Cerita Handap: Nang Paling Manunjul

Nang Paling Manunjul

GAWIAN jadi katua RT tanyata macam-macam, tuntung sahuwaran datang pulang parintah atawa parmintaan lainnya matan pambakal wan camat. Padahal dahulu kukira jadi katua RT itu gawaiannya paling-paling manyuruh warga barunda malam atawa urusan kartu panduduk, ujar Palui dalam hati. "Alhamdulillah, kita sudah tuntung cacah jiwa kaluarga miskin gasan IDT, maka tinggal sabuting lagi parintah Camat," ujar Palui. "Parintah napa pulang Lui?" sahut Garbus. "Kalu cagar jadi duit sanggupi haja kaina kami nang manggawinya," ujarnya. "Gawiannya nyaman haja, kita disuruh mancatat tiap warga miskin itu apa nang paling manunjul gasan dibantu," ujar Palui. "Kalu kaya itu kita sanggupi, kita babagi tugas. Palui di subarang, Tulamak di pasar, aku di hilir," ujar Garbus. Imbah babagi tugas wan mandapat bimbingan matan camat lalu masing-masing tulakan. Palui imbah sampai kasubarang lalu mangiyaui bubuhan warga disana, mambari panjalasan bahwa cagar ada bantuan matan pamarintah. "Bapak-bapak wan ibu-ibu, kita disuruh mamajuakan napa nang paling bisa kita gawi supaya dapat bantuan IDT. Maka kita harus mambantuk kalumpuk nang disambat Pokmas," ujar Palui. "Kami saratus parsen satuju. Kalu kami bahasil dapat bantuan maka Palui kami usulakan jadi katua RT saumur hidup," ujar saikung lalu diapiki ulih nang lain. "Gawian nang dipilih itu harus kawa digawi, umpamanya kaya urang Martapura baulah kalalepon, di Barabai baulah apam, Amuntai wan itiknya, Kandangan bajual dudul aslinya," ujar Palui. "Naahhh... sakarang ulun takunakan wan sampiyan- sampiyan "napa nang paling manunjul" disini, ujar Palui. "Sambil tadarau bubuhan bibiniannya manjawab: "Di kampung kami ini nang paling manunjul adalah ini....nah," sambil manunjuk kadada masing-masing. "Ooooo.....jadi disini nang manunjul usaha parahan susu sapi," ujar Palui batakun karna inya balum paham. "Kada parahan sapi susu, tapi nang manunjul susunya," ujar bubuhan bibiniannya. "Karna di kampung kami ini banyak jandanya, makanya manunjulnya ganal-ganal, ada janda kambang wan ada jua janda baranak saikung atawa dua ikung," ujarnya. "Kalu bubuhan Palui sapakawanan baliur kami siap haja dipara'i, biar kada bajujuran baakuran haja," ujarnya nang saikung. Palui kasisipuan kada kawa bakutik lagi gara-gara salah tafsir batakun nang manunjul maka panderan jadi layau.