Fitnah

Fitnah

Bini Garbus rupanya sudah hamil tuha dan ujar bidan tinggal mahadang harinya haja lagi. Rupanya Garbus salawas mahadang itu inya mambayangakan rupa anaknya itu apakah mirip nang abah atawa sama wan muha bininya.

"Bujurlah Mak bila rupa anak lalakian sama wan rupa umanya pasti cagar bauntung hidupnya," ujar Garbus.

"Kukira bujur haja asal rupa umanya itu langkar, jadi anak lalakiannya cagar langkar jua," sahut Tulamak.

"Kalu sebaliknya kaya apa Mak? Apabila anak bibinian sama rupa wan abahnya, parazakian jualah?" ujar Garbus.

"Kukira sama haja karna sual razaki itu kada tagantung muha dan rupa tapi tagantung pancariannya," ujar Tulamak.

"Biarpun muha kada baik, kada langkar dan kada gagah tapi banyak baisi warisan artinya parazakian jua," ujar Palui umpat manyahut.

"Jadi kalu kaya itu Lui ai razaki kada tagantung muha sama atawa kada sama wan abah uma tapi tagantung wan pancaharian dan warisan," ujar Garbus manyimpulakan.

"Nah, aku akur banar wan kasimpulan ikam itu Bus ai," ujar Palui ma-akuri.

"Jadi artinya hidup kita ini tagantung pancaharian dan warisan kada tagantung wan muha. Makanya kalu ada urang manyambat ikam muhanya jelek Lui ai, baiknya ikam sabar haja," ujar Tulamak.

"Hi-ih aku dasar tamasuk urang panyabaran Mak ai karna aku urang baiman," sahut Palui.

"Kaya itu jua Lui ai bila ada urang manyambat ikam bungul maka ikam acuh haja," ujar Garbus.

"Aku akur haja Bus ai kada usah ditanggapi," ujar Palui.

"Kaya itu jua bila ada nang manyambat ikam bego, cakah dan macam-macam maka jangan dilawani dan jangan diheranakan, cuek haja," ujar Tulamak.

"Hi-ih, bila dilawani maka cagar banyak musuh," ujar Palui.

"Tapi Lui ai bila ada urang nang wani mamadahakan ikam muha gagah, langkar dan cakep maka langsung haja tampar muhanya," ujar Tulamak mamanasi.

"Hau kanapa maka langsung ditampar Mak?" ujar Garbus.

"Urang itu pasti mamfitnah Palui, cuba itihi bahimat bujurlah muha Palui gagah, langkar dan cakep?" ujar Tulamak.

"Hiih-lah, muha Palui nang kaya balik kongguan itu dipadahakan langkar, gagah dan cakep artinya sama wan mamfitnah," ujar Garbus ma-akuri

Warung Papadaan

Warung Papadaan

BAISUKAN Garbus sudah bailang ka rumah Palui, kada lain pada minta izin wan Palui salaku katua RT karna kada lawas lagi inya handak mambuka wawarungan.

"Kira-kira napa ngaran warungnya nang baik pak RT?" ujar Garbus.

"Kada usah ngalih-ngalih ngarani haja warung papadaan," sahut Palui mambari usul.

Imbah mulai bajualan, warung Garbus payu banar kada sampai tangah hari sudah habisan wadai-wadainya, lalu isuknya ditambah pulang wan nasi bungkus, pundut, apam batil wan lupisnya.

"Sampiyan katua RT ai, biar saban hari makan nginum disini kada usah babayaran, ini tanda tarimakasih kami sampiyan mambari ijin mambuka wawarung wan mangarani warung papadaan ini," ujar Garbus mamadahi Palui.

Tapi Palui biar diparaiakan makan nginum inya tahu diri jua, paling-paling saminggu sakali inya singgah di warung Garbus. Wayah hari pasar tadi Palui manyampatakan pulang singgah di warung papadaan, tapi hanya anak Garbus haja nang jaga warung.
Sambil minta ulahakan kupi wan nasi kuning Palui batakun wan anaknya Garbus kamana abahnya maka kadada.

"Abah ka pasar manukar gula, teh kupi wan galapung karna kahabisan parsadiaan gasan isuk," ujar anak Garbus.

Imbah tuntung makan nginum, Palui batakun sambil manjulung duit lambaran Rp. 20.000,- :

"Hitungakan barapa makan minumku," ujar Palui.

Anak Garbus imbah manarima lambaran duit Rp.20.000,- lalu utak-atik lawas banar mahitung, langsung manjulung angsulannya.

"Barapa?" ujar Palui.

"Rp. 2.000,- samunyaannya," jawab anak Garbus.

"Tapi kanapa maka angsulannya Rp. 2.000,- mustinya kalu habis Rp. 2.000,- maka angsulannya Rp. 18.000,-" ujar Palui.

"Naaahhhh..... sampiyan kada ingat bahwa dalam catatan abah ulun tatulis bon sampiyan Rp. 16.000,- lalu ditambah Rp.2.000,- jadi Rp.18.000,- nang habis," ujar anak Garbus.

Palui tapaksa manyambut angsulan Rp. 2.000,- sambil dalam hatinya manyumpah baucap : "Dasar watak Garbus bapadah parai tarus tapi nyatanya dicatat dalam buku bonnya," lalu Palui bulik.

Di tangah jalan Palui batamuan wan Garbus, lalu sambil basalaman Palui baucap : Bus tarimakasihlah, samunyaan hutang Rp.16.000,- sudah kupunahi wan anak ikam di warung ujar Palui. Garbus bingung....... bujur-bujur bingung karna marasa Palui kada biasa bahutang di warungnya samunyaan diparaiakannya.

Kalu mimang ada catatan itu sakadar gasan i-ingatan haja. Ini pasti kasalahan anakku di warung ujar Garbus dalam hati.

Takutan Picak

Takutan Picak

PALUI itu biarpun kada tuntung sakulahnya tapi katuju banar mambaca. Inya kada supan-supan walaupun mambacanya bajuju kaya kakanakan hanyar masuk sakulah. Tapi nang paling ikatujuinya adalah bacaan nang ada gambarnya. Surat kabar nang ditukarnya tahan haja jadi bahan bacaannya gasan ampat lima hari.

"Baiknya sampiyan manukar buku kumik haja abahnya ai," ujar bini Palui wayah malihat lakinya mambaca surat kabar tiap imbah sembahyang asyar.

"Buku kumik itu gasan kakanakan umanya ai karna isinya macam-macam kisah, tapi aku nang panting adalah kabar beritanya. Umpamanya, Adam Air tajun ciruk, Poso bakalahi tarus. Ini nah ada kabar panting... Indonesia ampih bautang wan IMF," ujar Palui pina saraba tahu bakisah barita.

"Abahnya kada usah bapikir nang jauh-jauh sampai ka utang Indonesia. Utang kita haja di warung acil Isul baluman kawa mamunahi. Kada usah lagi mambaca surat kabar, baiknya malihat tivi haja supaya mata jangan sakit," ujar bininya.

"Nah, ikam tabalik umanya ai, sabujurnya malihat tivi nang bisa marusak mata karna cahayanya mahamtam bigi mata kita," balas Palui kada hakun kalah.

"Aku kada bisa manang bapader wan sampiyan ini," ujar bininya mangakui wayah malihat Palui mamasang kacamata sambil mambali-balik halaman surat kabar.

Kada lawas imbah bininya masuk ka dalam rumah, kadangaran suara Palui kukuriak: "Umanya ... umanyaaa ... tulung, lakasi tulungiakan," ujar Palui kukuriak.

"Ada apa abahnya, ada apa abahnya," ujar bininya tagasak-gasak mamaraki Palui.

"Tulung bawa aku ka puskesmas, lakasi, mataku sabalah kanan kabur banar, kada kawa mambaca lagi. Bisa picak," ujarnya. "Kita langsung ka dukter mata haja karna puskesmas sudah tutup," ujar bininya langsung mambawa Palui ka dukter mata.

IMBAH tuntung bapariksa, bini Palui batakun kaanu dukter:
"Napa panyakit abahnya itu duk, barat banarkah atawa bujuran handak picakkah?" ujar bininya.

"Mata sidin itu nurmal haja kaduanya, karna sudah tuha wajar haja minus 300. Pak Palui itu bakacamatalah, bisalah aku malihat mancucukakan minusnya," ujar dukter batakun.

"Ini nah kacamatanya," ujar bini Palui manjulung.

Dukter manyambut dan sakaligus mamariksa kacamata kaur Palui nang sudah lima tahun dipakainya.

"Mata sidin itu nurmal haja bakacamata ini, tapi ...," ujar dukter.

"Tapi napa duk? Bujurkah mata kananku handak picak maka kada kawa mambaca lagi," ujar Palui handak tahu panyababnya.

"Mata sampiyan nurmal haja, cuma nang kada nurmal adalah kacamata ini karna sabalah kanan kadada kacanya, mungkin gugur atawa pacah," ujar dukter malihatakan. "Alhamdulillah, aku kada jadi picak," ujar Palui kasukaan sambil baurut dada

Ciri Madu Asli

Ciri Madu Asli



MAMARINA Palui nang di Tanjung baelang ka rumah Palui. Mamarinanya itu gawiannya batarnak lebah, sakaligus bajual madu. Kabujuran ka Banjar sidin mambawa babarapa botol kalu-kalu ada nang handak manukari.

"Ni nah cirinya Lui. Amun nang asli tu kada dihurung samut. Bila dibuat ka kulkas kada baku atawa mangantal. Rasanya manis asli, amun dicucul lawan korek api, banyala," ujar mamarina Palui manjalasakan. "Cuba lihati aku manyuculnya wan api," ujar sidin handak mambuktiakan kaaslian madu bawaan sidin. Sakalinya dasar bujur malindap wayah dicucul sidin.

"Dasar bujur asli. Ayu ja ulun umpat manukar sabotol lak ai," ujar Palui limbah malihat mamarinanya mantes manyucul wan korek.

"Pacang kada kasandangan bini ikam malam ini," ujar mamarinanya langsung maambilakan ka botol nang sudah ba-isi madu.

"Tapi ada lagi pabidaan madu asli lawan nang palsu nang balum pian sambat lak ai," ujar Palui lihum.

"Satahuku nang kusambat tadi sudah langkap banar, ada lagikah nang lain?" ujar mamarinanya handak tahu.

"Ada lagi lak ai. Kalu madu nang palsu itu cirinya katuju badadiaman haja, kada katahuan lih bini tuha alias basalingkuhan haja, kada dikawini," ujar Palui lihum.

Rupanya mamarina Palui paham arah panderan anak kamanakannya itu.

"Kalu ciri madu nang bujur-bujur asli pang kaya apa Lui?" ujar sidin.

"Nah kalu madu nang asli itu dasar bujuran dikawini alias asli bini anum. Dan kada kawa dibawa atawa dikumpulakan wan bini tuha, bisa dirungkau lih bini tuha....," ujar Palui tatawa.

"Bujur banar Lui ai, kada suah aku manamui bini tuha hakun dimadu, pasti dikacaknya mun dikumpulakan," ujar mamarina Palui mambujurakan pander palui

Batis Bahalus

Batis Bahalus

PALUI tamasuk urang nang kada tapi bisa batutukar ka pasar atawa ka warung, karna inya pangulir banar tawar-manawar. Tapi hakun kada hakun, ada jua pangalamannya tapaksa batutukar ka pasar wayah inya hanyar kawin, kada kawa manulak disuruh bininya. Biasanya nang bini pina baungah bila manyuruh Palui handak minta tukaran barang atawa makanan nang dikahandakinya.

Inya ingat banar wayah malam pamulaan kawin lawan bininya, tuhuk marayu, mambujuk supaya malam itu bujur-bujur malam pertama, malamnya badua nang cagar diganang saumur hidup.

Maklum kawin jaman dahulu, Palui tamasuk nang dikawinakan urangtuha. Kada sawat bapapatuhan langsung haja dijuduhakan lalu dikawinakan.

Mulanya Palui tamasuk bapikir jua handak manulak handak baidah tapi tapaksa. Imbah babarapa kali sawat maintipakan calun bininya ahirnya katuju haja karna cucuk lawan liur.

Imbah siangnya kawin batatai, malam pamulaan itu dianggapnya malam parjuangan, kaya apa marayu bininya supaya hakun bapandir. Tuhuk Palui mamulai mambuka pandir, kadada jua jawaban bininya, pina bakuling, pina baindah tarus. Bahanu diulahnya balulucu tapi kada jua menyahut, paling-paling inya lihum atawa takurihing sambil batukup guguling. Sambil bapikir Palui maingatakan napa pamati atawa barang nang disanangi bininya ini supaya inya kawa mambawai bapandir atawa bagaya kaya urang pangantin hanyar.

"Kita minggu kaina ka kuta malihat kabun binatang lawan taman Maskot, rami di sana banyak urang, banyak kakanakan bamamainan," ujar Palui marayu karna inya tahu bininya itu katuju lawan kakanakan. Tapi nang bini badiam haja kada manyahut. Lalu Palui baucap pulang:

"Kudangar ading dahulu katuju sapatu lawan sandal bata," ujar Palui.

"Sandal bata, ulun kada cucuk," sahut bininya bagamat.

"Lalu sandal apa," ujar Palui pulang.

"Itu tuh....sapatu atawa sandal nang kaya di nyanyian."

"Ooo....itu sandal kulit rusa. Batis ading nomor barapa," Palui batakun.

"Biasanya nomor 36," sahut bininya baungah.

Hari makin landung malam, Palui makin wani manggayai lawan manggalitiki bininya sampai taguringan, sampai mandi basah subuhnya.

Sampai hajatku ujar Palui dalam hati tapi ada kawajiban harus ka pasar manukarakan sandal kulit rusa nomor 36. Takuliling pasar kadada tatamu sandal kulit rusa, maka ditukarakannya sandal cap burung merak. Bulik ka rumah langsung dijulungnya lawan bininya, bininya katuju banar cucuk lawan kahandaknya.

"Nang panting kada mereknya ka-ai, nang panting pian bujur. bujur sayang lawan ulun," ujar bininya. "Cuba pang disadangi," ujar Palui sambil mambuka kutaknya.

"Nah....kada sadang kakai, maka nomornya bujur haja 36 tapi asa kaganalan, asa lunggar, kanapa kak Palui?"

"Kulihat batis ikam ding ai pina bahalus, pina bakulung Samalamnya sabalum kita bakumpul pina biasa haja," ujar Palui.

"Mungkin ulun katuhukan ma-arit, gawian pian jua pang malam tadi pina kada maingat.

Katuhukan ma-arit itulah maka sampai takulung-kulung batis, sampai kada cucuk lagi lawan nomor sandal," ujar bininya.

"Kalu kaya itu sama kita, batisku gin bahalus jua, rupanya kita sama-sama maarit," ujar Palui sambil lihum bagamat maragap bininya.

Ruku Dapat

Ruku Dapat

WAYAH ini Palui bilang sambung puting baruku. Nang dahulunya paling wayah baisukan sambil mangupi atawa paling baruku imbah tuntung makan. Tapi wayah ini bilang handak tiap manit muntungnya kada parnah kada bakukus. Mulai bangun guring baisukan, biar baluman mandi atawa bagusuk gigi, sampai handak guring kaina malamnya.

Bininya pusang jua malihat lakinya nang bilang kada baingat baruku, kada ingat lagi wan kasihatan. Sudah jua inya managur bagamat, tapi tatap haja kada diherani ulih Palui, dianggapnya angin lalu haja. Sampai ahirnya inya kada tahan lagi malihat kalakuan lakinya itu.

"Ini nah abahnya, lihati iklan nang ada di surat kabar ini nah. Sabarataan mamadahakan bahwa ruku dapat marusak kasihatan, dapat manyababkan kanker gangguan kahamilan wan janin," ujar bini Palui malihatakan iklan ruku nang ada di koran.

"Mananya umanya, mananya tulisannya?" ujar Palui maitihi.

"Ini nah, ganal banar tulisannya," ujar bininya manunjukakan.

"Oooo... tulisan nang ini kah?" ujar Palui unggut-unggut.

"Baca abahnya ai, baca bujur-bujur," ujar bininya pulang.

"Ruku dapat manyebabkan sakit jantung dan kanker.......," ujar Palui mambaca bagamat tulisan paringatan nang ada di iklan ruku.

"Nah abahnya, masih haja kah sampiyan baruku bahimat, nang manulis paringatan ini adalah bubuhan pamarintah, bubuhan urang-urang pintar, bubuhan departemen kasehatan," ujar bininya mahahing saking kamuarannya.

"Hadang hulu umanya... Di sini ditulis `Ruku DAPAT manyebabkan sakit jantung dan kanker.......' Nah kalu rukuku ini lain ruku DAPAT-an, tatapi aku manukar wan duitku saurang di warung acil Masnah." ujar Palui baulah alasan.

"Kacuali bila ada tulisannya `Ruku NUKAR manyababkan sakit jantung, kanker, serta gangguan kehamilan dan..." ujar Palui sambil malikit pulang ka ruku.

"Pian ini dasar pambabal abahnya ai, kada tapi cerdas, kada paham bunyi iklan peringatan supaya jangan ba-ruku, jangan marusak kasihatan saurang. kalu marusak kasihatan saurang tu sama haja badosa abahnya ai... badosa!" ujar bininya garigitan manumpalak Palui