Mangidam Kantut

Mangidam Kantut

URANG mangidam itu macam-macam kahandak. Kalu nang katuju mancok, itu biasa haja. Tapi ada nang lucu wan aneh nang kaya katuju makan tambikar, kada katuju tacium bau nasi, kada hakun kaluar kalambu. Maka, ujar urang tuha, apa nang dikahandaki urang mangidam itu musti dituruti karna itu kahandak nang di dalam parut. Bini si Palui lain pulang. Ngidamnya kada sama lawan urang saduniaan. Bini si Palui mengidam kantut. Amun ada urang di rumah nang bakantut, bini Palui kada sing ampihan mahiut. Untung haja kantut nang dikatujuinya kantut urang rumah haja. Jaka handak mancium kantut urang lain, kaya apakah saku si Palui. Amun ada urang bakantut di rumah tu, tapi bini Palui kada dihabari, sariknya luar biasa. Bisa sampai tatangis inya kasasarikan. Jadi siapa haja urang rumah nang handak bakantut, harus mangiau bini Palui. Jadi wajib bakantut di hadapannya. Supaya pangantutan, Palui manukar bigi kidaung. Satiap hari jua si Palui manukar hintalu itik. Tapi kanapakah, biar makan bigi kidaung, biar makan hintalu saling babanyakan, urang di rumah Palui kada kawa bakantut lagi. Parut samuaan gubuk-gubuk, banyak haja rupanya angin didalamnya, tapi kada mau dikaluarakan. Sadang haja mancari cara, sampai batungging, tapi kantut tatap kada mau kaluar jua. Sarumahan bingung napa mun bini Palui marungsing-rungsing haja kada tacium bau kantut. Samua urang di rumah disumpahinya. "Amun kadada lagi nang baisi kantut di rumah ni, cariakan di luar! Amun kada mancariakan, aku saurang tulak mancari!" ujar bininya maancam. Supan amun sampai mancari kantut urang lain, Palui manjaga bininya bahimat. Palui lalu mancari akal, kaya apa supaya inya kawa manyadiaakan kantut. "Ka sini umanya, aku handak bakantut," ujar si Palui. Mandangar si Palui handak bakantut, sigar saitu-saini bininya. Sambil takurihing, inya mandatangi si Palui. Si Palui batiharapan di ranjang. Bininya duduk di higa. "Parakakan hidung!" ujar si Palui pulang. Bininya mamarakakan ka hidung. Liurnya batitikan, handak banar mancium bau kantut. Mingar hidungnya kimut-kimut mahadang, diparak burit si Palui. Si Palui mulai batungging, mahajan kantut. Lawas mahajan, baluman kaluar jua kantutnya. Bininya sabar mahadang. Barakat rajin mahajan lalu ai pras! babunyi. Bini si Palui tapijim, kana matanya. Badadas bininya bukah mancari banyu.