Satangah Tihang

Satangah Tihang

MUDAHAN ai bujuran, kada sakadar janji-janji manis haja. Ujar habar tahun 2009 nang dihadap kaina, gajih bubuhan guru pacangan banaik. Baharaan kadada lagi guru nang malarat atawa mancabang-cabang gawian ka lain. Jadi bubuhan guru kurinah mamintarakan kakanakan haja. Pasti akur wan himung banar tu pang sabarataan guru mandangar habar naini. Wan jua, pasti buhan sidin hakun maningkatakan mutu pandidikan kita. Amin Tapi lain lawan Garbus. Taungut inya kaya urang nang kamatian bini imbah mandangar gajih guru pacangan banaik. Napa pulang nang dipikirakan, Bus? ujar Palui batakun. Gajih bubuhan guru pacangan banaik, Lui ai, jawab Garbus lamah. Hau.. Harusnya kita umpat himung jua, Bus ai, lakas Tulamak manyahut. Jangan sakit hati kalu malihat urang lain himung. Wan jua, jangan himung kalu malihat urang lain sakit hati. Kada kacam itu pang, Mak ai. Jaka tida, sudah am lawas aku jadi guru jua, sahut Garbus. Jadi napa nang maulah ikam pina kada rila kalu gaji guru banaik? ujar Tulamak batakun. Tumatan bahari, aku handak banar jadi guru, Mak ai. Lalu aku umpat mahunur di SD, ujar Garbus mulai bakesah. Napa haja nang disuruh Kapala Sakulah, pasti lakas tu pang ku gawi, kahada mahadang dua-talu kali disuruh. Mintu jua wayah disuruh mamasang bandira satangah tihang. Kada salang batatakunan lagi, langsung ku gawi. Tapi imbah sudah tuntung, aku langsung diampihi sidin, ujar Garbus pina kilir-kiliran banyu matanya. Hau... apa sababnya, Bus? panasaran Tulamak batakun. "Kada mungkin kalu ikam rajin haja dan gawian ikam beres haja, kanapa urang maampihi, Bus? ujar Palui. Kada tahu jua aku Lui ai, timbul sidin manyambat goblok wan aku, jawab Garbus sambil tatunduk. "Padahal nang ku gawi bujur haja, sasuai parintah sidin jua gasan mangibarkan bandira satangah tihang. Makanya wayah itu tihang bandiranya ku gayat panggal dua. Padahal gayatanku itu sudah pas banar inggan tangah, ujarnya lagi marasa bujur. Palui wan Tulamak nang asalnya maras mandangarakan kesah Garbus, tabalik mangalangkang manawaakan. Kalu kacam itu, bujur urang, Bus ai, ujar Tulamak maniwas. Untung ikam lakas diampihi urang, Bus ai. Jaka kada, kaya apakah jadinya buhan anak murid, kalu ikam nang jadi gurunya, umpat jua Palui manumpalak