Taumpat Bagarak

Taumpat Bagarak

AMPAT tahun Palui balaki babini balum jua bakulih anak, padahal inya sudah handak banar baisian gindongan. Apalagi banyak kakawalannya nang tadudi kawin sudah beranakan jua. Makanya Palui laki bini bausaha batatamba karna takutan kalu pina tamanang lalu kada baranakan. "Aku hakun haja batatamba abahnya ai. Kita tulakan ka wadah paurutan julak Umbu," ujar bini Palui. "Aku akur jua tapi baiknya jangan ka dukun tukang urut kaina parut ikam dipulas-pulas sidin," ujar Palui. "Kalu kada ka wadah tukang paurutan, kamana abahnya?" sahut bininya. "Kita bapariksa ka puskesmas haja karna di sana ada dukter, ada perawat dan bidan-bidannya anum-anum," ujar Palui. "Aku minta dipariksa bidan tuha haja jangan bidan anum," ujar bini Palui pina cemburu. "Hari gene masih camburuan..." ujar Palui manuruti nang kaya di iklan, mangguda bininya. Babarapa bulan imbah bapariksa itu bini Palui pina mulai macam-macam tingkah laku dan kahandaknya. "Jangan sariklah ulun handak macam-macam, handak nasi panjang, handak banyu bagantung, handak paisan walut," ujar bininya. "Syukur ikam mangidam, kabul hajat kita handak baisian anak," ujar Palui mamaluk bininya. "Ini sudah batianan bulan katiga dan kaampat abahnya ai," ujar bini Palui pina ungah. "Bulan katiga wan kaampat itu adalah bulan pembentukan, kaina bulan kalima sudah mulai ada tanda-tanda kahidupan," ujar Palui. "Abahnya, abahnyaaa... bujur ujar sampiyan itu, ini nah sudah tarasa mulai bagarak. Ayu lakasi japai dan pusut-pusut parut ulun," ujar bini Palui sambil mamacul tapihnya dan langsung manarik tangan Palui manjapaiakan ka parutnya. "Hi-ih-lah, karasaan banar sudah bagarak artinya bayi ini sudah bahinak dan hidup," ujar Palui maangkat talinganya matan parut bininya, sambil bagamat mamusut-musut karna kasasayangan. "Tapihnya jangan dipacul samunyaan umanya ai, dibuka sadikit haja, karna bila dipacul samunyaan kada cuma parut ikam nang bagarak, tapi ampunku taumpat jua bagarak karna talihat jalan anak," ujar Palui manyirit bininya.