sajak bapacaran

Ayahku Seorang Angkasawan!!

Bakipuh Kagatalan

Bakipuh Kagatalan

IMBAH panas manyalingit, kamariannya bakakajutan hujan saling darasan wan angin ribut. Maka kada ngalang-ngalang sampai parak tangah malam hujan tarus kada sing ampihan.

"Aku bingung banar umanya ai," ujar Palui mamanderi bininya wayah handak guringan.

"Bingung napa abahnya?" sahut bininya.

"Wayah ini musim napa? Apakah musim hujan atawa musim panas?" ujar Palui.

"Kenapa maka sampiyan batakun kaya itu? Di wadah kita cuma dua musim, bila kada musim hujan pasti musim panas," sahut nang bini.

"Ngalih ditangguh umanya ai, karna dipadahakan musim panas tarnyata masih ada haja hujannya atawa sebaliknya dipadahakan musim hujan sakalinya mambarangat panasnya," ujar Palui.

"Bujuran abahnya ai, wayah ini musim ngalih ditangguh," ujar bininya.

"Tapi kalu iwak atawa kodok itu nyaman banar ditangguhnya, bila musim hujan musim babanyu dan dingin pasti bahintaluan," ujar Palui manyirit bininya.

"Kalu sual itu abahnya ai kada usah dipikirakan. Wayah ini kada bagantung musim lagi bila handak bahintalu, gawi haja," ujar bininya paham sindiran Palui.

"Ayu ja kita guringan umanya ai. Ambilakan salimput aku kadinginan," ujar Palui manyuruh bininya.

"Nah balum napa-napa sudah kadinginan. Ini nah salimput kain panas," ujar bini Palui.

Imbah Palui basalimput karna manggigil kadinginan lalu inya bakipuh bagaru karna kagatalan.

"Napa abahnya maka pina bakipuh kadinginan? Makanya tadi kupadahakan kalu kadinginan kada parlu basalimput kaina awakku nang manyalimputinya, kaina kuragapi. Handak bahintaluan kalu?" ujar bininya pina marayu.

"Kada cuma dingin umanya ai, aku bakipuh kagatalan," sahut Palui makin rancak bagaru.

"Hau kanapa maka kagatalan?" ujar bininya sambil maitihi saimput nang dipakai Palui, lalu inya baucap `astagfirullah....." ujar bininya pina takajut.

"Napa maka baistigfar umanya?" ujar Palui.

"Ampun maaf, ampun maaf abahnya ai, aku tasalah julung kukira tadi kain panas nang kujamur tadi, eeeee......... sakalinya karung bakas manjamur banih," ujar bininya maminta maaf sambil pisit banar maragap Palui.

Sumber

Tasalah dangar

Tasalah dangar

LIMBAH tetuhaan ini tingkah laku Palui pina anih-anih atawa kadang-kadang manyulaya. Apalagi pandangar pina sudah bakurang. Bisa mun bapander lawan Palui jadi salah tanggap atawa kada nyambung. Maka panyangitannya pina batambah. Rancak basasangit kada karuan tampuh, sakalinya tasalah ja apa nang disarikakan.

Sakali ni bangat pada nang biasa. Palui sarik kada sakira lawan bininya. Padahal biasanya Palui sayang banar ka bini, kanapakah nangini pina lain sangitnya.

"Matan mulai bagandakan, batunangan sampai nikah kita sudah bajanji sahidup samati kalu?" ujar Palui mulai mamanderi bininya. "Aku tarima kasih banar ading bisa memaklumi gawianku dan panghasilanku. Biarpun ganting asal jangan pagat," ujar Palui.

"Maka itu ulun basyukur banar dapat sampiyan ini," ujar bini Palui pina marayu.

"Bujurlah ading basyukur, kada talapis wan nang lain?" ujar Palui manyindir.

"Hau, kanapa maka sampiyan baucap kaya itu? Pina kada parcaya wan kasatiaan ulun," ujar bininya.

"Baiknya kita baingat-ingat, maklum kita sama-sama sudah tuha dan anak-anak mulai bujangan," ujar Palui.

"Ulun ini bibinian abahnya ai, mulai dahulu sampai wayah ini manjaga banar hubungan kita. Lain kaya sampiyan pina rancak babengkeng, ada nang diunting kalu? Maklum lalakian itu tuha-tuha kaladi makin tuha makin lanji," ujar bininya mambalas.

"Jangan kaya itu umanya, asam janar, siapa marasa banar," sahut Palui.

"Ulun kada paham abahnya ai napa maksud panderan sampiyan pina curiga wan ulun," ujar bininya.

"Itu nah kakanakan jadi saksi bahwa di pahumaan saban hari imbah tuntung bagawi dan baistirahat ikam bapalukan. Ikam bapaluk wan siapa? Ayu lakasi mangaku," ujar Palui mulai sarik.

"Sabar abahnya, di mana sampiyan mandangar habar bahwa ulun saban hari di pahumaan bapalukan? Siapa nang balapur manuduh ulun macam-macam?" ujar bininya takajut dituduh bapalukan.

"Itu nah, anak kita saksinya," ujar Palui mengiyau anaknya.

"Ulun cinta karas wan sampiyan, sama sakali kada maksud handak wan lalakian lain apalagi sampai bapalukan," ujar bininya.

"Itu nah takuni anak kita si Pulai, inya bakisah bahwa ikam bila kauyuhan bagawi langsung baistirahat di lapau lalu bapalukan," ujar Palui.

"Bujurlah nak aku ada bapalukan? Wan siapa, pabila, di mana?" ujar bini Palui manakuni anaknya.

"Ulun sama sakali kada biasa bapander apalagi balapur bahwa mama bapalukan," ujar anaknya.

"Samalam dan minggu tadi ikam bakisah bahwa sampai basah handuk mama ikam karna bapalukan," ujar Palui manceleng-celeng.

"Ooo... samalam ulun bakisah, mama kauyuhan bagawi, lalu baistirahat karna sidin bapaluhan," ujar anaknya.

"Napa nak, napa nak?" ujar Palui mahimati.

"Mama bapaluhan karna hari panas banar," ujar anaknya.

"Ngalih mamanderi si talinga rinjing ini," ujar bini Palui gagarunum.

Rupanya marga pandangar pina bakurang, Palui tasalah dangar. Anaknya baucap bapaluhan didangarnya bapalukan. Lakas Palui minta maaf lawan bininya.

sumber

UTUH PALILAK DIKALUAR AKAN

Utuh Palilak ni sabujurnya urangnya pintar, buktinya pas inya sakulah SMP bujur kada balajar tapi ulangan dapat tarus manjawab walaupun kada 100% bujur, tu mun inya kada balajar, magitnya ai mun inya hakun balajar saku dapatnya barataan manjawab. Utuh Palilak ni tamasuk macal pang urangnya tulak sakulah kada mau jalan timbuk pasti mahantas jalan pahumaan di balakang sakulahan. Maka balakang sakulahan tu sudah di kandang kapala sakulah wan pagar kawat baduri tapi utuh palilak ni urangnya pintar inya basangu “tang” jadi di tataknya kawat baduri ti, sasarusup ha mambawa sapida BMX Olympic nang bakuncalak wan tanah, bujur haja pang mambawa tas tapi isinya lain buku tapi ba isi hampalam, asam, rambai mahanu ramania jua, inya tulak mahantas tu salajur manjatu asam atau hampalam, baju bujur rapi bamasuk kadalam tapi hibak gatah rambutan nang kaya balang sasirangan haja lagi di baju, dasi pina tainat talinya panjang banar, sapatu merk Kasogi tapi bagantungan haja di tas napa jalan balucak.

Wayah nintu ada guru hanyar di sakulahan Utuh Palilak pindahan matan Banjar, sidin ni urangnya disiplin banar mun mambari PR kada di gawi pacang dikaluar akan sidin pada kalas. Hari sanayan imbah upacara masukan ai bubuhan Utuh Palilak kadalam kalas, jam partama tu di isi palajaran bahasa inggris nang di lajari guru hanyar ti, babaya masuk langsung manyuruh mangumpul PR, labaram Utuh Palilak abut, napang inya kada ingat manggawi PR malam tadi ka asikan nuntun pilim “The A Team” lalu dikaluar akan guru ai inya, bilut muha Utuh Palilak kaluar pada kalas.

Saminggu kamudian dikaluar akan pulang Utuh Palilak pada kalas napang kada ingat pulang manggawi PR, tapi wayahni inya bakawan am ada Utuh Tungkung, Amat Habuk wan Udin Sipit. Tapi anihnya bubuhannya malah kurihingan imbah di kaluar akan, guru ti am bamamai kasasarikan. Minggu dudinya sakalinya Utuh Palilak kada manggawi PR pulang, tapi nang maulah mucai bangat sakali ni sabarataan lalakiannya kada manggawi PR, imbah di suruh kaluar basurak buhannya kasukaan, napang ada hamuk banar gurunya sampai ma adu ka kapala sakulah.

Sakalinya gara-garanya guru ti kada tahu pada tiap hari sanayan tu hari pasar di kampung Utuh Palilak, rupanya Utuh Palilak ni bakisah pas dikaluar tu inya ka pasar rami bangat jar manuntun tukang ubat ba ungkai ular bakapala dua, imbah tu inya bakisah kawadah Utuh Tungkung, Amat Habuk wan Udin Sipit napang ada buhannya pada manuruti jua kada manggawi PR, rupanya mandangar buhan lakiannya nang lain lalu manuruti ai sabarataan kada manggawi PR.

Imbah kajadian nintu guru ti kada suah lagi mambari PR gasan dikumpul hari sanayan.

KALAMAHAN UTUH PALILAK

Utuh Palilak ni urangnya sandu bangat, tapi bujur sandu inya baisian parinsip wan pawanian, asal “Mambila Bujur wan Banar” haja kada pacang bamunduran inya ujar urang bahari tu “manuntung”. Utuh palilak ni tamasuk nang bauntung bangat kawa kuliah jua kaya urang, walau saraba pas-pasan tatap inya kawa kuliah, parinsipnya asal ada nang dimakan haja biar sakali ha sahari sudah cukup. Utuh Palilak ni bisa bangat jua bakakawanan jadi kada hiran mun banyak bangat inya baisian kawan, maka Utuh Palilak ni satia kawan bangat jua urangnya. Biar pina sandu tapi mun sudah bapandiran rami bangat tupang jua, tapi hati-hati ha jangan maulah inya sarik ca ngalih bangat mambisai mun inya hamuk, jarnya tampar pacang malapau tu pang, pamulaan kuliah di Banjar haja babaya turun di pal anam sudah bakuntau wan bubuhan ujik.

Utuh Palilak ni tamasuk urang nang disagani bangat di kampus wadah inya kuliah, amun urusan bakuntau lambat mambawai asal kawan haja dibilanya tu pang. Wan dusin kaya itu jua ada dusin nang dihurmatinya ada jua nang bamusuh bangat jua maka jalas kada lulus inya tatap kada pacang ba alah wan dusin nang babida parinsip ti, kada hiran Utuh Palilak ni tamasuk “mapala” jua di kampus alias mahasiswa paling lama lulus. Lagi jaman raramiannya urang bademo Utuh Palilak ni kada katinggalan jua umpat saban hari, jar urang wayah nintu jadi “aktivis” sasuai bangat wan Utuh Palilak nang baisian “awak tipis”. Gara-gara karancakan bademo sampai jua tabuat si Utuh Palilak ni di “Daptar Pancarian Urang” bubuhan intel, untung kada lawas imbah nintu “Kai Harto” ampih jadi Parisidin caka tida saku Utuh Palilak ni tamasuk “Daptar Urang Hilang” jua.

Nah Utuh Palilak ni bujur wani urangnya sabujurnya ada baisian kalamahan, mun masalah bawawanian di akui haja pang sudah, tapi mun masalah bibinian “uhu” bangat Utuh Palilak naya. Utuh Palilak ni Urangnya bungas kada, sugih kada, alim kada jua tagal katurunan payu banarai. Sabujurnya inya bisa haja pang jua malirik bibinian, tapi saliranya tinggi bangat “Kada Sasuai wan Kalu’ung” jar urang bahari tu. Bibinian nang dihandakinya tu alim bangat urangnya, ngarannya Diang Cahaya Bintang mun baparaungan lalakian haja batunduk, pakaian liput tatutup saikungan bida bangat wan Utuh Palilak rambut panjang kaya “Arul Metal” salawar lipis rabit ha pulang lintuhutnya.

Sakali suah Utuh Palilak ni bahamuk dikampus gara-gara kawannya di tampiling urang, napang ada di carinya bahimat urang ti sampai kadalam-dalam kampus, abut urang sakampusan kada nang waninya manyabari, napa mun mambawa “Parang Pacat Gantung” ganggaman kainya bahari, ada nang cangang haja langsung dihinggurnya, nang badudukan di suruhnya bajauhan, kanapa pas nintu ada jua si Diang Cahaya Bintang disitu bibinian nang di handaki Utuh Palilak, lalu malidup-lidup ai dada Utuh Palilak nang kaya “gandarang handak perang” maliat bibinian tadi, asa maliat “Bidadari Turun Matan Kahayangan” jar urang bahari, lalu mamasuk akan parang ti ai ka kumpangnya.

Imbah tu “tanpa panghurmatan balik kanan bubar jalan” ai lagi…..

UTUH PALILAK BABAJU PRAMUKA

Utuh Palilak ni lagi sakulah SMA katuju banar umpat Pramuka Saka Bhayangkari, inya kahandakan banar jadi tantara atawa pulisi, makanya amun babaju paramuka tu lalu pina gagah ha balinggang bajalan, apalagi banyak bgt titipakan di bajunya tu mulai pangkat sampai gambar napa-napakah.

Di subalah rumah Utuh Palilak ada bansaw ampun Julak Lambit, wadah urang maulah kayu, rami bangat saban hari ada nang ma Atari kayu ada nang bamutur trak ada jua nang bamutur pikap, ujar habar nang ampun bansaw sudah bakait wan bubuhan aparat sakira aman bajual wan ma atar kayu.

Wayah nintu Utuh Palilak hanyar bulik latihan paramuka, sabalum naik karumah inya duduk di muhara bansaw Julak Lambit, disitu ada babangkuan naung banar di bawah puhun jambu jadi nyaman banar baduduk bila kamarian hari panas. Paharatan si Utuh Palilak duduk kada lawas datang mutur trak mambawa kayu, babaya lalu di muka Utuh Palilak lalu ba ulur ha tangan supir ma unjuk duit 50ribuan kawadah Utuh Palilak, lakas ai Utuh Palilak manyambut imbah itu badadas ai inya naik ka rumah kada sing bunyian.

Isuknya pas kamarian duduk pulang Utuh Palilak di babangkuan ti, sakalinya disitu ada Pa Yono kumandan pulisi nang bakantur di polsek.

“ Bah ini pang sakalinya kumandan Barimob nang dipadah akan supir trak samalam, kalah 1-0 aku wan ikam Tuh ai” ujar Pa Yono

“Mun di bari urang duit tu razaki Pa ai, pantang di tulak” ujar Utuh Palilak pupura kada tahu padahal paham haja wan maksud Pa Yono.

Sakalinya gara-gara Utuh Palilak babaju paramuka pakai baret samalam inya di sangka supir trak si Adul Kaur, pulisi barimob, cucuk ai inya manjulungi duit.

UTUH PALILAK TULAK KA JAKARTA (kisah urang alai)

Utuh Palilak si Urang Alai hanyar datang di jakarta...pahantian mahadang di ambili kamanakannya si Diang Angas, Utuh Palilak duduk di Ruang Kadatangan Bandara Soekarno Hatta, di tataiannya duduk ada 4 ikung urang, nang saikung matan Jawa, saikungnya Matan Batak, saikungnya urang Papua, nang pa ampihan urang Minang...
Imbah itu bubuhannya bapapatuhan sambil manyambat ngaran
Urang Jawa : Gajah Noto (pina mandagum manyambat)
Urang Batak : Sinaga (nyaring wan hahangkuinya ba ucap)
Urang Papua : Akumbuaya (sambil takujihing putih gigi kaliatan)
Urang Minang : Sikumbang (tagas wan singkat)
Utuh Palilak : (pina bingung mandangar urang harat-harat barataan ngaran, imbah bapikir satumat lalu baucap dengan tagas) Ular Sambur.

KISAH BUHAYA WAN URANG BA UNJUN (kisah bahasa alai)

Utuh Palilak tulak ba unjun ka baruh, hari panas manggarantang Utuh Palilak mamilih bacugut di bawah puhun rambai, paharatan asik ba unjun kanapa Utuh Palilak taitihi mudil kayu barandam timbul di hadapan, imbah di itihinya bahimat sakalinya Buhaya sing ganalan, manggatar Utuh Palilak bagimit bakayakat naik ka puhun rambai maka di tangan unjun kada balapasan, sambil bakayakat naik mata Utuh Palilak kada sing lapasan maitihi Buhaya, si Buhaya hanyar tahu pada ada mangsa di atas puhun lalu baistilah ai baparak ka bawah puhun mahadang ..

Si Utuh Palilak nang katatakutanan kd maitihi lagi pada tajajak batang japuk lalu manggarabau ai gugur kasungai...BYYUUURR...bagalumbang baruh kakacipak Utuh Palilak di banyu bakunyung maka di tangan kada balapasan unjun, si Buhaya nang mahadang di bawah takajut banar jua lalu bukah kada maingat lagi, dalam hati si Buhaya manggarunum "bungul bgt aku taparaki urang jagau wani manajuni ka Buhaya"

Imbah itu si Buhaya lalu bapasan ka anak cucunya bila batamuan urang mambawa unjun jangan diparaki karana urang mambawa unjun tu wani manajuni ka Buhaya ....

CATATAN :
"sampai wayahini kada suah tadangar urang baunjun disambar Buhaya"

UTUH PALILAK MAMBAIKI TIPI (kisah urang alai)

Awal tahun 90-an di kampung Utuh Palilak hanyar masuk siaran tipi, itu gin harus ba antina tinggi, paling kada sama wan puhun nyiur maka am hanyar ada gambarnya, tu gin kada barasih gambarnya mun handak barasih batambah “bustar” maka am. Buhan urang kampung Utuh Palilak rata-rata mamasang antina di atas puhun ganal, ada nang mamasang di atas puhun binjai, puhun kasturi ada jua nang mamasang di atas puhun kariwaya. Di kampung Utuh Palilak ni ada haja pang nang mamasang parabola tapi nang kawa manukar kaya Haji Udin, Haji Burhan wan Haji-haji nang lainnya.

Jaman nintu lagi raramiannya SDSB, nah kabulujuran si Julak Umbai kana buntut ampat angka, lalu batutukar bahimat ai sidin, mulai nukar alpa sampai tipi. Imbah baisi tipi ni sidin kada bakaluaran lagi pada rumah, asik manuntun pilim mahabrata di TPI nang hanyar siaran,
Pas malamnya hujan wan angin ribut di kampung Utuh Palilak. Baisukannya babaya bangun guring langsung manyalai ka tipi si Julak Umbai mahadang pilim mahabrata, tapi sakalinya acaranya flora dan fauna kisah iwak, dihadangi sidin sampai tanghari kada bahabisan acara flora dan fauna, muyak sidin duduk ka palatar, kada lawas malibas Utuh Palilak di muka rumah sidin.

“ui tuh singgah pang satumat pariksa akan tipiku” ujar Julak Umbai

“kanapa tipi pian Julak” ujar Utuh Palilak sambil basinggah ka halaman Julak Umbai

“kada tahu jua kam tuh ai, matan baisukan ti tipiku aur acara flora dan fauna ha tarus, mahanu Iwak puyau lalu imbahnya iwak buradis, mangki, saluang sampai buntal ada jua, maka kada basuara ha pulang tipinya” ujar Julak Umbai

imbah tu di pariksa akan utuh palilak ai tipi sidin, di gutak-gutak volumenya wan picikan-picikannya, di gandah-gandah jua tatap gambar iwak ha galiuran wan kada basuara.

“pian dimana Julak ma andak antina” jar Utuh Palilak

“di balakang rumah di atas puhun Lua Tuh ai” ujar Julak Umbai

Lalu kabalakang rumah ai Utuh Palilak mamariksa antinanya. Huhulingak Utuh Palilak maitihi ka atas puhun Lua kada taliat jua antina tipinya, imbahtu disasarnya tali antina. Kada lawas mandarau Utuh Palilak tatawa.

“ha ha ha … ui Julak Umbai ulun tahu ai marganya tipi pian kaluar gambar iwak tarus, sakalinya antinanya tagugur ka sungai tinggalam dalam banyu, makanya gambar iwak haja tarus nang kaliatan” ujar Utuh Palilak.

Sakalinya gara-gara hujan labat wan angin ribut malam tadi, antina tipi Julak Umbai nang ba andak di atas puhun Lua tagugur kasungai, puhun Lua nya pas pang dipinggir sungai Batang Alai.

*sumber

Japai Bumbunannya

Japai Bumbunannya

HIDUP balaki babini itu harus saling parcaya," ujar Tulamak. Aku sapandapat banar wan ikam Mak ai, tapi parcaya-mamparcayai itu harus didahului cintai-mancintai, sahut Garbus.

"Makanya kalu mamilih bini harus bujur-bujur dipikirakan supaya kada salah pilih. Sual langkar atawa kada langar itu tagantung masing-masing. Ibarat paribahasa anak muda wayah ini `kalu cinta sudah melekat maka tahi gigi serasa suklat," ujar Tulamak.

"Karena sasuai wan pandapat ikam itulah maka aku talambat babini. Jadi bukan karna talalu pamilih banar tapi karna mancari nang cucuk," ujar Garbus.

"Sama haja Bus ai, aku talambat jua sampai dihuhulut Palui `barangnya jangan buruk dan lunyak taduduki' haja," ujar Tulamak nang ngalih mancari bini karna awaknya kalamakan.

"Sama haja Mak ai, aku sawat jua dihuhulut Palui, tapi huhulutannya itu kuanggap durungan supaya aku jangan manunda-nunda lagi kimpoi," ujar Garbus.

"Aku ingat banar nasihat Palui pada malam pamulaan imbah nikah itu bujur-bujur kugawi," ujar Tulamak tatawa.

"Nasihat nang mana Mak? Palui itu mimang banyak banasihat, ada nang bujur tapi banyak jua nang mamuari," ujar Garbus.

"Nah itu Paluinya datang, ayu ikam takuni langung. Sama atawa kada sama nasihatnya wayah kita kimpoi tadi," ujar Tulamak.

"Aku tarima kasih Lui ai nasihat ikam samalam. Imbah Nikah, malam pamulaan itu ikam nasihati supaya jangan rancak ka balakang babasuh karna katahuan urang bahwa ikam habis main kuntau wan bini," ujar Garbus bakisah. "Eee... sakalinya katahuan urang jua karna handuk mandiku karas kaya kulit kambing sebab imbah satiap tuntung kuntau langsung dilap wan handuk," ujar Garbus tatawa.

"Kalu Tulamak lain lagi nasihatku Bus ai. Awaknya lamak dan bininya lamak, untuk jadi kaluarga sakinah mawadah maka nasihatku malam pamulaan itu wayah masukan ka kalambu sabalum kuntau wan bini, japai dahulu bumbunannya," ujar Palui.

"Kanapa maka dijapai bumbunannya, apakah supaya kuat, tahan lawas atawa bisa balenggang-lengguk?" ujar Garbus handak manimru.

"Ikam gawilah Lui?" ujar Palui .

"Hi'ih, bahimat aku manggawinya dengan harapan bujur-bujur bisa menikmati malam partama. Eee... sakalinya nasihat Palui itu pas luput, aku kada jadi main kuntau. Kujapai bumbunan biniku, sakalinya pina baluang kaya bumbunan kakanakan. Maka tapaksa kada jadi basuka ria wan bini, tapaksa taubah jadi baurutan dan kerokan karna biniku itu masuk angin kalawasan mahadangi," ujar Tulamak lihum.

"Hahaha... hahaaa..., kukira tadi bujur-bujur nasihat supaya sakinah mawadah, sakalinya manunda kenikmatan malam partama," ujar Garbus mahuhulut Tulamak.

Kagancangan

Kagancangan

BAISUKAN Palui sudah mendatangi rumah Tulamak nang kada jauh matan rumahnya. Kada hiran, Tulamak takajut banar karna kada biasanya Palui kaluar baisukan apalagi ini mengiau-ngiau sambil manggandah lawang. Biasanya, Palui imbah basubuh mamadar dahulu sampai siang.

Tulamak nang masih ulir-ulir di tilam takajut-kajut. Kada bisanya Palui pina bahalulung banar.

"Napa ikam Lui, basungsungan hari manggandah rumahku?" ujar Tulamak.

"Aku minta ikam dangi'i baurut. Aku sakit pinggang, dimanalah wadah urang baurut?" ujar Palui sambil takuringis manahan sakit.

"Ooo nang kaya itukah. Kalau itu kita ka rumah abah Garbus haja. Sidin, habarnya paurutan jua. Banyak nang batatamba ka wadah sidin."

"Ayu ai mun nang kaya itu. Pakai sapidaku hajalah. Ikam nang manggonceng soalnya pinggangku rasa pagat. Bejalan haja aku baingkut dinding," ujar palui.

Di jalan, Kaduanya batamuan lawan Garbus. "Nang apa kisahnya pagi-pagi handak bailang ka rumahku," ujar Garbus hiran.

"Ini pang nah mambawa kawan kita sakit pinggang. Handak baurut lawan abah ikam jar," ujar Tulamak mengisahakan.

"Mun kaya itu lakasi, tampulu sidin ada di rumah. Amun talambat, kaina sidin diambili urang," ujar Garbus. Lalu ai bubuhannya bahancap tuju ka rumah Garbus.

"Buka baju dahulu lalu barabah biar kupariksai dahulu uratnya," ujar Abah Garbus memadahi Palui.

Hanyar dijapai, sedikit Palui sudah kipuh kasakitan. "Aduh sakit banar..aduh aduh!!" ujar Palui takuringis.

"Ikam ni kada apa-apa, cuma masuk angin haja. Lawan kada bisa bagimit," ujar abah Garbus mamadahi.

"Kada bisa bagimit kaya apa bah?" ujar Palui kada paham.

"Kagancangan manumbuk ni. Urang bagimit haja menumbuknya," ujar abah Garbus sambil manyirit ka Tulamak.

Tulamak nang baduduk di pinggir kalikikan mandangarakan. Rupanya Palui dipadahakan kaya itu rasa supan jua. Inya langsung mangaramputakan pemandiran abah Garbus. "Kada, ulun kada parnah gancang. Bagamat haja, kada gancang ulun menumbuk," ujar Palui bakulim mati.

"Kanapa garang ikam pina bakulim banar, aku tadi bagayaan haja. Maksudku, ikam tuh nah jangan talalu gancang menumbuk padi. Atau bisa dasar bujuran gancang nih manumbuk," ujar abah Garbus menggayai Palui.

Habang hirang muha Palui manahan supan. Sekalinya, sidin itu bagayaan haja. Tapi rahasianya sudah talanjur tabungkar katahuan ulih urang.

Ditatak Disambung

Ditatak Disambung

WAYAH dahulu ngalih gawian, Palui sawat jua balajar manjahit wan mamarinanya. Karna kacacangkalannya ahirnya inya bisa mambuka kios dan dibarinya ngaran `Penjahit Palui'. Kakawalannya banyak nang hiri wan Palui hingga ada nang nekad marubah huruf pada tulisan ngaran kiosnya itu dari panjahit menjadi `panjahat'. Biar diganggu dan dihiri'i, Palui sama sekali kada marasa dihina dan inya tatap haja manarusakan gawiannya itu.

"Gawian jadi tukang jahit ini sabujurnya gawian bungul," ujar Palui bakisah wan kakawalannya.

"Kanapa maka dipadahakan gawian bungul Lui?" ujar Garbus.

"Cuba ikam pikirakan kain baik, kain hanyar, kain haraganya larang lalu ditatak-takak, digunting-gunting lalu disambung-sambung pulang jadi salawar, jadi baju. Kada gawian bungullah kain baik dirusak lalu dijahit, dibaiki pulang?" ujar Palui.

"Karna marusak nang baik, lalu mambaiki pulang itulah ikam mangacak upahnya," ujar Tulamak paham.

"Ada pangalamanku nang mamuyaki salawas jadi tukang jahit ini," ujar Palui.

"Pangalaman napa Lui?" ujar Tulamak.

"Wayah itu kamanakan Tuhabuk handak mambari hadiah salawar wan mamarinanya. Ukurannya maniru ukuran salawar Tuhabuk karena inya mamadahakan cucuk haja. Lalu langsung kugawi karna Tuhabuk itu urang baik dan kada pernah manawar upahnya, barapa haja pasti dibayarnya," ujar Palui.

"Barapa hari hanyar tuntung Lui?" ujar Garbus.

"Kada balanggar hari Bus ai, gawian kilat, ampat jam tuntung lalu langsung diambil dan dibawa bulik ulih Tuhabuk disampaiakannya ka mamarinanya," ujar Palui.

"Pas dan cucuklah ukurannya?" ujar Tulamak.

"Eee... sakalinya Tuhabuk datang lagi minta tatakakan kurang labih satabah, maka kutataklah satabah. Imbah tuntung lalu diambil pulang ulih Tuhabuk dan dijulungnya ka mamarinanya. Kada lawas kamariannya Tuhabuk datang pulang, minta sambungakan lagi satabah nang bakas ditatak tadi," ujar Palui.

"Wah, dasar bujur-bujur pangalaman mamuyaki. Minta tatakakan lalu ditatak, imbah ditatak minta sambungakan pulang," ujar Garbus.

"Tapi... tapi manyambungnya ulih Tuhabuk dipadahakan di subalah kanan haja, sedangkan kain salawar batis kirinya biar haja jangan disambung," ujar Palui mulai lihum karna paham maksud Tuhabuk.

"Hahaha... hahaaaaa... aku paham, aku paham jua," ujar Garbus wan Tulamak taimbai manjawab dan taimbai mangalakak tatawaan karna inya tahu bahwa mamarina Tuhabuk itu batisnya handap sabalah.

Ayahku..

Ayahku...

Hari pertama ku ke sekulah

awal pagi aku digerak

untuk mandi, ayah menghambin ku dari ambin ka parit

ayah me atar ku ke sekulah dengan moto AAJ nya

Aku di balakang mengikupnya kuat-kuat

jar ayah ku " kuat-kuat bepingkut, kina tekipai.."

Di luar tingkap ia mundar-mandir

sesekali meniring ku yang di dalam bilik darjah

Aku menunjuk ka kawanan..itulah ayahku...

yang hensem itu..matanya redup...hidungnya mancung...

Aku terkurihing..dalam hatiku dengan bangganya handek madahkan ka ayah

...anak ayah ni kade nangis..walaupun banyak kakanakkan lain betangisan...

Patang-patang aku main di halaman rumah

beladangan..bukahan...

bila terjerungkup, berdarah lantuhut..

aku nangis mendapatkan ayah..

Ayah meniring ka luka ku

Jar nya " oh..kade apa-apa..kaluar darah haja..mun kaluar nasi hanyar bangat..."

Ia menyukat..jangkal demi jangkal..

dari luka ku sampai ka parot ku...

"3 jangkal..jauh dari parot...kade bawa ka mati..."

kain sukinnya di kuyak untuk mambalut luka ku..

mun aku gering, ayah yambat naran haja kah gering..

berapa kapoi gering ku...

Dijapainya awak ku..

"bah..segantang gering to..hangatnya..luyot tangan ayahmu.."

Iya gin beperagah menakunne ku

"handek makan apa?"

walaupun sabanarnya iya dah taho jawapan ku...

ayah....kau lah kekasih ku...

-nia

p/s : Al-Fatihah buat AyahKu

Banyu Mata Umak

• Banyu Mata Umak
• Umak sudah tuha
• Kaaraian babanyuan mata Umak
• Ari pamugaan aku kasakolah mananggis Umak
• Kuhabari dapat No 1 takurihing balinang banyu mata Umak
• Ku salami imbah aku nikah bakaca kaca mata Umak
• Di habari Umak dapat cucu Alhamdulillah ujer.. mananggis Umak
• Umak sudah tuha
• Sadih, marista babanyuanai jua mata Umak
• Aku garing, ading garing marista Umak babanyuan mata maniring
• Sarik, bamamai managur barubuian banyu mata Umak
• Ampun ampun Umak
• Bapa maninggal mangalir likat banyu mata Umak
• Tahu ai kami, karindangan Umak karunungan banyu di mata
• Karanaian... di ilangi maragap manitik banyu mata Umak
• Napa habar ikam ujernya
• Kada tahan aku mananggis ha jua
• Diilangi amun masih lagi baUmak
• Kada tahan aku manganang nasib Umak
• Tahambur haja banyu mata
• Umak ku sayang sudah tuha
• mairah98 0501100800h

Kahilangan Bini

Kahilangan Bini

HARI Ahad samalam Palui wan bininya tulakan ka Banjar karna disaru ulih julaknya nang bapangantenan. Kamariannya wayah handak bulik, sawat haja bininya mambawai basinggah ka pasar.

"Ui abahnya, ulun handak bakunjang ka sana dahulu, balalihat ka tuku kain wan tuku amas. Pian balalihat haja ka tuku baju, kaina kita batamuan di sini sajam lagi," ujar bininya.

Imbah kira-kira sa-jam, Palui babulik ka wadah inya bajanji wan bininya tadi. Tapi lawas Palui mahadang parak batangah jam, bininya kada saling cangulan. Pusang jua inya mahadang lalu dicarinya bininya ka wadah urang nang bajualan kain, tapi kada tatamu jua. Lalu inya bukah ka wadah bubuhan nang bajual amas, tatap haja kada talihat jua. Tapaksa Palui babulik pulang.

"Dasar bibinian, amun sudah ka pasar balilihat atau baulanja bisa kada ingat lagi wan laki nang uyuh mahadangi," ujar Palui bamamai.

Karna lapah badiri Palui mancari wadah baduduk. Dilihatnya ada kursi panjang lalu inya baduduk di situ. Di subalahnya ada bibinian langkar nang umpat jua baduduk. Tuhuk Palui mamikirkan nangkaya apa mancari bininya itu supaya lakas bulikan. Kada lawas inya dapat akal...

"Ding, ui ading nang langkar, nang lamak mungkal, nang babaju habang, aku handak mainta tulung," ujar Palui mangiyau bibinian nang duduk di subalahnya.

"Ada napa ka, handak mainta tulung napa sampiyan?" ujar bibinian itu.

"Hakun lah ading baparak satumat wan aku. Hakun lah ading mamanderi aku?" ujar Palui.

"Hau kanapa maka minta ulun baparak wan bapander wan sampiyan?" ujar bibinian tadi kada paham.

"Ading jangan salah paham wan jangan takutan, karna aku kada bamaksud jahat atau handak marayu ading. Sabujurnya aku lagi kahilangan bini, karna tadi tapisah wan inya padahal sudah bajanji batamuan di wadah ini. Tapi sudah labih satangah jam biniku kada cangul jua," ujar Palui.

"Lalu napa hubungannya wan bapander wan ulun?" ujar bibinian itu pulang.

"Anu, biniku itu urangnya panimburuan banar, kada kawa malihat aku baparak wan bibinian satumat haja inya pasti manyasah sambil sarik-sarik," ujar Palui. Balum sampat lawas bapanderan, bini Palui mancangul sambil manyayarik.

"Abaahnyaaaaaa!" ujar bini Palui kukuciak sambil marunca-runca bahahantak batis karna camburu malihat Palui bapanderan wan bibinian.

"Nah bujur kalu ding, satumat haja aku mamanderi ikam biniku sudah cangul. Saandainya aku bahinip haja, bisa batangah jam pulang aku mahadang," ujar Palui batarimakasih wan bibinian tadi lalu bukah mandatangi bininya handak mambawai bulikan.

Kapalanya

Kapalanya

WAYAH bakawinan di wadah Pambakal, bubuhan Palui disiwa sidin main kuntaw gasan karasminan urang banyak. Sidin kada hakun manyiwa orkes atawa nang lain sabab sidin katuju lawan karasminan urang bahari. Palui sadikit haja bisa main kuntawnya, tapi amun urusan mambabun alias manggandang babun inya paling harat. Tulamak kabagian ma agong wan Garbus jadi tukang tiup sarunainya. Sadang nang bakuntaw kada lain pada bubuhan julak Ijul, Tukacil wan julak Duraba.

Rami banar urang datangan kasaruan pambakal, ada jua limbah makanan langsung handak malihat acara bakuntaw.

"Kaya apa Lui, sudah kancangkah babun kita?" ujar julak Duraba managur Palui nang basiap main babun.

"Siap banar julak ai. Umai pian hari ini hibak lawan utas mautas, bahimat banar kah mangaluarakan jurus-manjurus," ujar Palui maambung.

"Urang rami malihat Lui ai, makanya hari ini aku kaluarakan bunganya sampai kabuahnya," ujar julak Duraba.

"Amun kaya itu aku harus kancang jua maniup sarunai nah,' ujar Garbus himung malihat urang rami manuntun.

"Ayu kita gasak Bus! gasak Mak!" ujar palui kancang mamukul babun. Basamangat banar Palui wan kakawalannya mangiringi bubuhan julak duraba bakuntaw. Amun sudah kaya itu kada ingat burit kapala lagi Palui bahimat banar mambabun. Kada lawas urang rami kukuciakan.

"Kapalanya-kapalanya Lui!" ujar panuntun kuciakan. Mandangar panuntun mambari samangat, Palui magin bahimat mambabun sambil manggoyang kapalanya kaya urang bajikir. Panuntun tambah kukuciakan. "Kapalanya-kapalnya Lui!" ujar panuntun kukuciak sambil tatawaan. Tambah samangat Palui maigal kapalanya. nang anihnya bubuhan panuntun babinian manutup kamata. Tulamak wan garbus langsung maitihi ka Palui.

"Lui, kapala ikam kaluar,' ujar Tulamak babisik.

"Kapalaku kanapa? Bagus haja kalu igalanku," ujar Palui magin kancang mambabun sambil manggoyang kapalanya.

"Kapala burung Lui, kapala burung!" Garbus umpat mambisiki.

Kapala napa!? ujar Palui sambil baigal.

"Kapala burung ikam nang dibawah!" ujar Garbus banyaring. Takajut ai Palui mandangar dipadahi kapala burung. Langsung inya manjinguk ka bawah.

"Sial, aku tapakai salawar nang rabit , biniku kada ingat manjahitakan, pantas haja kapala burungku handak takaluar," ujar Palui kasupanan langsung bukah sambil manutupi salawarnya nang rabit lawan babun. Tatawaan urang sabarataan.

Manjilat Liur

Manjilat Liur

KAUYUHAN bagadang wayah bakimah malam tahun baru tadi, bubuhannya samunyaan bangun malandau. Imbah bangun bapuncilak mata lalu ada jua nang bahanyut pulang mamadar guringnya.

"Kalu guring jangan kakarimut muntung Mak ai," ujar Garbus.

"Aku kada singhaja Bus ai, muntungku bakarimut saurangan," sahut Tulamak.

"Kuparhatiakan kada karna bakarimut saurangan, tapi ilat ikam pina jilur-jilur manjilat liur," ujar Garbus.

"Itu artinya sambil guringpun aku dapat razaki," ujar Tulamak badalih baulah alasan.

"Aku biar diupah sapuluh ribu kada hakun dapat razaki liur basi itu," ujar Garbus.

"Kanapa maka bubuhan ikam ini basusubuhan sudah bahual sual razaki," ujar Palui batakun.

"Si Garbus mamadahakan aku manjilat liur basi. Biarpun liur basi tapi itu liur basiku jua," ujar Tulamak.

"Liur basi itu rigat Mak ai, makanya biarpun dianggap razaki jangan dijilat," ujar Palui.

"Aku kada basinghaja manjilatnya karna akupun tahu bahwa liur nang kaluar matan muntung itu rigat tapi otomatis tajilat saurangan," ujar Tulamak.

"Singhaja atawa kada singhaja tapi kalihatan ilat ikam jilur-jilur," ujar Garbus.

"Kita kada usah mahualakan liur basi Bus ai. Liur basi itu asalnya matan liur barasih jua di dalam muntung kita. Seandainya muntung kita kada baliur pasti kada nyaman bamamakan. Cuntuhnya sahari haja ikam kada baruku, pasti kada nyaman liur. Liur itu adalah cairan nang baguna gasan campuran makanan dalam muntung kita selanjutnya gasan memperlacar jalannya makanan ka dalam parut besar," ujar Palui.

"Aku maakui ucapan Palui itu karna inya wayah sakulah dahulu tamasuk pintar palajaran ilmu hayat, ilmu manusia hidup," ujar Garbus mamuji.

"Jadi liur itu adalah rahmat Tuhan dan milik tiap urang makanya janganlah dibuang sembarangan, umpamanya janganlah ricus-ricus baludah ka sembarang tempat. Biarpun liur itu milik kita dan barasih dalam muntung tapi bila sudah diludahakan maka jadi rigat. Makanya ada peribahasa nang babunyi `janganlah manjilat liur di lantai' artinya kata-kata nang sudah diucapakan, sikap nang sudah dikeluarakan, jangan ditarik lagi" ujar Palui.

"Ooo... jadi bila manarik ucapan ataupun parnyataan nang sudah dikeluarkan berarti manjilat liur di lantai," ujar Tulamak paham.

"Aku paham jua Mak ai, rupanya si Palui ini manyindir para pulitikus dan pimpinan kita nang bahualan itu dan mamadahakan bubuhannya itu plin-plan alias plintat-plintut" ujar Garbus.

"Akulah kada baucap kaya itu karna nang manyambat plin-plan itu adalah ikam badua" ujar Palui himung.