Umpat Mamamu Jua

Umpat Mamamu Jua

Sudah samingguan ini Tulamak kada babaikan wan bininya. Kada bataguran, kada basapaan. Inya tapahual masalah rumah tangga. Maklum haja jaman sakarang, saraba larang. Kalu kurang-kurang sabar bisa jadi "karislakbin" (karisis laki-bini). "Awak haja ganal nang kaya karung baras, tapi pangulir bagawi. Nangkaya handak tatukar baras?" ujar bininya bamamai tarus-tarusan. Sasar hari perang sasar bapanas, sahingga anaknya nang bungsu jadi manangis katakutan. Untungnya kada sampai bakacak batampilingan. Hari samalam bini Tulamak manuntut minta carai, handak ka penghulu wan dibagi harta. "Pian abahnya-ai, hari ini kita ke pangulu, harta kita bagi, duit hasil pancarian kita bagi. Anak-anak kita bagi jua," ujar bini Tulamak manciling-ciling matanya kasasarikan. "Basabar umanya-ai," ujar Tulamak. Masalah anak-anak kita ini panting. Baik kutakunakan langsung pada saikung, nang kaya pilkada, dan damukratis, supaya kita kada manyasal kamudian," ujar Tulamak malamahi. Katiga anak-anaknya dikiau. Tulamak barucap bamangkal -mangkal. "Partama.....ikam anakku Haris, amun kami bapisahan, ikam umpat mama atawa abah? "Ulun umpat mama," jawab Haris. Ka dua, ikam Nurhadiah, amun kami bapisahan, ikam umpat mama atawa abah?" "Ulun umpat mama, bah-ai!" ujar Nurhadiah lihum. "Katiga, ikam anakku nang pabungsunya, Rudi Asikin. Amun kami bapisah, ikam umpat abah atawa mama?" Sakalinya nang bungsu menjawab umpat mamanya jua. Lalu anak-anak nang batalu ini sama-sama lihum dan babisik-bisik, bagawilan, sambil manulih ke abah dan mamanya. Anak sulung, si Haris langsung batakun kepada Tulamak. Sampian pang bah ....umpat siapa? ujar Haris. Tulamak bingung nang kaya linglung, "A....aa.... amun kaya itu... mun kaya itu....aku umpat mamamu jua," "Horeeee.....abah wan mama kada jadi bapisah!" ujar anak-anak itu basurak. Tulamak wan bininya sama-sama maklum disuraki anak-anaknya. Perang pun usai