Katuju kunatnya

Katuju kunatnya SATIAP Palui balum cangul, Garbus wan Tulamak pasti mamanderakan kalakuan kawalnya nang lanji wan babungul pintar. Rancak maulah tatawa tapi rancak jua mambari muar karna katuju manggawi urang. Ikam ingatlah Mak, Palui itu dua kali basunat, ujar Garbus. Hahahaa... hi-ih aku ingat Bus ai. Sakali dipatuk buntal hujung kapalanya dan nang kadua dipatuk lading tukang sunat, ujar Tulamak mangalakak kaingatan burung Palui dipatuk buntal wayah mandi di sungai wayah masih kakanakan. Jangan nyaring tatawa Mak, itu nah Paluinya datang, ujar Garbus manunjuk Palui. Bapander kada usah bararahasiaan Mak ai, aku mandangar haja napa nang ikam sambat tadi. Aku kada kawa manulak dipatuk buntal itu karna itulah nasibku. Tapi aku wan biniku basyukur jua Mak ai..., ujar Palui. Dipatuk buntal, kanapa maka ikam wan bini ikam basyukur Lui? ujar Tulamak. Aku basyukur karna nang dipatuknya itu hanya hujungnya haja. Andaikata samunyaan dipatuknya, kiamatlah dunia ini, ujar Palui baagak. Lalu kanapa maka bini ikam umpat jua basyukur, ujar Garbus handak tahu. Wajar haja inya basyukur karna kawa kawin wan aku. Bahkan biniku itu malah maminta pulang kalu kawa dipatukkan lagi ka iwak buntal itu, tapi mamatuknya di pinggir-pinggirnya haja, ujar Palui. Napa alasannya maka bini ikam minta patukakan lagi, ujar Garbus pina hiran. Tanyata biniku itu katuju banar wan kunat bakas patukan buntal itu, dipadahakannya kunatnya kandal dan karas. Karna kandal wan karas itulah maka dipadahakannya asyiiikkkk..., ujar Palui baagak. Hakunlah Lui barang ikam itu dipatuk buntal lagi? ujar Tulamak. Tujuh turunan aku kada hakun lagi barangku dipatuk buntal karna buntal itu kada ba-akal dan mamatuknya kada bapilih, kalu pina dipatuknya samunyaan maka tatinggal tunggulnya haja. Bibinian mana nang hakun kalo gawiannya cuma marawat tunggul nang kada baguna," ujar Palui tatawa