut, apam batil wan lupisnya.

"Sampiyan katua RT ai, biar saban hari makan nginum disini kada usah babayaran, ini tanda tarimakasih kami sampiyan mambari ijin mambuka wawarung wan mangarani warung papadaan ini," ujar Garbus mamadahi Palui.

Tapi Palui biar diparaiakan makan nginum inya tahu diri jua, paling-paling saminggu sakali inya singgah di warung Garbus. Wayah hari pasar tadi Palui manyampatakan pulang singgah di warung papadaan, tapi hanya anak Garbus haja nang jaga warung.
Sambil minta ulahakan kupi wan nasi kuning Palui batakun wan anaknya Garbus kamana abahnya maka kadada.

"Abah ka pasar manukar gula, teh kupi wan galapung karna kahabisan parsadiaan gasan isuk," ujar anak Garbus.

Imbah tuntung makan nginum, Palui batakun sambil manjulung duit lambaran Rp. 20.000,- :

"Hitungakan barapa makan minumku," ujar Palui.

Anak Garbus imbah manarima lambaran duit Rp.20.000,- lalu utak-atik lawas banar mahitung, langsung manjulung angsulannya.

"Barapa?" ujar Palui.

"Rp. 2.000,- samunyaannya," jawab anak Garbus.

"Tapi kanapa maka angsulannya Rp. 2.000,- mustinya kalu habis Rp. 2.000,- maka angsulannya Rp. 18.000,-" ujar Palui.

"Naaahhhh..... sampiyan kada ingat bahwa dalam catatan abah ulun tatulis bon sampiyan Rp. 16.000,- lalu ditambah Rp.2.000,- jadi Rp.18.000,- nang habis," ujar anak Garbus.

Palui tapaksa manyambut angsulan Rp. 2.000,- sambil dalam hatinya manyumpah baucap : "Dasar watak Garbus bapadah parai tarus tapi nyatanya dicatat dalam buku bonnya," lalu Palui bulik.

Di tangah jalan Palui batamuan wan Garbus, lalu sambil basalaman Palui baucap : Bus tarimakasihlah, samunyaan hutang Rp.16.000,- sudah kupunahi wan anak ikam di warung ujar Palui. Garbus bingung....... bujur-bujur bingung karna marasa Palui kada biasa bahutang di warungnya samunyaan diparaiakannya.

Kalu mimang ada catatan itu sakadar gasan i-ingatan haja. Ini pasti kasalahan anakku di warung ujar Garbus dalam hati.

Takutan Picak

Takutan Picak

PALUI itu biarpun kada tuntung sakulahnya tapi katuju banar mambaca. Inya kada supan-supan walaupun mambacanya bajuju kaya kakanakan hanyar masuk sakulah. Tapi nang paling ikatujuinya adalah bacaan nang ada gambarnya. Surat kabar nang ditukarnya tahan haja jadi bahan bacaannya gasan ampat lima hari.

"Baiknya sampiyan manukar buku kumik haja abahnya ai," ujar bini Palui wayah malihat lakinya mambaca surat kabar tiap imbah sembahyang asyar.

"Buku kumik itu gasan kakanakan umanya ai karna isinya macam-macam kisah, tapi aku nang panting adalah kabar beritanya. Umpamanya, Adam Air tajun ciruk, Poso bakalahi tarus. Ini nah ada kabar panting... Indonesia ampih bautang wan IMF," ujar Palui pina saraba tahu bakisah barita.

"Abahnya kada usah bapikir nang jauh-jauh sampai ka utang Indonesia. Utang kita haja di warung acil Isul baluman kawa mamunahi. Kada usah lagi mambaca surat kabar, baiknya malihat tivi haja supaya mata jangan sakit," ujar bininya.

"Nah, ikam tabalik umanya ai, sabujurnya malihat tivi nang bisa marusak mata karna cahayanya mahamtam bigi mata kita," balas Palui kada hakun kalah.

"Aku kada bisa manang bapader wan sampiyan ini," ujar bininya mangakui wayah malihat Palui mamasang kacamata sambil mambali-balik halaman surat kabar.

Kada lawas imbah bininya masuk ka dalam rumah, kadangaran suara Palui kukuriak: "Umanya ... umanyaaa ... tulung, lakasi tulungiakan," ujar Palui kukuriak.

"Ada apa abahnya, ada apa abahnya," ujar bininya tagasak-gasak mamaraki Palui.

"Tulung bawa aku ka puskesmas, lakasi, mataku sabalah kanan kabur banar, kada kawa mambaca lagi. Bisa picak," ujarnya. "Kita langsung ka dukter mata haja karna puskesmas sudah tutup," ujar bininya langsung mambawa Palui ka dukter mata.

IMBAH tuntung bapariksa, bini Palui batakun kaanu dukter:
"Napa panyakit abahnya itu duk, barat banarkah atawa bujuran handak picakkah?" ujar bininya.

"Mata sidin itu nurmal haja kaduanya, karna sudah tuha wajar haja minus 300. Pak Palui itu bakacamatalah, bisalah aku malihat mancucukakan minusnya," ujar dukter batakun.

"Ini nah kacamatanya," ujar bini Palui manjulung.

Dukter manyambut dan sakaligus mamariksa kacamata kaur Palui nang sudah lima tahun dipakainya.

"Mata sidin itu nurmal haja bakacamata ini, tapi ...," ujar dukter.

"Tapi napa duk? Bujurkah mata kananku handak picak maka kada kawa mambaca lagi," ujar Palui handak tahu panyababnya.

"Mata sampiyan nurmal haja, cuma nang kada nurmal adalah kacamata ini karna sabalah kanan kadada kacanya, mungkin gugur atawa pacah," ujar dukter malihatakan. "Alhamdulillah, aku kada jadi picak," ujar Palui kasukaan sambil baurut dada

Ciri Madu Asli

Ciri Madu Asli



MAMARINA Palui nang di Tanjung baelang ka rumah Palui. Mamarinanya itu gawiannya batarnak lebah, sakaligus bajual madu. Kabujuran ka Banjar sidin mambawa babarapa botol kalu-kalu ada nang handak manukari.

"Ni nah cirinya Lui. Amun nang asli tu kada dihurung samut. Bila dibuat ka kulkas kada baku atawa mangantal. Rasanya manis asli, amun dicucul lawan korek api, banyala," ujar mamarina Palui manjalasakan. "Cuba lihati aku manyuculnya wan api," ujar sidin handak mambuktiakan kaaslian madu bawaan sidin. Sakalinya dasar bujur malindap wayah dicucul sidin.

"Dasar bujur asli. Ayu ja ulun umpat manukar sabotol lak ai," ujar Palui limbah malihat mamarinanya mantes manyucul wan korek.

"Pacang kada kasandangan bini ikam malam ini," ujar mamarinanya langsung maambilakan ka botol nang sudah ba-isi madu.

"Tapi ada lagi pabidaan madu asli lawan nang palsu nang balum pian sambat lak ai," ujar Palui lihum.

"Satahuku nang kusambat tadi sudah langkap banar, ada lagikah nang lain?" ujar mamarinanya handak tahu.

"Ada lagi lak ai. Kalu madu nang palsu itu cirinya katuju badadiaman haja, kada katahuan lih bini tuha alias basalingkuhan haja, kada dikawini," ujar Palui lihum.

Rupanya mamarina Palui paham arah panderan anak kamanakannya itu.

"Kalu ciri madu nang bujur-bujur asli pang kaya apa Lui?" ujar sidin.

"Nah kalu madu nang asli itu dasar bujuran dikawini alias asli bini anum. Dan kada kawa dibawa atawa dikumpulakan wan bini tuha, bisa dirungkau lih bini tuha....," ujar Palui tatawa.

"Bujur banar Lui ai, kada suah aku manamui bini tuha hakun dimadu, pasti dikacaknya mun dikumpulakan," ujar mamarina Palui mambujurakan pander palui

Batis Bahalus

Batis Bahalus

PALUI tamasuk urang nang kada tapi bisa batutukar ka pasar atawa ka warung, karna inya pangulir banar tawar-manawar. Tapi hakun kada hakun, ada jua pangalamannya tapaksa batutukar ka pasar wayah inya hanyar kawin, kada kawa manulak disuruh bininya. Biasanya nang bini pina baungah bila manyuruh Palui handak minta tukaran barang atawa makanan nang dikahandakinya.

Inya ingat banar wayah malam pamulaan kawin lawan bininya, tuhuk marayu, mambujuk supaya malam itu bujur-bujur malam pertama, malamnya badua nang cagar diganang saumur hidup.

Maklum kawin jaman dahulu, Palui tamasuk nang dikawinakan urangtuha. Kada sawat bapapatuhan langsung haja dijuduhakan lalu dikawinakan.

Mulanya Palui tamasuk bapikir jua handak manulak handak baidah tapi tapaksa. Imbah babarapa kali sawat maintipakan calun bininya ahirnya katuju haja karna cucuk lawan liur.

Imbah siangnya kawin batatai, malam pamulaan itu dianggapnya malam parjuangan, kaya apa marayu bininya supaya hakun bapandir. Tuhuk Palui mamulai mambuka pandir, kadada jua jawaban bininya, pina bakuling, pina baindah tarus. Bahanu diulahnya balulucu tapi kada jua menyahut, paling-paling inya lihum atawa takurihing sambil batukup guguling. Sambil bapikir Palui maingatakan napa pamati atawa barang nang disanangi bininya ini supaya inya kawa mambawai bapandir atawa bagaya kaya urang pangantin hanyar.

"Kita minggu kaina ka kuta malihat kabun binatang lawan taman Maskot, rami di sana banyak urang, banyak kakanakan bamamainan," ujar Palui marayu karna inya tahu bininya itu katuju lawan kakanakan. Tapi nang bini badiam haja kada manyahut. Lalu Palui baucap pulang:

"Kudangar ading dahulu katuju sapatu lawan sandal bata," ujar Palui.

"Sandal bata, ulun kada cucuk," sahut bininya bagamat.

"Lalu sandal apa," ujar Palui pulang.

"Itu tuh....sapatu atawa sandal nang kaya di nyanyian."

"Ooo....itu sandal kulit rusa. Batis ading nomor barapa," Palui batakun.

"Biasanya nomor 36," sahut bininya baungah.

Hari makin landung malam, Palui makin wani manggayai lawan manggalitiki bininya sampai taguringan, sampai mandi basah subuhnya.

Sampai hajatku ujar Palui dalam hati tapi ada kawajiban harus ka pasar manukarakan sandal kulit rusa nomor 36. Takuliling pasar kadada tatamu sandal kulit rusa, maka ditukarakannya sandal cap burung merak. Bulik ka rumah langsung dijulungnya lawan bininya, bininya katuju banar cucuk lawan kahandaknya.

"Nang panting kada mereknya ka-ai, nang panting pian bujur. bujur sayang lawan ulun," ujar bininya. "Cuba pang disadangi," ujar Palui sambil mambuka kutaknya.

"Nah....kada sadang kakai, maka nomornya bujur haja 36 tapi asa kaganalan, asa lunggar, kanapa kak Palui?"

"Kulihat batis ikam ding ai pina bahalus, pina bakulung Samalamnya sabalum kita bakumpul pina biasa haja," ujar Palui.

"Mungkin ulun katuhukan ma-arit, gawian pian jua pang malam tadi pina kada maingat.

Katuhukan ma-arit itulah maka sampai takulung-kulung batis, sampai kada cucuk lagi lawan nomor sandal," ujar bininya.

"Kalu kaya itu sama kita, batisku gin bahalus jua, rupanya kita sama-sama maarit," ujar Palui sambil lihum bagamat maragap bininya.

Ruku Dapat

Ruku Dapat

WAYAH ini Palui bilang sambung puting baruku. Nang dahulunya paling wayah baisukan sambil mangupi atawa paling baruku imbah tuntung makan. Tapi wayah ini bilang handak tiap manit muntungnya kada parnah kada bakukus. Mulai bangun guring baisukan, biar baluman mandi atawa bagusuk gigi, sampai handak guring kaina malamnya.

Bininya pusang jua malihat lakinya nang bilang kada baingat baruku, kada ingat lagi wan kasihatan. Sudah jua inya managur bagamat, tapi tatap haja kada diherani ulih Palui, dianggapnya angin lalu haja. Sampai ahirnya inya kada tahan lagi malihat kalakuan lakinya itu.

"Ini nah abahnya, lihati iklan nang ada di surat kabar ini nah. Sabarataan mamadahakan bahwa ruku dapat marusak kasihatan, dapat manyababkan kanker gangguan kahamilan wan janin," ujar bini Palui malihatakan iklan ruku nang ada di koran.

"Mananya umanya, mananya tulisannya?" ujar Palui maitihi.

"Ini nah, ganal banar tulisannya," ujar bininya manunjukakan.

"Oooo... tulisan nang ini kah?" ujar Palui unggut-unggut.

"Baca abahnya ai, baca bujur-bujur," ujar bininya pulang.

"Ruku dapat manyebabkan sakit jantung dan kanker.......," ujar Palui mambaca bagamat tulisan paringatan nang ada di iklan ruku.

"Nah abahnya, masih haja kah sampiyan baruku bahimat, nang manulis paringatan ini adalah bubuhan pamarintah, bubuhan urang-urang pintar, bubuhan departemen kasehatan," ujar bininya mahahing saking kamuarannya.

"Hadang hulu umanya... Di sini ditulis `Ruku DAPAT manyebabkan sakit jantung dan kanker.......' Nah kalu rukuku ini lain ruku DAPAT-an, tatapi aku manukar wan duitku saurang di warung acil Masnah." ujar Palui baulah alasan.

"Kacuali bila ada tulisannya `Ruku NUKAR manyababkan sakit jantung, kanker, serta gangguan kehamilan dan..." ujar Palui sambil malikit pulang ka ruku.

"Pian ini dasar pambabal abahnya ai, kada tapi cerdas, kada paham bunyi iklan peringatan supaya jangan ba-ruku, jangan marusak kasihatan saurang. kalu marusak kasihatan saurang tu sama haja badosa abahnya ai... badosa!" ujar bininya garigitan manumpalak Palui

M a n g g a

DI kampung Palui ada urang pandatang matan Jawa nang barhasil. Ngaran sidin pa Tukimin.

Urangnya cangkal banar. Mulai anum bahari umpat urang, imbah itu manggawiakan lahan urang,

sampai wayah ini imbah lima belas tahun, sidin baisian kabun saurang.

¡°Kudangar sidin ada jua batanam pohon mangga lawan rambutan cangkokan,¡± ujar Tulamak

mamadahi Palui.

¡°Kalu kaya itu kita ka rumah sidin, aku batakun masalah bakabun, handak maumpati

jejak sidin,¡± ujar Palui mambawai kakawalannya.

Di rumah pa Tukimin banyak pohon mangga wan rambutan babuah labat.

¡°Assalamuallaikum!¡± ujar bubuhannya batatiga.

¡°Waallaikumsalam,¡± ujar pa Tukimin. ¡°Ada apa nih Lui, kada biasanya bailang baimbaian batiga.¡±

¡°Kami kabujuran liwat, malihat pian haratan mambibit, handak jua balajar,¡± ujar Palui.

¡°Inggih pa ai, ulun lihat buah mangga wan rambutan pian ini sudah parak mamanin,¡± ujar Tulamak

pina titik liur malihat mangga wan rambutan nang masak-masak.

¡°Putik haja Mak ai... ujar pa Tukimin hapal kalakuan buhannya. Mandangar disuruh, bahimat

buhannya mamutik.

¡°Ini pian lg baapa pa Tukimin?¡± Palui batakun limbah malihat pa tukimin mamulun batang

pohon lawan sabut nyiur.

¡°Ini ngarannya mancangkok Lui ai. Kaina kaluar akarnya, kawa ditanam kalain lagi,¡±

ujar pa Tukimin manjalasakan.

Lawas bubuhannya batakunan masalah bakabun. Kada karasaan sudah parak kadap hari.

¡°Tarimakasih banyak pa Tukiminlah, kami handak parmisi dahulu,¡± ujar Palui bapadah bulikan.

¡°Mangga, mangga,¡± ujar sidin manyahuti.

¡°Cukup pa Tukimin ai, sudah kanyang,¡± ujar Tulamak manyahut.

¡°Tarimakasih sakali lagi, kami parmisi bulik,¡± ujar Palui maulangi.

¡°Mangga... mangga...: ujar pa Tukimin lagi. Mandangar mangga, buhannya babulik lagi ba asa.

¡°Ayu ai pa ai, amun pian mamaksa, gasan anak bini dirumah,¡± ujar Palui wan kakawalannya

mamutik lagi. Ranai pa Tukimin malihat kalakuan Palui. Hanyar sidin paham, dikira buhan Palui ditawari mangga lagi.

¡°Tarimakasihlah pa lah, di sangui mangga pulang. Kami parmisi bulikan,¡± ujar Palui.

¡°Silakan-silakan,¡± ujar pa Tukimin kada handak lagi baucap mangga

__._,_._

Hari Umak

Tanggal 10Mei..Hari ni
Ujar urang hari umak..hari ibu..
Namun padaKu..hari-hari adalah hari ibu..
Kerna hari-hari ibu berada di hatiku..

Wayahni ibuku..begana sendirian..
badiam di Pusat Dakwah..cagar menghabis sisa usia..
mempelajari ilmu Allah..hingga ke liang lahat..

Hari ni..pasti ku lawat ibu..rasa rindu mendarau di hati..
biarpun hanyar haja ku lawat ibu..

Umak ku..biarpun sendirian di sana..
Namun ketenangan sentiasa terpancar di wajahnya..
Berkat tanganMu Ibu..
kau melahirkan kami..7 urang..yang menjadi urang..

Harapan kami agar ibu bahagia..sentiasa
Amin

Iwak Daging

Iwak Daging

BAISUKAN Palui basaruan ka rumah-rumah tatangganya nang parak. Inya handak mahaul abahnya nang sudah maninggal. Matan ujung hulu sampai ka ujung hilir, dikatukinya rumah urang saikung-saikung amun kada sampai sarunya inya kada bulik.

"Pabila Lui? ujar Tulamak wan Garbus tapaimbai.

"Kaina habis bada. Imbah bulik matan masigit langsung haja ka rumah," ujar Palui.

"Pas banar, imbah bada itu pas lapar-laparnya. Napa iwaknya Lui? ujar Tulamak pina cagat talinga mandangar cagar bamamakan.

"Iwaknya daging mak ai, pokoknya sakahandak mangaut," ujar Palui pulang.

Limbah bada urang datangan ka rumah Palui, tamasuk bubuhan kakawalannya barataan. Kada lawas pa haji Jain mamimpin acara, imbah itu tadangar sidin mambaca doa haul sakaligus manutup acara.

"Nah nang ini nang kita tunggui," ujar Surawin manggarunum.

"Gaini-i Palui basusurung dahulu Win ai, jangan langsung manangkup ": ujar Garbus managur Surawin.

"Basuhan dahulu disurungi, hanyar iwak lawan nasinya," ujar Palui mamadahi bubuhannya.

"Napa makannya ni pina bagangan waluh? ujar Tulamak maitihi kagangan waluh surungannya.

"Surungi haja dahulu mak ai, tu cacapannya lawan iwaknya jangan katinggalan" ujar Palui manyuruh Tulamak manyurungi iwaknya.

"Iwaknya ni pina bahiris hiris kaya daging pang, tapi cucuklah daging wan gangan waluh?" ujar garbus manjapai-japai kahirisan iwak.

"Itu daging nang paling harat bus ai, nang rancak diulah urang satik makanya lamah. Amun urang kuta katuju banar makanan kaya ini, daging satik gangan waluh, "ujar palui manarangakan.

"Nang sudah lagsung haja makani, kada usah basupanan," ujar Palui manyuruhi bubuhan hadirin makanan

"Rasa suah aku makan daging nangini, ujar Tulamak pina rasa tahu lawan iwaknya.

"Ini rasanya kaya mandai, bujurlah mak?" ujar Garbus.

"Dasar mandai bus ai, itu bawaan julakku matan Amuntai sana," ujar Palui kakalikik tatawa.

"Bah, bapadah daging, sakalinya mandai," ujar Tulamak kakalahan.

"Bujur haja daging Mak ai, tapi daging mandai," ujar Garbus gagarunuman

Budi Diganang

• Budi Diganang
•  
• Ditungkaran tuha bahari kita batamuan
• Disampan ganal nang itu jua kita bapandiran
• Di itihi Tua ampun sampan latat kada babaju
• Diiringi Makacil Siah dihiga kiri manyungil timbakau
• Disanding Tukacil dihiga kanan mampual baruko
• Kakanakan kuriakan  banyak haja
• Ramik pandiran kita kulaan
• Pandiran urang2 kampong bahari haja
• Bakisah hayam handak dijual
• Handak baaruhan jar Antin Aloh
• Bakisah hintalo dicuntan sakataraan
• Gigir barucau riuh kamalingan
• Batamparan siUcir awan si Andut disimpang tiga
• Tuhuk batata si Imam
• Bakisah amun handak hubi dicabut haja
• Kada bajual, kira halal haja kulaan
• Kira babarian haja hagan bubuhan
• Ramik pandiran kita kulaan
• Si Utoh sibuk handak manjuung ading kasungai
• Si Tua manyariki.... bararanai jar disampan
• Sampan panuh balapan urang, sabigi basikar
• Ma ampat tandan pisang amas, sajunjung kaladi cina
• Harat haja sampan si Tua ni
• Babudi, bajasa ka urang kampong
• Lima sen diintai sakapala
• Bapala haja sapambarian urang, Tua kada kisah
• Siapa kada pinandu, wahini kadada lagi
• SiTua pandayung sampan kampong ku bahari
•  
• mairah98                        2230300409h

Manang Manukar

Manang Manukar

PASAR tungging wayah ini kada kaya dahulu lagi karna bubuhan pasar balauran banyak nang bapindah bajualan ka situ. Tapi amun itih masih ada saikung badua nang masih bajual baju wan salawar bakas matan luar nagri itu.

Ujar habar pasar tungging kada lawas lagi cagar dipindah ka kawasan lain nang kada maulah samrawut wan macit jalan. Karna cagar dipindah itulah makanya palui baistilah batatukar baju wan salawar bakas itu.

"Lui, pina banyak batukar baju salawarlah?" ujar Garbus marawa Palui wayah mambawa puntalan.

"Kanapa maka ikam tahu bahwa nang kubawa ini baju salawar," sahut Palui.

"Pasti haja aku tahu karna bungkusannya bulat pasti isinya kain, kalu ikam mambawa bungkusan balik kurma pasti sagi ampat," ujar Garbus kada hakun kalah.

"Aku mamburung, rami banar urang bajualan baju salawar bakas nang sudah jadi," ujar Palui.

"Oooooo........ itu baju salawar luar nageri, aku ada jua manukar dua talu pasang. Biar pakaian bakas tapi samunyaan masih hanyar-hanyar babau pabrik," ujar Tulamak.

"Cucuk hajalah ukurannya wan ikam Mak," ujar Garbus.

"Samunyaan cucuk haja, pas banar wan awakku karna awakku ganal sama wan awak urang luar nageri," sahut Tulamak baagak.

"Tapi aku maraguakan wan Palui karna awaknya kurus karimping kaya potlot," ujar Tulamak pulang mahuhulut Palui.

"Aku paham haja Mak ai bahwa baju salawar matan luar nageri ini ganal-ganal, hitunganku manang manukar, manang haraga karna kainnya banyak, kaina baju salawar itu diupahakan mahalusi, lalu sisa guntingannya kawa diulah kain lap," ujar Palui.

"Tapi ikam harus hati-hati jua Lui ai, ujar urang bahwa baju bakas urang luar nageri itu bisa babahaya karna di sana rami panyakit AIDS," ujar Tulamak.

"Gampang haja, ditapas, dirandam banyu panas. dikalantang, dijamur pasti barasih dan mati AIDSnya," ujar Palui.

"Barapa haraganya salambar Lui?" ujar Garbus.

"Haraganya salambar Rp 15.000," ujar Palui.

"Barapa ungkus maupahakan mahalusi baju salawarnya Lui?" ujar Garbus.

"Ujar tukang jahit karna dirumbak samunyaan maka ungkusnya Rp 15.000 salambarnya," ujar Palui.

"Jadi barapa jumlah haraga salawar wan ungkus mahalusinya Lui?" ujar Tulamak maanyaki.

"Hi'ih-lah, samunyaan jadi tiga puluh ribu rupiah sama wan baulah salawar hanyar," ujar Palui kakalahan karna salah hitung.

"Ikam kada kalah Lui ai karna masih ada tulisan made in-nya ulahan luar nageri," ujar Garbus mahimungi

Ciri Madu Asli

Ciri Madu Asli

MAMARINA Palui nang di Tanjung baelang ka rumah Palui. Mamarinanya itu gawiannya batarnak lebah, sakaligus bajual madu. Kabujuran ka Banjar sidin mambawa babarapa botol kalu-kalu ada nang handak manukari.

"Ni nah cirinya Lui. Amun nang asli tu kada dihurung samut. Bila dibuat ka kulkas kada baku atawa mangantal. Rasanya manis asli, amun dicucul lawan korek api, banyala," ujar mamarina Palui manjalasakan. "Cuba lihati aku manyuculnya wan api," ujar sidin handak mambuktiakan kaaslian madu bawaan sidin. Sakalinya dasar bujur malindap wayah dicucul sidin.

"Dasar bujur asli. Ayu ja ulun umpat manukar sabotol lak ai," ujar Palui limbah malihat mamarinanya mantes manyucul wan korek.

"Pacang kada kasandangan bini ikam malam ini," ujar mamarinanya langsung maambilakan ka botol nang sudah ba-isi madu.

"Tapi ada lagi pabidaan madu asli lawan nang palsu nang balum pian sambat lak ai," ujar Palui lihum.

"Satahuku nang kusambat tadi sudah langkap banar, ada lagikah nang lain?" ujar mamarinanya handak tahu.

"Ada lagi lak ai. Kalu madu nang palsu itu cirinya katuju badadiaman haja, kada katahuan lih bini tuha alias basalingkuhan haja, kada dikawini," ujar Palui lihum.

Rupanya mamarina Palui paham arah panderan anak kamanakannya itu.

"Kalu ciri madu nang bujur-bujur asli pang kaya apa Lui?" ujar sidin.

"Nah kalu madu nang asli itu dasar bujuran dikawini alias asli bini anum. Dan kada kawa dibawa atawa dikumpulakan wan bini tuha, bisa dirungkau lih bini tuha....," ujar Palui tatawa.

"Bujur banar Lui ai, kada suah aku manamui bini tuha hakun dimadu, pasti dikacaknya mun dikumpulakan," ujar mamarina Palui mambujurakan pander palui.

Kagancangan

Kagancangan

BAISUKAN Palui sudah mendatangi rumah Tulamak nang kada jauh matan rumahnya. Kada hiran, Tulamak takajut banar karna kada biasanya Palui kaluar baisukan apalagi ini mengiau-ngiau sambil manggandah lawang. Biasanya, Palui imbah basubuh mamadar dahulu sampai siang.

Tulamak nang masih ulir-ulir di tilam takajut-kajut. Kada bisanya Palui pina bahalulung banar.

"Napa ikam Lui, basungsungan hari manggandah rumahku?" ujar Tulamak.

"Aku minta ikam dangi'i baurut. Aku sakit pinggang, dimanalah wadah urang baurut?" ujar Palui sambil takuringis manahan sakit.

"Ooo nang kaya itukah. Kalau itu kita ka rumah abah Garbus haja. Sidin, habarnya paurutan jua. Banyak nang batatamba ka wadah sidin."

"Ayu ai mun nang kaya itu. Pakai sapidaku hajalah. Ikam nang manggonceng soalnya pinggangku rasa pagat. Bejalan haja aku baingkut dinding," ujar palui.

Di jalan, Kaduanya batamuan lawan Garbus. "Nang apa kisahnya pagi-pagi handak bailang ka rumahku," ujar Garbus hiran.

"Ini pang nah mambawa kawan kita sakit pinggang. Handak baurut lawan abah ikam jar," ujar Tulamak mengisahakan.

"Mun kaya itu lakasi, tampulu sidin ada di rumah. Amun talambat, kaina sidin diambili urang," ujar Garbus. Lalu ai bubuhannya bahancap tuju ka rumah Garbus.

"Buka baju dahulu lalu barabah biar kupariksai dahulu uratnya," ujar Abah Garbus memadahi Palui.

Hanyar dijapai, sedikit Palui sudah kipuh kasakitan. "Aduh sakit banar..aduh aduh!!" ujar Palui takuringis.

"Ikam ni kada apa-apa, cuma masuk angin haja. Lawan kada bisa bagimit," ujar abah Garbus mamadahi.

"Kada bisa bagimit kaya apa bah?" ujar Palui kada paham.

"Kagancangan manumbuk ni. Urang bagimit haja menumbuknya," ujar abah Garbus sambil manyirit ka Tulamak.

Tulamak nang baduduk di pinggir kalikikan mandangarakan. Rupanya Palui dipadahakan kaya itu rasa supan jua. Inya langsung mangaramputakan pemandiran abah Garbus. "Kada, ulun kada parnah gancang. Bagamat haja, kada gancang ulun menumbuk," ujar Palui bakulim mati.

"Kanapa garang ikam pina bakulim banar, aku tadi bagayaan haja. Maksudku, ikam tuh nah jangan talalu gancang menumbuk padi. Atau bisa dasar bujuran gancang nih manumbuk," ujar abah Garbus menggayai Palui.

Habang hirang muha Palui manahan supan. Sekalinya, sidin itu bagayaan haja. Tapi rahasianya sudah talanjur tabungkar katahuan ulih urang.

Kamihi Kah?

Kamihi Kah?

LAWAS palui kada manjanguki mamarinanya

di Tanjung. Pas tabarungan ada rajaki,

dibawainya buhan Tulamak wan Garbus.

“Kita manjaga nang larut haja Lui ai,

amun di tarminal mahadang hibak hanyar

tulak taksinya,” ujar Tulamak mambawai

manjaga diluar. Kada lawas datang taksi

tuju ka hulu sungai. Buhannya batiga

langsung babuat.

Imbah 3 jam di jalan mutur taksi tadi

basinggah di Haruyan, wadah urang bajual

sasapu lawan karajinan tangan.

”Baapa pir singgah di sini? ada nang

handak manukar kukudaankah? ujar Palui

manakuni supir.

“Bubuhan pian handak ka Tanjung kalu?

Mutur ulun ni kada sampai ka Tanjung,

ulun handak ka Amuntai. Tapaksa ai

bubuhan pian basalin ka mutur kawan

ulun itu,” ujar supir manunjuk kamutur

nang bawarna putih.

“Kaya ini pang rasikunya umpat mutur

balarut, kamana kahandak supir, limbah

itu disalinnya kita,” ujar Tulamak

manggarunum.

“Nang mambawai manjaga dimuka tadi

ikam kalu Mak?” ujar Garbus manumpalak

Tulamak.

“Kada usah basalahan, nang panting ada

haja muturnya,” ujar Palui lagi manangahi.

Pas bubuhannya baalih mutur arah ka

Tanjung, taumpat nini-nini umur

anampuluhan basalin mutur jua.

”Kamihi kah mutur ni?” ujar sidin

sambil mangunyah panginangan.

“Jangan ni ai,…labaram amun pian

bakamih dimutur ne,” ujar Garbus

mamadahi nini tadi.

“Kanapa cu, aku batakun…kamihi kah

mutur ne ? ujar nini tadi maulangi

tatakuanan sidin.

“Dasar mangalilu jua paninian ini.

Pian jangan bakamih disini ni lah,”

ujar Tulamak jua bajauh.

“Siapa mamadahkan aku mangalilu?”

ujar nini sarik. “Aku batakun bujur

kamihi kah mutur ini?

Palui mandangar rasa kada nyaman. ”

Kamihi ja ni ai,“ ujar Palui manyahuti.

“Kanapa lui jadi ikam suruh bakamih

disini? ujar Garbus sarik wan Palui.

Kada lawas supir mamaraki. “Napa pina

ribut banar?” ujar supir.

“Ini nah pir, nini ini handak bakamih

di mutur ini nah,” ujar Garbus.

“Siapa nang handak mangamihi? Aku

tadi cuma batakun kamihi kah mutur

ini,” ujar nini maulangi tatakunannya.

Supir lucut tatawa limbah mandangar

masalahnya.

”Ni.. mutur ini sampai Tanjung haja.

Kaina amun pian handak ka Mihi, kaena

ulun cariakan muturnya di Tanjung sana,”

ujar supir tatawa sambil malirik ka

buhan Palui.

“Mihi itu ngaran kampung di Tanjung

sana, kadanya sidin handak mangamihi

muturku ini pang,“ ujar sopir mamadahi

sambil tatawa.

”Oooo... Kaya itukah pir. Kami kira

sidin sudah mangalilu, handak mangamihi

mutur ikam,” ujar Palui wan tulamak

lawan garbus kasupanan lawan nini.

Mangidam Bigi Salak

Mangidam Bigi Salak


PARUT bini Palui sasain sahari sasain
baganal, kada karasaan sudah baumur 2
bulan labih. Malihat bininya pina uyuh
batianan nang ada ini, Palui pina jimak
di rumah manjagai. Rancak banar nang
bini ruak-ruak handak muak.

“Kanapa umanya, masih hajakah pina kada
nyaman rasa?” ujar Palui manakuni bininya.

“Ulun rasa handak marasai salak abahnya
ai,” ujar nang bini pina baungah.

“Ikam mangidam salak kah? ayuja kaena
aku mancariakan,” ujar Palui bagagas
handak mancari buah salak.

Kada lawas Palui tulak ka pasar mancari
buah salak nang dihandaki bininya.
Tabarungan di tangah jalan Palui tatamu
lawan Garbus wan Tulamak.

“Handak ka mana ikam Lui, pina bagasakan
banar?” ujar Tulamak. “Aku handak ka
pasar manukar salak nah, biniku mangidam
biginya,” jawab Palui.

“Amun manurut aku ikam ka rumah Tukacil
haja, inya ada bakabun salak, baik
maminta haja,” ujar Garbus mamadahi.

“Bujurkah Tukacil ada bakabun salak,
amun kaya itu aku ka rumahnya nah,
tarima kasihlah buhannya,” ujar Palui
langsung mangincang ka rumah Tukacil.

“Cil, aku minta tolongi nah, biniku
mangidam bigi salak, kawakah minta
sabigi haja?” ujar Palui manakuni
Tukacil

“Ambil haja, ayu ja mudahan bini ikam
ampih mauk jua,” ujar Tukacil. “Kasian
jua ikam amun bini mangidam, kalu kada
dibari.”

Limbah dapat buah salak Palui langsung
mangunyur bulik ka rumahnya, Bininya
pas rahatan pina gagaruak.

“Ni umanya, bigi salaknya, handak ikam
taguk atawa dimamah?” ujar Palui maunjuk
ka bigi salak

“Pian ni talalu abahnya ai, baapa ulun
disuruh managuk bigi salak nangitu,
ulun bujurai handak bigi salak,
tapi...lain bigi salak nangini, bigi
salak ini karas, ulun handak yang talamah”
ujar nang bini pina sarik-sarik tarus

“Limbah pang bigi salak napa nang lamah?”
ujar Palui kada paham

“Cariakan pian bigi salak nang lamah,
amun kadada nang mahirip ja ulun hakunai,”
ujar nang bini pina balamah

Lawas palui bapikir, napa nang dihandaki
bininya. Kada lawas inya lihum tatawa
sambil mamaraki nang bini.

“Sabar umanya ai, kaena malam haja
kucariakan,” ujar Palui paham kahandak
nang bini.

HP Mini 1001TU Series promo price-hagan kulaan

Hp Mini Paling ringan..dibawah 1 kg +- 850grm...Harga Runtuh drpd Rm1699 -->Rm1550...Tawaran hanya khas utk pelangan Kenanga It Services sahaja..Lekas tawaran terhad sementara stok masih ada...sila hubungi melalui email..akan di hantar hingga ke pintu rumah/pejabat anda
Price: RM 1 550

Specifications
--------------

Intel® Atom™ Processor N270 (1.60GHz, 512KB L2, 533Mhz FSB)
1024MB (533DDR2) Memory (1024 x 1 pcs)
60GB (4200rpm)
10.1'' SD BrightView Infinity Display with built-in VGA webcam
Bluetooth
802.11b/g

Normal Price RM1699

Pertandingan Mencipta Logo KOKUM

---

Pertandingan Mencipta Logo KOKUM - oleh Admin

Pertandingan untuk mencipta logo KOKUM dibuka kepada semua. Sila Hantarkan Logo ( Koperasi Kulaan Malaysia Berhad ) KOKUM kepada pihak kami. Setiap penyertaan mestilah di hantar kepada pihak Sekretariat dengan menggunakan format dibawah :

Spesifikasi Logo :

Saiz : minima 640 x 480
Format : JPG, JPEG , GIF , AI , PNG
Keterangan Logo :
Justifikasi :
Tema Logo :

Setiap LOGO yang di pilih dan di senaraipendekkan akan dipamerkan di laman web untuk di UNDI.
Hadiah menarik dari pihak PBM menanti anda.

Untuk Pertanyaan sila Hubungi Sekretariat PBM di Nombor : +603-7785 0048

PANTUN BANGSA

SALAM MUALAIKUM

PANTUN BANGSA OLEH MAIRAH MEMANG BUJUR

AKU GIN HANDAK UMPAT BAPANTUN....

TULAK MA UNJUN DI TANJUNG KATUNG

BAWA SANGUK KALUKUK LAPAR

BARANG DI OLAH BIAR TUNTUNG

BANYAK-BANYAK BAWA BA SABAR

AMUN PARUT TARASA LAPAR

NAPA DI MAKAN ASA BA SALERA

AMUN BANYAK BAWA BA SABAR

HIDUP SELALU AMAN GAMBIRA

WAK DOLAH ANAK WAK JABAR

KAWIN AWAN ANAK WAK SELAMAT

SUNGUH UNTUNG ORANG NANG SABAR

SEMUA GAWIAN BARKAT SELAMAT

SABAR ITU TANDA BERIMAN

SIFAT ORANG ISLAM DAN MUKMIN

KEKAL HIDUP ZAMAN BERZAMAN

HIDAYAH DARI RABUL ALA MIN

by. hassanmarshad

PBM Tamarloh

Kacubung Purnama

Kacubung Purnama

SALAWAS dapat bagian warisan matan kayinya Tulamak

pina bapakaian banar. Baju salawar saraba hanyar, pakai

galang jam wan sipatu sandal hanyar.

Bahkan kada lawas tadi inya mamakai kangkalung amas. Ujarnya

mamakaiakan ampun bininya.

"Mak ui Tulamak, lalakian itu kada bulih pakai parhiasan amas,

haram. Parhiasan amas itu dihususkan gasan bibinian," ujar Palui.

"Tapi kanapa maka ikam mamakai utas Lui?" ujar Garbus.

"Utasku ini lain amas tapi utas sawasa alias wasi putih," ujar Palui.

"Kukira Lui ai lalakian kada bulih mamakai utas amas itu

karna kada kawa manukar," ujar Garbus.

"Biarpun urang sugih dan banyak baduit dan kawa manukar amas

bakilo-kilo tatap haja kada bulih mamakai parhiasan amas, haram

hukumnya," ujar Palui.

"Kalu parmatanya bulihlah lalakian mamakai intan barlian,"

ujar Tulamak.

"Bulih haja Mak ai tapi haraganya nang larang. Karna larang maka

banyak lalakian mamakai mata utasnya adalah kacubung, akik,

jambrut, tupas, macam-macam jenis batuan," ujar Palui.

"Mata utas ikam itu napa ngarannya Lui, pina biru banar

balangnya?" ujar Garbus manjapai utas Palui.

"Parmata utasku ini anih banar ngarannya Bus ai. Ngarannya

adalah kacubung purnama bila malam dan kacubung matahari

biru bila siangnya," ujar Palui. "Hau kanapa maka babida-
bida ngarannya?" ujar Tulamak.

"Aku kada parcaya Lui ai. Kalu ngarannya batu kacubung ya

batu kacubung, kada mungkin babida-babida antara siang dan

malam. Napa buktinya Lui?" ujar Garbus manggasak.

"Buktinya, malam bulan purnama bila permata kacubungku

ini diteropongkan ke bulan pasti kalihatan purnamanya.

Kaya itu jua siang bila batu permata kacubungku

ini diteropongkan ke

matahari pasti biru warnanya," ujar Palui sambil lihum

manating-nating utasnya.

"Wah, waahhhh... dasar Palui tukang haluya, kalu bulan purnama

atawa siang, jangankan batu kacubung, sandal gapitpun bila

ditating ka bulan purnama pasti kalihatan purnamanya," ujar

Garbus mahual kada hakun kalah jawaban kasak Palui.