Wednesday, February 23, 2011

Julak Bahar




PALUI tulak madam handak maubah nasib. Imbah sampai di banua urang itu,
Palui kaingatan pasan aruwah kainya bahwa partama-tama inya harus
bapapatuhan wan tatangga kiri kanan. Imbah itu harus cari siapa urang
harat atawa nang wani saumpama jagonya disitu gasan bapapatuhan. Biar
haja rugi bakurban mambawa ruku, timbaku atawa mambawai makanan. Tapi
nang panting sudah saling bakatahuan. Bila tajadi apa-apa pasti cagar
mandapat bantuan.

Pasan kainya itu bujur-bujur digawi Palui dan bahasil bapatuhan wan jago
kampung nang bangaran julak Bahar karna sidin bagalang akar bahar. Hampir
saban malam Palui mailangi julak Bahar, sambil bakikisahan ka hulu ka
hilir.

“Kawalah Lui aku minta tulung?” ujar Julak Bahar.

“Minta tulung napa?” ujar Palui.

“Aku bahutang duit salawi ribu rupiah,” ujar julak.

“Kalu cuma salawi ribu, kada usah bahutang julak ai, tapi ulun bariakan
haja,” ujar Palui manjulung duitnya.

Karna kabaikan Palui itu maka julak Bahar makin sayang wan Palui,
mambantu dan malindungi bila ada masalah gawian Palui.

“Ikam hati-hati Lui ai, jangan talalu baik wan urang. Sasadangi haja
karna bila talalu baik ikam pasti cagar dihinyiknya,” ujar Garbus
mambari nasihat.

“Aku parlu mamaraki sidin supaya kita kada diganggunya, malah
dilidunginya,” sahut Palui.

“Lui, aku ada parlu bantuan ikam,” ujar julak Bahar.

“Parlu napa lak, sambat haja,” ujar Palui.

“Sakali ini aku minta bantuan ikam, aku handak bahutang. Kada banyak
cuma lima ratus ribu rupiah,” ujar julak Bahar.

“Kalu cuma sapuluh atawa salawi, ulun bariakan haja tapi karna banyak
tapaksa ulun hutangi,” ujar Palui manjulung duitnya. Isuknya julak
Bahar bahutang pulang, hingga jumlahnya labih satangah juta dan sidin
bajanji cagar mambayar habis bulan.

“Sudah kupasani, janganlah talalu baik wan sidin itu karna urang
karas kada kawa dilamahi,” ujar Garbus.

“Ayu ja, isuk kutagih sasuai janji sidin,” ujar Palui.

Isuknya Palui bujur-bujur managih, tapi tatap sidin baalasan cagar
mambayar habis bulan kaina. Karna sudah dua kali managih tatap kada
dibayari julak Bahar, maka Palui handak mangarasi. Wayah handak
managih, kamarian itu Palui singhaja mamasang kupiah pina bahiring,
tapih basandang di bahu dan karis batajak di pinggang.

“Sakali ini ulun datang pahimatan, pian mambayari atawa kada,” ujar
Palui sarik walaupun hatinya takutan malihat sisingut julak Bahar
pina bagarak-garak.

“Sudah kusambat bahwa aku cagar mambayar hutangku Lui ai tapi parak
habis bulan kaina. Kalu ikam managih bakakarasan maka kita baadu
kuat haja,” ujar julak Bahar sambil mancabut lading lalu pura-pura
mamutung kuku.

Palui kada saling ucapan lagi, kalas sampai katahi-tahi ditantang
julak Bahar, lalu baundur bulik sambil baucap, ”dasar kada kawa
dibaiki urang nang sudah wataknya kaya itu. Handak mancari beking
sakalinya hilang duit batangah juta,” ujar Palui bagaru kapala karna
manyasal

No comments:

Post a Comment

Related Posts Plugin for WordPress, Blogger...