Maatur Amplop

Maatur Amplop

SUDAH kabiasaan di kampung Palui bila ada acara

baninikahan pasti ada jua caramahnya nang ujar

urang wayah ini ngarannya nasihat parkawinan. Nang

manikahakan sasuai paraturan biasanya pangulu, tapi

nang mambari nasihat bisa jua nang lainnya kaya

tuan guru, tatuha kampung atawa pambakal.

Kada lawas tadi mamarina Palui manikahakan anaknya,

karana kadada nang tuha lainnya maka Palui tapilih

jadi kapala gawi. Gasan malam baninikahan itu

Palui saurang nang maaturnya karana gawiannya kada

banyak. Salamatan saraba sadikit manyaru tatuha

kampung parak rumahnya, kurang labih ampat puluh

ikung haja. Sudah diaturnya pangulu nang disaru

Pangulu Kacamatan Haji Quba. Urangnya anum haja

tapi tamatan pasanteren di Jawa. Lalu nang mambaca

ayat-ayat suci Alquran bubuhan tadarusan langgarnya.

Ada jua sambutan tatuha dipilih bakas pambakal

Haji Syukri.

Mamarinanya bapasan imbah tuntung acara baninikahan

kaina supaya Palui jangan kada ingat batarima kasih

lawan nang dimintanya mambantu, ucapan tarima kasih

itu kaya biasa jua manyadiaakan amplop. Palui mulai

mahitung gasan Pangulu salawi, gasan nang mambari

sambutan kaya itu jua. Gasan nang mangaji karna

bubuhannya dibari saparunya. Jadi sabalum acara

dimulai Palui sudah siap lawan amplop-amplop baisi

duit itu.

Imbah nang disaru sudah takumpul maka acara dimulai

pangajian, Lalu baninikahan ulih pangulu sampai ijab

kabul. Habis ijab kabul sampai manandatangani

surat-surat nikah, pangulu baucap : “Aku ini awak

asa gagaringan, maka gasan nasihat parkawinan kusarahakan

lawan pakacilku Garbus, sidin ini tamasuk tatuha

di kaluarga kami.”

Palui takajut kanapa maka pangulu manunjuk Garbus.

Padahal inya tahu banar siapa Garbus itu, tapi karna

sudah disambat lawan diminta pangulu maka tapaksaai

dikabulakan. Nang ngaran si Garbus katuju bapander maka

cacarancang inya banasihat ka hulu ka hilir, banyak

urang takurihing mandangarakan nasihatnya.

Imbah nasihat Garbus ditarusakan lawan sambutan

pambakal tuha, nang isinya sadikit manyindir Garbus.

- “Kita ini bahanu harat bananasihat gasan urang lain

tapi kada ingat manasihati diri kita saurang. Nasihat

itu kada di muntung haja tapi harus digawi,

dinampakakan lawan parbuatan kita sahari-hari.

Nang kaya pangantin tu, basasayangan jangan dibibir

haja tapi sampai ka hati sampai mati,” ujar pambakal

tuha pulang.

Palui katuju banar lawan sambutan pambakal tuha.

Pas mangana gasan pangantin tapi pas jua manyindir

Garbus. Tapi nang dipikirakan Palui disamping nasihat

Garbus ini dibari amplop atawa kada dibari. Apalagi

amplop nang disadiaakannya cukup gasan tiga ikung haja

kada tahitung si Garbus.
Mamarinanya manyuruh supaya dibari haja tanda tarima

kasih. Maka Palui tapaksa mancari tambahan amplop

lawan duitnya lima ribu rupiah gasan Garbus.

Waktu bulikan basalaman Palui menjulung amplop-amplop

itu masing-masing gasan nang mangaji, gasan Panghulu,

gasan Garbus lawan Pambakal tuha.

Isuknya bubuhannya batamuan pulang sambil bahululutan

karana Garbus tapakai gasan banasihat disuruh

panghulu kamanakannya.

> “Lui... aku tarima kasih banyak, tarima kasih

banar ikam mambari aku amplop, kada kukira isinya

banyak banar salawi ribu rupiah,” ujar Garbus.

Palui taungut kada kawa manjawab, kada kawa baucap

lagi kasupanan, rupanya inya tasalah manjulung amplop

gasan Garbus kabanyakan. Lalu takamana lawan siapa

nang manarima paling sadikit lima ribu rupiah, ujar

Palui dalam hati