UTUH PALILAK DIKALUAR AKAN

Utuh Palilak ni sabujurnya urangnya pintar, buktinya pas inya sakulah SMP bujur kada balajar tapi ulangan dapat tarus manjawab walaupun kada 100% bujur, tu mun inya kada balajar, magitnya ai mun inya hakun balajar saku dapatnya barataan manjawab. Utuh Palilak ni tamasuk macal pang urangnya tulak sakulah kada mau jalan timbuk pasti mahantas jalan pahumaan di balakang sakulahan. Maka balakang sakulahan tu sudah di kandang kapala sakulah wan pagar kawat baduri tapi utuh palilak ni urangnya pintar inya basangu “tang” jadi di tataknya kawat baduri ti, sasarusup ha mambawa sapida BMX Olympic nang bakuncalak wan tanah, bujur haja pang mambawa tas tapi isinya lain buku tapi ba isi hampalam, asam, rambai mahanu ramania jua, inya tulak mahantas tu salajur manjatu asam atau hampalam, baju bujur rapi bamasuk kadalam tapi hibak gatah rambutan nang kaya balang sasirangan haja lagi di baju, dasi pina tainat talinya panjang banar, sapatu merk Kasogi tapi bagantungan haja di tas napa jalan balucak.

Wayah nintu ada guru hanyar di sakulahan Utuh Palilak pindahan matan Banjar, sidin ni urangnya disiplin banar mun mambari PR kada di gawi pacang dikaluar akan sidin pada kalas. Hari sanayan imbah upacara masukan ai bubuhan Utuh Palilak kadalam kalas, jam partama tu di isi palajaran bahasa inggris nang di lajari guru hanyar ti, babaya masuk langsung manyuruh mangumpul PR, labaram Utuh Palilak abut, napang inya kada ingat manggawi PR malam tadi ka asikan nuntun pilim “The A Team” lalu dikaluar akan guru ai inya, bilut muha Utuh Palilak kaluar pada kalas.

Saminggu kamudian dikaluar akan pulang Utuh Palilak pada kalas napang kada ingat pulang manggawi PR, tapi wayahni inya bakawan am ada Utuh Tungkung, Amat Habuk wan Udin Sipit. Tapi anihnya bubuhannya malah kurihingan imbah di kaluar akan, guru ti am bamamai kasasarikan. Minggu dudinya sakalinya Utuh Palilak kada manggawi PR pulang, tapi nang maulah mucai bangat sakali ni sabarataan lalakiannya kada manggawi PR, imbah di suruh kaluar basurak buhannya kasukaan, napang ada hamuk banar gurunya sampai ma adu ka kapala sakulah.

Sakalinya gara-garanya guru ti kada tahu pada tiap hari sanayan tu hari pasar di kampung Utuh Palilak, rupanya Utuh Palilak ni bakisah pas dikaluar tu inya ka pasar rami bangat jar manuntun tukang ubat ba ungkai ular bakapala dua, imbah tu inya bakisah kawadah Utuh Tungkung, Amat Habuk wan Udin Sipit napang ada buhannya pada manuruti jua kada manggawi PR, rupanya mandangar buhan lakiannya nang lain lalu manuruti ai sabarataan kada manggawi PR.

Imbah kajadian nintu guru ti kada suah lagi mambari PR gasan dikumpul hari sanayan.

KALAMAHAN UTUH PALILAK

Utuh Palilak ni urangnya sandu bangat, tapi bujur sandu inya baisian parinsip wan pawanian, asal “Mambila Bujur wan Banar” haja kada pacang bamunduran inya ujar urang bahari tu “manuntung”. Utuh palilak ni tamasuk nang bauntung bangat kawa kuliah jua kaya urang, walau saraba pas-pasan tatap inya kawa kuliah, parinsipnya asal ada nang dimakan haja biar sakali ha sahari sudah cukup. Utuh Palilak ni bisa bangat jua bakakawanan jadi kada hiran mun banyak bangat inya baisian kawan, maka Utuh Palilak ni satia kawan bangat jua urangnya. Biar pina sandu tapi mun sudah bapandiran rami bangat tupang jua, tapi hati-hati ha jangan maulah inya sarik ca ngalih bangat mambisai mun inya hamuk, jarnya tampar pacang malapau tu pang, pamulaan kuliah di Banjar haja babaya turun di pal anam sudah bakuntau wan bubuhan ujik.

Utuh Palilak ni tamasuk urang nang disagani bangat di kampus wadah inya kuliah, amun urusan bakuntau lambat mambawai asal kawan haja dibilanya tu pang. Wan dusin kaya itu jua ada dusin nang dihurmatinya ada jua nang bamusuh bangat jua maka jalas kada lulus inya tatap kada pacang ba alah wan dusin nang babida parinsip ti, kada hiran Utuh Palilak ni tamasuk “mapala” jua di kampus alias mahasiswa paling lama lulus. Lagi jaman raramiannya urang bademo Utuh Palilak ni kada katinggalan jua umpat saban hari, jar urang wayah nintu jadi “aktivis” sasuai bangat wan Utuh Palilak nang baisian “awak tipis”. Gara-gara karancakan bademo sampai jua tabuat si Utuh Palilak ni di “Daptar Pancarian Urang” bubuhan intel, untung kada lawas imbah nintu “Kai Harto” ampih jadi Parisidin caka tida saku Utuh Palilak ni tamasuk “Daptar Urang Hilang” jua.

Nah Utuh Palilak ni bujur wani urangnya sabujurnya ada baisian kalamahan, mun masalah bawawanian di akui haja pang sudah, tapi mun masalah bibinian “uhu” bangat Utuh Palilak naya. Utuh Palilak ni Urangnya bungas kada, sugih kada, alim kada jua tagal katurunan payu banarai. Sabujurnya inya bisa haja pang jua malirik bibinian, tapi saliranya tinggi bangat “Kada Sasuai wan Kalu’ung” jar urang bahari tu. Bibinian nang dihandakinya tu alim bangat urangnya, ngarannya Diang Cahaya Bintang mun baparaungan lalakian haja batunduk, pakaian liput tatutup saikungan bida bangat wan Utuh Palilak rambut panjang kaya “Arul Metal” salawar lipis rabit ha pulang lintuhutnya.

Sakali suah Utuh Palilak ni bahamuk dikampus gara-gara kawannya di tampiling urang, napang ada di carinya bahimat urang ti sampai kadalam-dalam kampus, abut urang sakampusan kada nang waninya manyabari, napa mun mambawa “Parang Pacat Gantung” ganggaman kainya bahari, ada nang cangang haja langsung dihinggurnya, nang badudukan di suruhnya bajauhan, kanapa pas nintu ada jua si Diang Cahaya Bintang disitu bibinian nang di handaki Utuh Palilak, lalu malidup-lidup ai dada Utuh Palilak nang kaya “gandarang handak perang” maliat bibinian tadi, asa maliat “Bidadari Turun Matan Kahayangan” jar urang bahari, lalu mamasuk akan parang ti ai ka kumpangnya.

Imbah tu “tanpa panghurmatan balik kanan bubar jalan” ai lagi…..

UTUH PALILAK BABAJU PRAMUKA

Utuh Palilak ni lagi sakulah SMA katuju banar umpat Pramuka Saka Bhayangkari, inya kahandakan banar jadi tantara atawa pulisi, makanya amun babaju paramuka tu lalu pina gagah ha balinggang bajalan, apalagi banyak bgt titipakan di bajunya tu mulai pangkat sampai gambar napa-napakah.

Di subalah rumah Utuh Palilak ada bansaw ampun Julak Lambit, wadah urang maulah kayu, rami bangat saban hari ada nang ma Atari kayu ada nang bamutur trak ada jua nang bamutur pikap, ujar habar nang ampun bansaw sudah bakait wan bubuhan aparat sakira aman bajual wan ma atar kayu.

Wayah nintu Utuh Palilak hanyar bulik latihan paramuka, sabalum naik karumah inya duduk di muhara bansaw Julak Lambit, disitu ada babangkuan naung banar di bawah puhun jambu jadi nyaman banar baduduk bila kamarian hari panas. Paharatan si Utuh Palilak duduk kada lawas datang mutur trak mambawa kayu, babaya lalu di muka Utuh Palilak lalu ba ulur ha tangan supir ma unjuk duit 50ribuan kawadah Utuh Palilak, lakas ai Utuh Palilak manyambut imbah itu badadas ai inya naik ka rumah kada sing bunyian.

Isuknya pas kamarian duduk pulang Utuh Palilak di babangkuan ti, sakalinya disitu ada Pa Yono kumandan pulisi nang bakantur di polsek.

“ Bah ini pang sakalinya kumandan Barimob nang dipadah akan supir trak samalam, kalah 1-0 aku wan ikam Tuh ai” ujar Pa Yono

“Mun di bari urang duit tu razaki Pa ai, pantang di tulak” ujar Utuh Palilak pupura kada tahu padahal paham haja wan maksud Pa Yono.

Sakalinya gara-gara Utuh Palilak babaju paramuka pakai baret samalam inya di sangka supir trak si Adul Kaur, pulisi barimob, cucuk ai inya manjulungi duit.

UTUH PALILAK TULAK KA JAKARTA (kisah urang alai)

Utuh Palilak si Urang Alai hanyar datang di jakarta...pahantian mahadang di ambili kamanakannya si Diang Angas, Utuh Palilak duduk di Ruang Kadatangan Bandara Soekarno Hatta, di tataiannya duduk ada 4 ikung urang, nang saikung matan Jawa, saikungnya Matan Batak, saikungnya urang Papua, nang pa ampihan urang Minang...
Imbah itu bubuhannya bapapatuhan sambil manyambat ngaran
Urang Jawa : Gajah Noto (pina mandagum manyambat)
Urang Batak : Sinaga (nyaring wan hahangkuinya ba ucap)
Urang Papua : Akumbuaya (sambil takujihing putih gigi kaliatan)
Urang Minang : Sikumbang (tagas wan singkat)
Utuh Palilak : (pina bingung mandangar urang harat-harat barataan ngaran, imbah bapikir satumat lalu baucap dengan tagas) Ular Sambur.

KISAH BUHAYA WAN URANG BA UNJUN (kisah bahasa alai)

Utuh Palilak tulak ba unjun ka baruh, hari panas manggarantang Utuh Palilak mamilih bacugut di bawah puhun rambai, paharatan asik ba unjun kanapa Utuh Palilak taitihi mudil kayu barandam timbul di hadapan, imbah di itihinya bahimat sakalinya Buhaya sing ganalan, manggatar Utuh Palilak bagimit bakayakat naik ka puhun rambai maka di tangan unjun kada balapasan, sambil bakayakat naik mata Utuh Palilak kada sing lapasan maitihi Buhaya, si Buhaya hanyar tahu pada ada mangsa di atas puhun lalu baistilah ai baparak ka bawah puhun mahadang ..

Si Utuh Palilak nang katatakutanan kd maitihi lagi pada tajajak batang japuk lalu manggarabau ai gugur kasungai...BYYUUURR...bagalumbang baruh kakacipak Utuh Palilak di banyu bakunyung maka di tangan kada balapasan unjun, si Buhaya nang mahadang di bawah takajut banar jua lalu bukah kada maingat lagi, dalam hati si Buhaya manggarunum "bungul bgt aku taparaki urang jagau wani manajuni ka Buhaya"

Imbah itu si Buhaya lalu bapasan ka anak cucunya bila batamuan urang mambawa unjun jangan diparaki karana urang mambawa unjun tu wani manajuni ka Buhaya ....

CATATAN :
"sampai wayahini kada suah tadangar urang baunjun disambar Buhaya"

UTUH PALILAK MAMBAIKI TIPI (kisah urang alai)

Awal tahun 90-an di kampung Utuh Palilak hanyar masuk siaran tipi, itu gin harus ba antina tinggi, paling kada sama wan puhun nyiur maka am hanyar ada gambarnya, tu gin kada barasih gambarnya mun handak barasih batambah “bustar” maka am. Buhan urang kampung Utuh Palilak rata-rata mamasang antina di atas puhun ganal, ada nang mamasang di atas puhun binjai, puhun kasturi ada jua nang mamasang di atas puhun kariwaya. Di kampung Utuh Palilak ni ada haja pang nang mamasang parabola tapi nang kawa manukar kaya Haji Udin, Haji Burhan wan Haji-haji nang lainnya.

Jaman nintu lagi raramiannya SDSB, nah kabulujuran si Julak Umbai kana buntut ampat angka, lalu batutukar bahimat ai sidin, mulai nukar alpa sampai tipi. Imbah baisi tipi ni sidin kada bakaluaran lagi pada rumah, asik manuntun pilim mahabrata di TPI nang hanyar siaran,
Pas malamnya hujan wan angin ribut di kampung Utuh Palilak. Baisukannya babaya bangun guring langsung manyalai ka tipi si Julak Umbai mahadang pilim mahabrata, tapi sakalinya acaranya flora dan fauna kisah iwak, dihadangi sidin sampai tanghari kada bahabisan acara flora dan fauna, muyak sidin duduk ka palatar, kada lawas malibas Utuh Palilak di muka rumah sidin.

“ui tuh singgah pang satumat pariksa akan tipiku” ujar Julak Umbai

“kanapa tipi pian Julak” ujar Utuh Palilak sambil basinggah ka halaman Julak Umbai

“kada tahu jua kam tuh ai, matan baisukan ti tipiku aur acara flora dan fauna ha tarus, mahanu Iwak puyau lalu imbahnya iwak buradis, mangki, saluang sampai buntal ada jua, maka kada basuara ha pulang tipinya” ujar Julak Umbai

imbah tu di pariksa akan utuh palilak ai tipi sidin, di gutak-gutak volumenya wan picikan-picikannya, di gandah-gandah jua tatap gambar iwak ha galiuran wan kada basuara.

“pian dimana Julak ma andak antina” jar Utuh Palilak

“di balakang rumah di atas puhun Lua Tuh ai” ujar Julak Umbai

Lalu kabalakang rumah ai Utuh Palilak mamariksa antinanya. Huhulingak Utuh Palilak maitihi ka atas puhun Lua kada taliat jua antina tipinya, imbahtu disasarnya tali antina. Kada lawas mandarau Utuh Palilak tatawa.

“ha ha ha … ui Julak Umbai ulun tahu ai marganya tipi pian kaluar gambar iwak tarus, sakalinya antinanya tagugur ka sungai tinggalam dalam banyu, makanya gambar iwak haja tarus nang kaliatan” ujar Utuh Palilak.

Sakalinya gara-gara hujan labat wan angin ribut malam tadi, antina tipi Julak Umbai nang ba andak di atas puhun Lua tagugur kasungai, puhun Lua nya pas pang dipinggir sungai Batang Alai.

*sumber