Manfaat Susu

Manfaat Susu

BABARAPA hari ini bubuhan Palui wan kakawalannya banyak mamander sual makanan dan sual kasihatan. Nang paling katuju pasti haja si Tulamak karna inya paling harat bamamakan. "Wajar haja ikam katuju mamander sual makanan wan kasihatan karna kulihat awak ikam nang sudah lamak itu pina makin babangkak," sahut Garbus. "Maksudku mamander ini justru handak minta pandapat ikam Bus ai. Soalnya samalam kita wan Palui mamander kaya apa caranya supaya wayah tuha kaina kada panggaringan dan kada bapanyakitan, tenyata dijawabnya matilah wayah lagi anum ini. Jawaban Palui itu sama sakali kada manyamanakan talinga karna langsung urusan mati," ujar Tulamak pina gair. "Kada usah gair Mak ai, kalu samalam aku bakisah sual urusan nang sakit-sakit maka hari ini handak kubalas wan kisah nang manyanangakan ikam," ujar Palui langsung manjawab keluhan Tulamak. "Ayu kisahakan Lui," ujar Garbus umpat manggasak. "Aku babulik maingatakan bahwa hidup itu harus teratur dan tatap baingkut wan makanan ampat sihat lima sempurna. Di dalam lima sempurna itu antara lain ada susu. Susu itu adalah makanan nang bapitamin dan banyak banyar manfaatnya," ujar Palui. "Cuba lakasi sambat napa-napa manfaatnya Lui?" ujar Tulamak kada sabar manggasak Palui. "Dangarakan Mak, kalu handak sihat partama nginumlah susu secukupnya," ujar Palui. "Nang kadua napa Lui?" ujar Tulamak. "Nang kadua bila handak kulit barasih dan awak gagah langkar maka mandilah di kulam susu," ujar Palui. "Napa nang katiga Lui?" ujar Garbus. "Nang katiga bila awak handak motok husus gasan bibinian maka rawatlah kadua susunya," ucap Palui. "Hahahaaaa......... pina makin manyarempet," ujar Tulamak. "Napa nang ka-ampat Lui?" gasak Garbus. "Bila ikam handak nikmat maka pusutlah bagamat susunya," ujar Palui lihum pina supan sambil babisik katalinga Tulamak. "Hahahaaaa, akur, akuurrr...," ujar Tulamak.