BAUURUT

BIAR sudah tuha, sudah baanak babini Palui masih katuju main bal malawani bubuhan kakanakan. Bila urang nang hanyar patuh wan si Palui pasti hiran malihat kalakuannya itu. Tapi Palui dasar kada kukurang akal, bila ada nang manyambat atawa batakun, inya pasti baulah alasan bahwa inya handak mancari paluh banar haja. Tapi biarpun pangganalnya awak tapi Palui rancak jua kalah main bal wan bubuhan kakanakan itu. "Sabujurnya aku kada kalah tapi singhaja bakalah mahimungi kakanakan," ujar Palui. "Saumur-umur ikam balum biasa tadangar hakun bakalah, napa haja pasti handak manang," ujar Garbus. "Itu dahulu wayah lagi anum tapi wayahini sudah tuha, awak sudah ringkutan," ujar Palui. "Kalu ikam bujur-bujur ihlas bakalah pasti kada ngotot wayah barabut bal tadi," ujar Garbus. "Itu lain halnya Bus ai, aku mangotot itu karna parlu managakakan disipin main," ujar Palui baulah alasan. "Nahhh... dari ucapan ikam itu tabukti pulang bahwa ikam kada hakun bakalah," ujar Garbus mambulikakan pander. "Ayu ja sakali ini aku bujur-bujur kalah wan ikam, tapi ada parmintaanku Bus ai," ujar Palui. "Kalu ada parmintaan itu artinya ikam kada hakun bakalah," ujar Tulamak umpat manyala pander malawanakan Garbus. "Napa parmintaan ikam itu Lui?" ujar Garbus. "Aku minta tulung cariakan paurutan, pinggangku sakit banar wayah tarabah barabut bal tadi," ujar Palui. "Kalu handak baurut kada usah ka lain, si Tulamak ini nah harat banar urutannya," ujar Garbus. "Aku minta cariakan tukang urutnya jangan lalakian tapi bibinian," ujar Palui. "Kalu bibinian itu kada tukang urut tapi tukang pijat nang manyamani," ujar Tulamak. "Maksudku tukang urut atawa tukang pijat bibinian nang tuha haja biar kaya nini-nini," ujar Palui. "Ayu ja kucariakan, itu nah ada julak Minah," ujar Tulamak, lalu Palui langsung baurut. "Ulun minta diurut wan minyak lamak haja supaya licin kada sakit," ujar Palui sambil barabah batilantang. "Baurut ini sabaiknya minyak lamak dicampuri minyak kayu putih, atawa minyak gas atawa balsam supaya panas," ujar nini Minah sambil maurut parut hingga pinggang dan paha Palui. Wayah sidin maurut itu bahanu tangan sidin malancar takana barang rahasia Palui dalam salawar karna minyaknya licin banar. Palui bakirik-kirik pina galianan. "Rancaki Lak urutan sampiyan, supaya malancar kaya tadi," ujar Palui manyuruh. "Kanapa ikam katujukah tanganku nang malancar ini," ujar nini Minah maanyaki. "Nyaman Ni ai, nyaman... makanya tadi ulun minta minyak lamak haja karna kalu bacampur balsam pasti ulun cagar kasakitan ma-arit panasnya," ujar Palui. "Palui, Palui... tuha-tuha dipalar jua," ujar Garbus wan Tulamak nang mulai tadi mandangarakan dan maintipakan di higa lawang