Thursday, January 8, 2009

Saraba Hirang

Saraba Hirang
Image

BILA bubuhannya takumpul baik di warung atawa di gardu

musti ada-ada haja nang dipanderakannya tapi nang tabanyak

adalah manguya babinian kampungnya jua. Rupanya karna

rancak panguyaan itu jualah maka sampai tuha bubuhannya

balum babinian.

Tiap ikung macam-macam kumentarnya, ada nang dipadahakan

baik tapi ada jua nang dibajah. Umpamanya ada babinian nang

disambatnya muhanya langkar tapi bajalannya pengkor, ada

nang disambat awaknya mudel bintang filem tapi muntungnya

mancarucus kaya parupuk mandah. Ada jua nang tingkah

lakunya supan santun tapi abah umanya panyarikan, anaknya

kada kawa diparaki.

"Kita sabarataan ini paham haja bila manyambat atawa mamander

urang itu badusa tapi bila kada dipander kadada rembuk pandapat,"

ujar Palui mambuka panderan.

"Mamander kada hanya mambajah tapi kita mancari nang

baiknya supaya bila mamilih bini kaina kada cagar tatukar

kucing dalam karung," sahut Garbus.

"Nah, aku katuju wan pandapat ikam itu Bus ai asal apa nang

kita pander itu gasan kita haja jangan takaluar ka urang lain

jadi artinya top sekret," ujar Palui sambil maandak talunjuk

di muntung.

"Itulah tanda kita bakawan, jadi antara kita biar bahual atawa

bakakarasan pander jangan sampai bakalahian," sahut Tulamak.

"Apalagi diantara kita ini ada nang baisi kalabihan tapi ada jua

kakurangan, makanya kita saling mamaklumi tanda satiakawan

samuak saliur," ujar Tuhirang umpat manyurung pander.

"Maka itu maafakanlah Lui kalu aku manilai ikam, ikam ini

tamasuk urang paling paalimnya diantara kami, tapi kanapa

maka umpat jua marabutakan mahandaki si Zaleha," ujar

Tuhirang marasa disaingi.

"Basaing itu kadada nang manangati asal jujur, itu tandanya

kita malihatakan kaharatan kita. Biar alim ataupun kada alim

jangan dikaitakan wan si Zaleha, karna aku lalakian kaya ikam

jua ujar Palui manjawab.

"Aku akur pandapat Palui, sual handak wan babinian adalah

sual liur apalagi kita sama-sama bujang," ujar Garbus.

"Aku ampun maaf Ranglah, bila kita basaing mahandaki Zaleha

pasti aku cagar dapat karna aku putih kuning, dan ikam hirang

harang lutung," sahut Palui.

"Ya.....itulah nasibku," ujar Tuhirang mangalah. "Karna aku matan

pabrik sononya sudah hirang, abah wan umaku hirang lalu aku

jadi pawarisnya."

"Ikam bujur-bujur jujur manarima wan manyukuri nasib itu

artinya ikam tamasuk urang nang alim jua," ujar Garbus.

"Apalagi wayah ini hirangku makin bakandal batambah hirang

karna gawianku bajual harang lalu abahku bagawi dipanggalian

batu harang di Binuang," ujar Thirang mangakui.

"Kira-kira disamping nang ikam sambat itu, ada lagi nang

manambah ikam makin hirang ujar Palui.Karna saban baisukan

kulihat ikam katuju banar nginum kupi wan saban hari makan

siang nasi rawon. Kaya itu jua baisukan kamarian ikam mandinya

banyu gambut nang hirang kaya kokakola," ujar Palui mahuhulut.

"Aku kalah, aku angkat tangan," ujar Tuhirang. "Tapi biar kaya

apapun gigiku kada cagar hirang, bila kada kawa putih kaya

bubuhan ikam syukur jualah bisa kuning kaya ininah........"

ujar Tuhirang sambil maiji-iji kasasarikan.

No comments:

Post a Comment

Related Posts Plugin for WordPress, Blogger...