LIMBAH musim haji rami banar urang baelangan ka rumah-rumah urang nang hanyar datang haji. Tamasuk bubuhan Palui, Garbus wan Tulamak kada katinggalan. "Kamana kita hari ini Lui? ujar Garbus manakuni Palui. "Kita ka rumah abahnya Irus. Kita balum ka sana kalu? ujar Palui menyahuti. "Akur banar Lui ai," ujar Tulamak kahimungan. "Assalamualaikum Ji!" ujar Palui baimbai Tulamak wan Garbus mabari salam. "Waalaikum salam Lui, Mak, Bus, alhamdulillah bubuhan ikam datangan," ujar pak haji abah Irus sambil maragap ka buhan Palui. "Ayu masukan ka rumah," ujar Haji lagi manyuruh masuk ka rumah. "Kaya apa habar di sana Ji,...rami haja kah?" ujar Garbus mambuka panderan "Amun rami Bus ai kada jua, kami dasar handak baniat baibadah, kada bajalanan," ujar pak haji manyahut "Ikam ni Bus ai tatakunan pina kada masuk akal," ujar Palui mahuhulut Garbus "Kanapa Lui? ujar Garbus hiran "Amun handak rami pak haji kada jauh-jauh tulak ka Makkah sana, di pasar gin rami banar," ujar Palui tatawa. "Bujur Lui ai, aku akur haja lawan ikam," ujar pak haji umpat tatawa. "Ayu rasai nah kurmanya, uleh-uleh matan Makah, Rus surungi pang banyu zam-zam, ada haja kalu masih?" ujar pa haji menyuruh nang anak. "Masih bah ai...untung haja masih ditinggali gasan bubuhan Palui", ujar Irus jua manyahuti matan dalam. Kada lawas Irus kaluar mambawa banyu zam-zam sambil menyurung ka cangkir. "Banyu zam-zamnya manis pa haji lah," ujar Tulamak manggarunum "Hau, ikam gulai kah Rus?" ujar pa haji bingung. "Kada bah ai...ulun kada manggulai kada banyu zam-zamnya," ujar Irus jua bingung "Aku paham haja Mak ai, dasar banyu zam-zam kami manis, lain rasanya lawan zam-zam nang asli," ujar pa haji limbah tahu galagat Tulamak. "Ha..ha..ha..katahuan pa haji," ujar Palui tatawa "Ulun marasai kurma pa haji lah," ujar Tulamak kasupanan. "Pina lain rasanya kurma pian ne pa haji? rasa ada pisang nya," ujar Tulamak bingung "Tahu, ubah rasa kanapa lagi ikam mak? tadi mamadahi banyu zam-zam manis, ne kurma rasa pisang," ujar Garbus bingung "Bujur pa haji ai, kurma nya rasa pisang nah," ujar Palui jua. "Haa..ha..ha. buhan ikam salah ambil, nang di ambil ikam kurma matan Astambul Binuang sana, alias rimpi," ujar pa haji tatawa. |
Wednesday, January 7, 2009
Kurma Astambul
Kurma Astambul
Subscribe to:
Post Comments (Atom)
No comments:
Post a Comment