mauyahi hayam

mauyahi hayam

GARBUS, Tulamak wan Tuhirang kahiranan malihat si Palui datang

bapuntalan tapih di pinggang sambil hingak-hingak kauyuhan.

"Uii kakawalan," ujar Palui. "Jangan kada ingat malam kaina datang

ka rumah lah. Aku kana giliran arisan yasinan," ujar Palui bakakajutan.

"Kanapa Lui pina bahingal, apakah ikam kauyuhan manggani'i bini gasan

malam kaina ujar Garbus.

"Aku kauyuhan kada karna manggani'i bini tapi kauyuhan karna aku

handak manangkap hayam kada sing dapatan. Ujar biniku baiknya malam

ini makanannya sup hayam haja. Tapi aku sudah batuhuk manyasahinya

tatap kada dapat jua, rupanya tamasuk hayam liar karna saban malam

guringnya kada di kandang tapi di puhun nangka," ujar Palui.

"Gampang Lui, ujar urang bahari kalu handak manangkap hayam supaya

diunjai wan bawang habang bakuyak, lalu imbah mancium inya langsung

mauk," ujar Tulamak manyaranakan.

"Sudah jua kucubai bapuluh-puluh bigi bawang habang tapi kada kawa

manangkapnya, bahkan hayamnya makin liar," sahut Palui.

"Aku ada pandapat ujar," Garbus handak manggawi Palui. "Kalu nang

nyaman manangkap hayam jangan wan bawang tapi wan uyah. Ikam sadiakan

uyah saganggam lalu langsung ikam andaki uyah itu di kapalanya, imbah itu

langsung haja tangkap batisnya," ujar Garbus.

"Ooooo..... jadi hayam itu diuyahi sabalum disumbalih," ujar Palui kada hakun

kalah sambil tatawa lalu langsung bulik handak manggawi apa nang

disaranakan Garbus.

Kada lawas datang pulang Palui ka warung, muhanya pucat hinaknya

makin hingal-hingal pina handak siup kauyuhan.

" Kanapa Lui, sudah dapatlah hayamnya?" ujar Garbus.

"Sudah jua kucuba, uyahnya kada cuma saganggam tapi bakilu- kilu kada

kawa jua manjujup apalagi manangkapnya," sahut Palui.

"Waahhhh...... ikam digawi bubuhannya Lui ai ujar Tulamak, biar sabakul

uyahnya ikam hawarakan ka hayam kada cagar kawa manangkapnya.Karna

amun ikam kawa ma-andak uyah di kapala hayam ba-arti ikam kawa

manangkapnya ujar Tulamak.

"Umai lah....aku digawinya!" ujar Palui bamamai. "Talanjur purun kakawalan,

kawan sudah sakit tambah disakiti," ujarnya. "Kaina ada haja balasannya

hari kiamat," ujar Palui mahalunyur bulik kada saling padahan

Minyak Lamak

Minyak Lamak WAYAH masih bujang wan balum baisian gawian, Palui paling katuju bamalam di rumah mamarinanya di Banjar. Palui tamasuk kamanakan nang paling disanangi ulih mamarinanya itu karna rajin dan nyaman disuruh. “Kanapa maka ikam katuju bamalam dan badiam di rumah mamarina ikam Lui?” ujar Garbus. “Aku katuju wan mamarina ini karna sidin kada panyarikan dan panyayangan,”sahutPalui.“Kukira ada alasan lainnya,” ujar Garbus.“Kukira alasan lainnya karna paninian wan mamarinanya itu panyayangan maka sidin rancak mambari duit,” ujar Tulamak. “Hi’ih bujur haja sidin rancak mambari duit tapi aku harus hakun disuruh napa haja makanya disayangi sidin,” sahut Palui. “Kukira pasti ada alasan lainnya,” ujar Garbus. “Napa alasannya Bus?” ujar Tulamak. “Mamarinanya itu kada baanakan, hingga Palui paling disayangi. Sedangkan di rumah Palui saurang bajurut ading-adingnya hingga inya kada mandapat kasih sayang,” ujar Garbus mambuka rahasianya.“Ikam biasanya disuruh napa haja Lui hingga rancak dibari duit?” ujar Tulamak. “Biasa jua aku diusir sidin supaya bulik ka rumah abahku karna sidin sarik banar,” ujar Palui. “Napa kisahnya Lui?” ujar Garbus. “Aku disuruh mamarinaku itu supaya mauruti awak sidin karna sidin masuk angin bakas kahujanan wayah datang matan pahumaan. Kaya biasanya langsung kuambilakan minyak lamak, minyak lala-an nyiur. Wayah itu rupanya di rumah kahabisan minyak lamak, maka kuambilakan minyak lamak nang ada di rinjing. Langsung ku-uruti sa-awakan. Tapi kada lawas imbah sidin batilantang rupanya mancium bau iwak karing, langsung sidin bamamai manyariki aku, manyuruh bulik ka rumah urang tuhaku,” ujar Palui pina sadih. “Napa pasalnya Lui?” ujar Tulamak. “Pasalnya karna sidin kada hakun diuruti wan minyak lamak nang kuambil matan rinjing itu. Kukira sama-sama minyak lamak, hanya minyak lamak itu bakas manyanga iwak sapat karing wan iwak wadi, makanya malingit bau haruknya,” ujar Palui bakisah.“Kasihan mamarina ikam itu diuruti wan minyak bakas manyanga iwak alias minyak lanjar,” ujar Garbus umpat sadih.