Kada Salah, Tapi Sarah

Kada Salah, Tapi Sarah

WAYAH ini, kampung Palui kada katinggalan lawan nang lain. Paling kada, banyak nang sudah mulai manjapai internet. Gara-garanya, Haji Izur, urang paling sugih di kampung. Inya manyadiaakan internet hagin urang kampung supaya kada katinggalan kisah-kisah di luar kampung. Untungnya, Haji Izur urangnya jua baikan. Makanya, internet digaratisakannya. Supaya kada barabut wan bahirian, diaturnya, paling lawas sajam saikung urang. Mandangar raminya urang bainternet, Palui wan kakawalannya nang kaya, Garbus, Tuhalus wan Tuganal tulakan ka rumah Haji Izur handak marasai. Pas sampai di situ, sakalinya banyak banar sudah nang datang. Padahal, bubuhannya datang sungsung. Tapi tatap ai tadahulu urang. Bubuhan Palui dapat numur 16. Lantaran handak banar marasai raminya main internet, satangah harian dihadang bubuhannya. "Numur 16, giliran main," ujar Asad, pambantu Haji Izur mangiaw. Pamulaannya, kira-kira saparapat jam, bubuhan Palui dilajari urang sesuruhan Haji Izur mamainakan internet. Imbah itu ditinggalakan supaya bisa mamainakan saurangan. Satangah jam, bubuhannya kalikikan di kutak internet. Imbahnya, hinip sampai habis sajam. "Buhan Palui, bubuhan ikam habis sudah waktunya, bagantian pulang," jar Haji Izur manjinguk wadah Palui wan kakawalan main internet. Tiga kali Haji Izur mamadahakan waktunya habis, masih haja bubuhan Palui kada sing kaluaran. "Lui, Bus, Nal, Lus, ayu sudah bagantian, kasian nang lain mahadangi," ujar Haji Izur. Masih haja bubuhannya kada manyahut wan kada sing kaluaran pada kutak internet. "Bah kaasikan saku, sampai kada mandangar aku bakiyau," ujar Haji Izur wan Asad mandatangi bubuhan Palui. "Bah ini salah, bujur-bujur salah," ujar Haji Izur sambil bauling kapala malihat situs nang dibuka bubuhan Palui. "Ini ngarannya kada salah, tapi Sarah wan Rahma Azhari," ujar Palui manyahuti, tapi mata tatap ka komputer. "Han seksi banar kalo bubuhannya ni?" ujar Palui sambil bapaling. Palui takajut banar karna rupanya nang bapandir tadi Haji Izur. "Mulai hari ini, bubuhan ikam kada bulih lagi main internet di sini," ujar Haji Izur sarik. Pas disuruh bulik, bubuhannya tatap kada mau badiri. "Ampun Pa Haji lah, ulun kada kawa badiri imbah malihat Sarah tadi," ujar Palui maminta ampun. "Makanya, internet tu hagin mancari ilmu nang bamanfaat, kada hagin malihati gambar nang kada kakaruan kaya itu pang," ujar Haji Izur manasihati.