Guring Nyaman
WAYAH Palui bajalanan ka kuta, di samping malihat-lihat tuku batingkat,
sambahyang di masigit ganal dan baulanja di pasar hanyar, inya sawat jua
bajalanan ka taman kuta nang disambat urang taman monyet.
Di taman monyet itu rami banar, kada hanya wadah kakanakan bamainan tapi
ada jua urang bagagandakan, baragapan bahkan baciciuman. Kalu baragapan
baciuman itu malam hari kada kalihatan, tapi kalu siang hari di higa-higa
tanaman dan kalihatan urang manyupanakan banar, ujar Palui dalam hati.
Imbah uyuh bakuliling-kuliling itu Palui handak baistirahat, dicarinya
bangku kadudukan. Inya dapat kadudukan parak urang nang paharatan
guring. Diitihinya urang itu, pina nyaman banar guring lalu diparakinya.
Rupanya mandangar garisik Palui, urang itu manguliat sambil
mambuncilakakan mata mancangangi Palui.
"Kanapa cil, sampiyan handak dudukkah? Ayu ja duduk di higa ulun ini,"
ujar urang itu manyuruh.
"Uyuh nang ai, umpat duduklah?" ujar Palui lalu duduk batatai wan
urang itu tadi sambil maitihi urangnya.
"Sampiyan matan mana cil?" ujar urang itu batakun.
"Aku ini matan pahuluan, mailangi kaluarga di sini lalu handak jua
malihat-lihat taman ini, baik banar. Kanapa maka guring di sini?" ujar Palui.
"Wadah ini gasan kita basanang-sanang tamasuk gasan baistirahat
dan guring," ujar pamuda itu tadi.
"Ikam awak masih anum nang ai, jangan pangulir baiknya bagawi supaya
kawa jua kaya urang nang hidupnya nyaman," ujar Palui manasihati
karna dilihatnya pamuda itu pina pangulir.
"Sabujurnya kaya itu baiknya bagawi, baulah rumah, babini, tapi
wayahini saraba ngalih, jangankan kaya ulun ini nang tamat sakulah
gin banyak manganggur," ujar pamuda itu manangkis.
"Nah paham haja ikam, kalu hidup sudah saraba cukup maka nyaman
guring," ujar Palui.
"Kalu bapander hidup saraba cukup kada bakasudahan Cil ai karna
manusia itu kada bisa puas, biar sudah cukup handak lagi manambah.
Cuntuhnya banyak urang sugih, tapi masih marasa kurang haja, kaya
itu jua banyak pagawai sudah saraba bakacukupan tapi tatap haja
korupsi mancuntan duit nagara," ujar pamuda itu.
"Nang panting kada usah balabihan banar, parut kanyang nyaman guring,"
ujar Palui malamahi karna dilihatnya pamuda itu pina pintar bapander.
"Kalu cuma gasan nyaman guring, di sini gin nyaman guring. Makanya
saban hari ulun guring di sini, nyaman banar apalagi wayah ba-angin
kaya ini," ujar pamuda itu.
"Ayu ja guring lagi," ujar Palui manyuruh karna dilihatnya pamuda itu
babarapa kali manguap. "Tapakalah banar aku," ujar Palui baucap dalam
hati, karna inya hanyar tahu bahwa pamuda itu tadi gelandangan nang
hidupnya makan guring.
No comments:
Post a Comment