Monday, April 20, 2009

Manang Manukar

Manang Manukar

PASAR tungging wayah ini kada kaya dahulu lagi karna bubuhan pasar balauran banyak nang bapindah bajualan ka situ. Tapi amun itih masih ada saikung badua nang masih bajual baju wan salawar bakas matan luar nagri itu.

Ujar habar pasar tungging kada lawas lagi cagar dipindah ka kawasan lain nang kada maulah samrawut wan macit jalan. Karna cagar dipindah itulah makanya palui baistilah batatukar baju wan salawar bakas itu.

"Lui, pina banyak batukar baju salawarlah?" ujar Garbus marawa Palui wayah mambawa puntalan.

"Kanapa maka ikam tahu bahwa nang kubawa ini baju salawar," sahut Palui.

"Pasti haja aku tahu karna bungkusannya bulat pasti isinya kain, kalu ikam mambawa bungkusan balik kurma pasti sagi ampat," ujar Garbus kada hakun kalah.

"Aku mamburung, rami banar urang bajualan baju salawar bakas nang sudah jadi," ujar Palui.

"Oooooo........ itu baju salawar luar nageri, aku ada jua manukar dua talu pasang. Biar pakaian bakas tapi samunyaan masih hanyar-hanyar babau pabrik," ujar Tulamak.

"Cucuk hajalah ukurannya wan ikam Mak," ujar Garbus.

"Samunyaan cucuk haja, pas banar wan awakku karna awakku ganal sama wan awak urang luar nageri," sahut Tulamak baagak.

"Tapi aku maraguakan wan Palui karna awaknya kurus karimping kaya potlot," ujar Tulamak pulang mahuhulut Palui.

"Aku paham haja Mak ai bahwa baju salawar matan luar nageri ini ganal-ganal, hitunganku manang manukar, manang haraga karna kainnya banyak, kaina baju salawar itu diupahakan mahalusi, lalu sisa guntingannya kawa diulah kain lap," ujar Palui.

"Tapi ikam harus hati-hati jua Lui ai, ujar urang bahwa baju bakas urang luar nageri itu bisa babahaya karna di sana rami panyakit AIDS," ujar Tulamak.

"Gampang haja, ditapas, dirandam banyu panas. dikalantang, dijamur pasti barasih dan mati AIDSnya," ujar Palui.

"Barapa haraganya salambar Lui?" ujar Garbus.

"Haraganya salambar Rp 15.000," ujar Palui.

"Barapa ungkus maupahakan mahalusi baju salawarnya Lui?" ujar Garbus.

"Ujar tukang jahit karna dirumbak samunyaan maka ungkusnya Rp 15.000 salambarnya," ujar Palui.

"Jadi barapa jumlah haraga salawar wan ungkus mahalusinya Lui?" ujar Tulamak maanyaki.

"Hi'ih-lah, samunyaan jadi tiga puluh ribu rupiah sama wan baulah salawar hanyar," ujar Palui kakalahan karna salah hitung.

"Ikam kada kalah Lui ai karna masih ada tulisan made in-nya ulahan luar nageri," ujar Garbus mahimungi

Ciri Madu Asli

Ciri Madu Asli

MAMARINA Palui nang di Tanjung baelang ka rumah Palui. Mamarinanya itu gawiannya batarnak lebah, sakaligus bajual madu. Kabujuran ka Banjar sidin mambawa babarapa botol kalu-kalu ada nang handak manukari.

"Ni nah cirinya Lui. Amun nang asli tu kada dihurung samut. Bila dibuat ka kulkas kada baku atawa mangantal. Rasanya manis asli, amun dicucul lawan korek api, banyala," ujar mamarina Palui manjalasakan. "Cuba lihati aku manyuculnya wan api," ujar sidin handak mambuktiakan kaaslian madu bawaan sidin. Sakalinya dasar bujur malindap wayah dicucul sidin.

"Dasar bujur asli. Ayu ja ulun umpat manukar sabotol lak ai," ujar Palui limbah malihat mamarinanya mantes manyucul wan korek.

"Pacang kada kasandangan bini ikam malam ini," ujar mamarinanya langsung maambilakan ka botol nang sudah ba-isi madu.

"Tapi ada lagi pabidaan madu asli lawan nang palsu nang balum pian sambat lak ai," ujar Palui lihum.

"Satahuku nang kusambat tadi sudah langkap banar, ada lagikah nang lain?" ujar mamarinanya handak tahu.

"Ada lagi lak ai. Kalu madu nang palsu itu cirinya katuju badadiaman haja, kada katahuan lih bini tuha alias basalingkuhan haja, kada dikawini," ujar Palui lihum.

Rupanya mamarina Palui paham arah panderan anak kamanakannya itu.

"Kalu ciri madu nang bujur-bujur asli pang kaya apa Lui?" ujar sidin.

"Nah kalu madu nang asli itu dasar bujuran dikawini alias asli bini anum. Dan kada kawa dibawa atawa dikumpulakan wan bini tuha, bisa dirungkau lih bini tuha....," ujar Palui tatawa.

"Bujur banar Lui ai, kada suah aku manamui bini tuha hakun dimadu, pasti dikacaknya mun dikumpulakan," ujar mamarina Palui mambujurakan pander palui.

Kagancangan

Kagancangan

BAISUKAN Palui sudah mendatangi rumah Tulamak nang kada jauh matan rumahnya. Kada hiran, Tulamak takajut banar karna kada biasanya Palui kaluar baisukan apalagi ini mengiau-ngiau sambil manggandah lawang. Biasanya, Palui imbah basubuh mamadar dahulu sampai siang.

Tulamak nang masih ulir-ulir di tilam takajut-kajut. Kada bisanya Palui pina bahalulung banar.

"Napa ikam Lui, basungsungan hari manggandah rumahku?" ujar Tulamak.

"Aku minta ikam dangi'i baurut. Aku sakit pinggang, dimanalah wadah urang baurut?" ujar Palui sambil takuringis manahan sakit.

"Ooo nang kaya itukah. Kalau itu kita ka rumah abah Garbus haja. Sidin, habarnya paurutan jua. Banyak nang batatamba ka wadah sidin."

"Ayu ai mun nang kaya itu. Pakai sapidaku hajalah. Ikam nang manggonceng soalnya pinggangku rasa pagat. Bejalan haja aku baingkut dinding," ujar palui.

Di jalan, Kaduanya batamuan lawan Garbus. "Nang apa kisahnya pagi-pagi handak bailang ka rumahku," ujar Garbus hiran.

"Ini pang nah mambawa kawan kita sakit pinggang. Handak baurut lawan abah ikam jar," ujar Tulamak mengisahakan.

"Mun kaya itu lakasi, tampulu sidin ada di rumah. Amun talambat, kaina sidin diambili urang," ujar Garbus. Lalu ai bubuhannya bahancap tuju ka rumah Garbus.

"Buka baju dahulu lalu barabah biar kupariksai dahulu uratnya," ujar Abah Garbus memadahi Palui.

Hanyar dijapai, sedikit Palui sudah kipuh kasakitan. "Aduh sakit banar..aduh aduh!!" ujar Palui takuringis.

"Ikam ni kada apa-apa, cuma masuk angin haja. Lawan kada bisa bagimit," ujar abah Garbus mamadahi.

"Kada bisa bagimit kaya apa bah?" ujar Palui kada paham.

"Kagancangan manumbuk ni. Urang bagimit haja menumbuknya," ujar abah Garbus sambil manyirit ka Tulamak.

Tulamak nang baduduk di pinggir kalikikan mandangarakan. Rupanya Palui dipadahakan kaya itu rasa supan jua. Inya langsung mangaramputakan pemandiran abah Garbus. "Kada, ulun kada parnah gancang. Bagamat haja, kada gancang ulun menumbuk," ujar Palui bakulim mati.

"Kanapa garang ikam pina bakulim banar, aku tadi bagayaan haja. Maksudku, ikam tuh nah jangan talalu gancang menumbuk padi. Atau bisa dasar bujuran gancang nih manumbuk," ujar abah Garbus menggayai Palui.

Habang hirang muha Palui manahan supan. Sekalinya, sidin itu bagayaan haja. Tapi rahasianya sudah talanjur tabungkar katahuan ulih urang.

Related Posts Plugin for WordPress, Blogger...